Елімнің тарихы - менің халқымның өткені мен бүгіні

«Мәңгілік Ел – 2050» идеясы – адамның өз Отаны, тілі, салт-дәстүрі, әдет-ғұрпы, өткені мен болашағы бар екенін айқын сезіндіретін тұғырлы ұғым. Менің елім – тәуелсіз Қазақстан. Мен өз елімді мақтан тұтамын. Елімнің тарихы – халқымның өткені мен бүгіні.

Егемен еліміздің әрбір жасы білімді де парасатты, отаншыл, толеранттылығы берік ұл мен қыз болып қалыптасуы тиіс. Мәңгілік Елдің іргесін қалаған да – осы елдің халқы. Бұл – ата-бабаларымыздың сан мың жылдар мен ғасырларға созылған асыл арманы: тұрмысы қуатты, шаңырағы шаттық пен мейірімге толы, ұрпағы ертеңіне нық сеніммен қарайтын азат та тәуелсіз ел болу. Бүгінде сол арман ақиқатқа айналды.

Мағынасы терең, тағылымы зор сәулет нысандарының бірі – Астананың сол жағалауында асқақтаған Мәңгілік Ел қақпасы. Ол Ақордаға бет бұрып, шуағын Бейбітшілік және келісім сарайына, «Қазақ елі» монументіне, Тәуелсіздік сарайына, «Шабыт» сарайына бағыттайды. Сәулетті ғимараттармен үндескен бұл қақпа елдік идеяны көзге көрінер белгіге айналдырды.

«Мәңгілік Ел» сөзінің тарихы мен тамыры терең. Түркі шежіресінде «мәңгі» сөзі кейде Тәңір, Алла ұғымдарымен мағыналас қолданылған. Демек, Мәңгілік Ел ұғымы – қасиетті әрі жауапкершілігі зор түсінік.

Адам қарасы үзілмейтін бұл ескерткіште халқымыздың болмысы, дүниетанымы, мәдениеті бір арнаға тоғысқандай әсер қалдырады. Сарыарқаның төрінен орын алуы да тегін емес: ол – егемен елдің, өр рухты халықтың айғағы.

Тәуелсіздіктің 20 жылдығы қарсаңында ашылған бұл нысан 20 метр биіктікте асқақтайды. Ескерткіштегі әрбір нақыш өз ерекшелігімен мәнді: қақпаның сол жақ қапталындағы қария мүсіні – терең ой мен рухани дүниетанымның, даналықтың символы; ал Әйел-Ананың бейнесі халқымыздың «Отан-ана», «Жер-ана», «Ана тілі» секілді киелі ұлттық ұғымдарын айшықтайды.

Мәңгілік Елдің жүрегі мен тынысына айналған Астана – елдің жаңарған келбеті. Тәуелсіз Қазақстанның тарихы қысқа уақыттың өзінде мәңгілікке айналарлық мазмұн жинады. Біз, бүгінгі жастар, 1465 жылы хандық құрған Керей мен Жәнібек, кейін Қасым хан дәуірімен жалғасқан мемлекеттіліктің ұрпағымыз. Еліміздің тарихы сол кезеңдерден бастау алады, ал біз – бабалар ісін жалғастырушымыз.

Қазақ халқының қуаты мен төзімі сын сағаттарда танылды: «Ақтабан шұбырынды, Алқакөл сұлама» секілді зұлматқа да қарсы тұра білді. Желтоқсан боздақтарын еске алғанда жүрек сыздап, көңіл тебіренеді. Сол аға-әпкелердің ерлігі – бүгінгі ұрпаққа мәңгілік өнеге.

Қиын кезеңдерде елдің басын қосып, сөз бен семсерді қатар ұстаған Абылай ханның тарихи рөлі айрықша. Ал тәуелсіз Қазақстанның жаңа белестерге көтерілуінде Н.Ә. Назарбаевтың сөзі мен ісі елімізді әлемге танытып, Қазақстан деген мемлекеттің салмағын халықаралық деңгейде айқындауға ықпал етті.

Қазақ үшін жеті саны – қасиетті, орны бөлек. «Жеті ырыс», «жеті қабат көк», «жеті қазына» секілді ұғымдар халық жадында терең орныққан. Дәстүрлі дүниетанымдағы жеті қазына туралы түсінік уақыт өте байып, жаңаша мазмұнмен толыға түсті. «Қазақстан – 2050» стратегиясының да негізгі бағыттары осындай басымдықтарды аңғартады.

Қазақстан халқы Мәңгілік Елдің іргесін қалады: тұрақты экономиканы қалыптастырып, ұрпаққа өшпес жылнама жазды, болашаққа жол салды. Мұның бәрі – тәуелсіздіктің тартуы, азаттықтың асыл қазынасы.

Ендеше, Мәңгілік Елдің жастары білімді де білікті, шығармашыл болып, аға буынның еңбегін жалғауы қажет. Еңбегі мәнді, жемісті, баянды болып отырған үлкендерімізге құрмет – ұрпақ парызы. Ақсақалды аталар мен ақ жаулықты әжелер – әр шаңырақтың қазынасы, елдің құты.

Бүгінгі күн – ата-бабаларымыздың арман-аңсары ақиқатқа айналған күн. Бұл – тілімізді жаңғыртып, дінімізді қайта танып, оның қадірін арттыра алған ұлы кезең. Бұл – жаңа ғасыр төрінде «Қазақстан – 2050» стратегиясы арқылы мақсатты айқындаған уақыт.

Әр жас халқының ерлікке толы тарихына қызығып қана қоймай, оны терең тануға ұмтылуы керек: қазақ хандарының мұраларын құрметтеу, Қасым ханның қасқа жолы, Есім ханның ескі жолы, Тәуке ханның Жеті жарғысы секілді құқықтық дәстүрді білу – ұлттық сананы бекітеді.

Көкірегі «елім, жерім, халқым» деп соққан, бойында жігер мен адамгершілік, ұлтжандылық басым жас қана аға буынның көк байрағын келесі ұрпаққа зор сеніммен табыстауына мүмкіндік береді. Білімді, қайратты, нағыз патриот жас ата-баба аманатын қадірлеп, бүгінгі бақытты өмірді баянды етіп, елді гүлдендіре алады.