Ұлттық тәрбие - адам өмірінің алтын арқауы
Патриотизм — ұлттың болашағын айқындайтын ұстаным
Елбасы Н.Ә. Назарбаевтың «Қазақстан – 2050: бір мақсат, бір мүдде, бір болашақ» Жолдауында Қазақстан тарихына енетін он негізгі идеяның бірі ретінде патриотизм ерекше аталады. Меніңше, бала тәрбиесі — мемлекеттің ең маңызды міндеттерінің бірі. Өйткені бала тек ата-анаға ғана емес, ұлыс пен ұлттың ертеңіне жауап беретін ұрпақ.
Тәрбиенің бастауы — отбасы
Қай елде, қай заманда болмасын, бала тәрбиесіне ерекше мән берілген. Патриоттық сезімнің қалыптасуы ең алдымен отбасынан басталады. Қазақстан Республикасының білім беру саласындағы негізгі міндеттердің бірі — оқушылар мен жастарды патриотизмге, биік мәдениетке, адам құндылықтары мен бостандықтарын құрметтеуге тәрбиелеу.
Елбасы Н.Ә. Назарбаев отаншылдық сезімін тәрбиелеу мектепке дейінгі жүйеден бастап жоғары оқу орындарына дейін өзекті екенін айтып, балаларды Отанды, туған жерді, халқын сүюге баулу — мұғалімнің аса маңызды парызы екенін атап өткен.
Менің Отаным — Қазақстан
Менің Отаным — Қазақстан. Мен мемлекеттің мүддесін қорғайтын патриот болуға ұмтыламын. Патриоттық тәрбие ұлттық намыс пен ұлттық сана-сезімнің, рухани байлықтың көрінісі деп білемін. Рухани байлыққа ең алдымен тіліміз, дініміз, салт-дәстүріміз жатады.
Тіл
Қазақ болуымыз үшін қажет
Дін
Адам болуымыз үшін қажет
Салт-дәстүр
Ұлт болуымыз үшін қажет
Ұлттық тәрбие — адам өмірінің алтын арқауы. Ұлттық тәрбиеден терең нәр алып, рухани бай адам болғым келеді.
Тәртіп, еңбек және азаматтық жауапкершілік
«Тәрбиелі — тәртіптің құлы, тәртіпті — елдің ұлы», — деген Бауыржан Момышұлының сөзі мен үшін өмірлік қағида. Менің міндетім — саналы өмір сүріп, сапалы ұрпақ болуға ұмтылу.
Мағжан Жұмабаев: «Тәрбиедегі мақсат — баланы тәрбиешінің дәл өзіндей қылып шығару емес, келешек өз заманына лайық қылып шығару», — деген. Бұл ой бүгінгі білім мен тәрбиенің бағытын айқындайды.
Мен өз бойымда азаматтық пен қазақстандық патриотизмді қалыптастыруға, мемлекеттік рәміздерді құрметтеуге, халық дәстүрлерін дәріптеуге, әлемдік және отандық мәдениет жетістіктерін танып-білуге тырысамын. Сондай-ақ заңға және қоғамға қарсы келетін іс-әрекеттерден аулақ болуды өзіме міндет санаймын.
Абай мұрасы және рухани бағдар
Абай Құнанбаев еңбектері жастарды ерлік рухта тәрбиелеуді, патриотизмге баулуды, намысын оятып, адамгершілік қасиеттерін нығайтуды мақсат етеді. Мен Абай шығармаларынан үлгі аламын.
Патриоттық тәрбие арқылы саналы сезімім мен көзқарасым қалыптасады. Отанға деген сүйіспеншілік өзімді тұлға ретінде сезінуге мүмкіндік беріп, өмірде өзіме сенімді болуға септігін тигізеді.
Патриоттық тәрбиенің алғашқы мектебі — мектеп
Патриоттық рухта тәрбиеленудің алғашқы кезеңі мектептен басталады деп білемін. Отанға сүйіспеншілік пен ана тіліне, салт-дәстүрге құрмет — күнделікті әрекеттен көрінеді: ұстазды сыйлау, сабаққа тұрақты қатысу, тапсырмаларды уақытында орындау, ізетті әрі инабатты болу.
Өмірлік мақсат және белсенділік
Менің мақсатым — дені сау, ұлттық санасы оянған, рухани ойлауы биік, мәдениетті, еңбекқор, іскер, бойында игі қасиеттері бар азамат болу. Елбасының: «Біз жеткіншек ұрпақты босбелбеу тірлікке емес, басқалармен бірдей бағын сынайтын нар тәуекел мен іскерлікке тәрбиелеуіміз ләзім», — деген сөзі мені қоғамдық істерге, өнер мен спортқа, білімге ұмтылуға жетелейді.
Салт-дәстүр — тәрбиенің тірі қайнары
Ежелгі ата-бабаларымыздың күй мұрасы, айтыс өлеңдері, батырлар туралы тарихи дастандары, сондай-ақ тәрбиелік мәні зор рәсімдер — шілдехана, бесікке бөлеу, тұсау кесу және басқа да дәстүрлер — маған өнеге берді. Осылар арқылы елді, жерді, Отанды сүю қасиеті қалыптасып, патриоттық сезімім нығая түсті.
Отан ұғымы — күнделікті сезінетін қастер
«Отан» деген сөзді мен күнде сезінемін. Отан — адамның туып-өскен жері, атамекені, халқы, туған-туыстары мен жақындары. Елбасы Н.Ә. Назарбаев: «Болашақта еңбек етіп, өмір сүретіндер — бүгінгі мектеп оқушылары. Мұғалім оларды қалай тәрбиелесе, Қазақстан сол деңгейде болады», — деп айтқан.
Халықтық салт-дәстүр мен мәдени құндылықтарды тәрбие ісінде орнымен пайдалансақ, жан-жақты жетілген, ақылды да әдепті, патриоттық сезімі берік азамат тәрбиелей аламыз. Ел тарихын білетін, Отанын сүйетін, заман талабына сай оқушы мен жасты тәрбиелеу — бүгінгі күн талабы.
Қорытынды өлең
Отаным, достық пен ынтымақ мекені,
Гүлденсін халқымның ертеңі.
Жасай бер, егемен, Тәуелсіз елім!
Отаным, сүйікті мекенім!