Отан - сенің үйің

Оразалина Айдана, 6-сынып, Халықаралық «Мирас» мектебі

Жетекшісі: Молдағалықова Қ.Т.

Отан — жүректегі ең қастерлі ұғым

Өз ойымды ақын Мұқағали Мақатаевтың «Үш бақытым» өлеңінен үзіндімен бастағым келеді:

Бақытым бар үшінші — Отан деген.

Құдай деген кім десе — Отан дер ем!

Оты сөнген жалғанда жан барсың ба?

Ойланбай-ақ кел-дағы от ал менен.

Отан — жай ғана айтылатын сөз емес. Отан — сенің жүрегің, қаның, жаның. Отан — сенің үйің. Ол тек туған жерің ғана емес, ол — атамекенің. «Отан» дегенде алпауыт ұғым естіледі, өйткені Отан — әр адамның жүрегіндегі ең терең сезім.

Менің Отаным — Қазақстан. Қазақстан — тәуелсіз мемлекет.

Тәуелсіздік және елдік белгілер

1991 жылы 1 желтоқсанда еліміз өз Президентін сайлады. Ол — Нұрсұлтан Назарбаев. Тәуелсіздік алғаннан кейін Отанымыздың мемлекеттік рәміздері қалыптасты. Бұл — елімізде тұратын барлық халық үшін аса маңызды тарихи оқиға болды. Сол кезден бастап Қазақ елін әлемнің өзге мемлекеттері тани бастады.

Маңызды тарихи кезең

Тәуелсіздік — ел тағдырын өз қолына алған халықтың ең үлкен жеңісі.

Елдік нышандар

Мемлекеттік рәміздер — тәуелсіздіктің айқын белгісі, ортақ мақтаныш.

Жетістіктер: бейбіт өмір және өркендеу

Туған жерімізде маңызды өзгерістер мен жақсы жаңалықтар көп. Біздің ең үлкен жетістігіміз — бейбітшілік. Қазақстан БҰҰ-ға және Халықаралық валюта қорына мүше болды. Еліміздің өз әскері бар.

Табиғи байлық пен кең дала

Қазақстанның жер қойнауында пайдалы қазбалардың көптеген түрі бар. «Жері байдың — елі бай» дегендей, ұлан-байтақ даламызда жануарлар мен өсімдіктер дүниесі де сан алуан.

Ғарышқа жол ашқан ел

Қазақстан ғарышқа жол ашқан елдердің бірі. Қазақтың батыр ұлдары Тоқтар Әубәкіров пен Талғат Мұсабаев ғарышқа ұшты.

Уақыт өте келе Қазақстан дамыған елдердің қатарына қадам басып келеді.

Мақсат пен міндет: білім, технология, тіл

Біздің мақсатымыз бен міндетіміз — Қазақстан халқының тұрмысын жақсарту, елді гүлдендіру және тыныштығын қорғау. Болашағымыз — жаңа технологиялар мен білімде.

Әр адам мемлекеттік тіл — қазақ тілінде сөйлей білуі тиіс.
Сонымен бірге басқа тілдерді де меңгеру — заман талабы.
Әр азаматтың білім деңгейі жоғары болуы керек, өйткені елдің дамуы — білімді ұрпақтың қолында.

EXPO-2017 — үлкен жауапкершілік

2017 жылы Қазақстанда EXPO-2017 көрмесі өтті. Бұл — еліміз үшін үлкен сын әрі қазақстандықтардың күш-жігерін біріктіретін маңызды кезең болды.

Отанды сүю — парыз

Отанды сыйлау және қорғау — әр азаматтың міндеті. Ал сол міндеттің орындалуы немесе орындалмауы — әркімнің өзіне байланысты. Белгіленген мақсаттардың бәріне бірдей бірден қол жеткізу оңай емес. Дегенмен біз, қазақстандықтар, оларды жүзеге асыруға сенімді қадам жасауымыз керек. Себебі бәрі — өз қолымызда, халықтың қолында.

Мұқағали Мақатаев жырлағандай, «оты сөнген жалғанда жан болсаң, ойланбай-ақ менен кел-дағы от ал» — бұл сөздер әр адамды үмітке, жігерге, елге қызмет етуге шақырады.

Мен үшін Отан — қасиетті ұғым. Ол маған бәрінен де асыл, бәрінен де ыстық.

Санат: KZ портал — Қазақша рефераттар жинағы