Тәуелсіз - Қазақ елі

XX ғасыр аяқталды. Адамзат тарихының ұлан-асыр даму көшінде жер үшін, ел үшін сан қилы дүрбелеңдер болды. Әдетте дәл осындай ірі, қанқұйлы соғыстардан кейін ғана әлем картасына түзетулер енгізіліп отырды. Сол түзетулердің бірінде Орталық Еуразияда ғажайып әрі қайталанбас тарихы бар Қазақстан Республикасы орнықты.

Қазақстан — қазақ халқының ата-баба мекені, ежелгі қонысы. Бұл — ата-бабамыз туып-өскен, тіршілік еткен, кіндік қаны тамған кең жазира. Тәуелсіз Қазақ еліне жеткізген жол жеңіл болған жоқ: азап та көрдік, аштық та кештік, сұм соғыс та өтті.

Тарих қойнауына үңілсек, «Ақтабан шұбырынды, Алқакөл сұлама» секілді зұлмат кезеңдер ел жадында өшпес із қалдырды. Беріректе патша үкіметінің отарлау саясаты күшейіп, «Зар заман» ақындарының ащы зары халықтың жай-күйін бейнеледі: шұрайлы жерден айырылу, тұрмыстың төмендеуі, салт-дәстүрге нұқсан келуі. Сондай шақта ел үшін атқа қонған батыр әрі ақын бабаларымыз жерін, елін қорғап, бүгінгі ұрпаққа аманат етті. Бұл — өшпес тарих, үлкен мақтаныш.

Кең байтақ даламыздың жер асты — байлыққа толы қазына болса, жер үстінің сәні — бір бөлек әлем. Қазақстанның табиғаты тамсандырып, таңдай қақтырады: аспанмен тілдескен мұзарт шыңдар, тұңғиығы терең жұмбақ көлдер, ақ жал толқындары арғымақтай көкке шапшыған шалқар теңіз, күн шуағы оттай төгілген шөлейт, арналы өзен мен ну орман — бәрі бір мекенде тоғысқан.

«Отан — оттан ыстық», «Ер ел үшін туады, ел үшін өледі» деген ұғым халқымыздың санасына терең орныққан. Қаһарман батыр Бауыржан Момышұлының «Отан үшін отқа түс — күймейсің» деген сөзі де осы сезімнің асқақтығын айқындайды.

XX ғасырдың сүргінін бастан кешіп, жаңа мыңжылдықтың табалдырығын жаңғырған қалпында аттаған Қазақстан өз болмысын, жарқын мәдениетін, ғасырлар бойы қалыптасқан салт-дәстүрін, қилы тарихын әлемге танытты. Мақсат — құлдық пен зорлықсыз жаңа өмірді орнықтыру, еңбекті мәдениетпен жарастыру, сұлулық пен парасаттың салтанат құруына жол ашу, прогресшіл адамзатпен қатар өрлеу.

Ең бастысы, қазақ халқымен бірге түрлі этностардың да Отанына айналған еліміз қоғамдағы татулық пен ынтымақтастықты сақтаудың, сан алуан ұлттық мәдениет пен діннің үйлесімді дамуына қамқорлық жасаудың жарқын үлгісін көрсетті.

Қазақта «бақыт» деген ұғым бар. Шын мәнінде, бақытты болудың негізі — тәуелсіз Отан, биік тұғыр. Ол — сен тіккен орда, сен сүйенген берік тірек. Бақыттың кіндігі — Отан.

Егер жүрек «Отан» деп лүпіл қақса, тілек «Отан» деп ағындаса, білек «Отан» деп сыбанса, ел үшін егілген, халық үшін қайысқан жұрт болса — арман орындалды деуге болады.

Қазақ — өр халық, білімді халық. Білімнің арқасында біз жаңа ғасырға өркениетті ұлт ретінде қадам бастық, тарих сахнасына Егемен ел ретінде ендік, әлемдік қауымдастық көшіне өз керуенімізбен қосылдық.

Елтаңбаны көріп, көк байрақтың желбірегенін тамашалап, Әнұранның әуезін естігенде бойды ерекше асқақ сезім билейді. Мұны көру, мұны сезіну — үлкен бақыт.

Санат: KZ портал — Қазақша рефераттар жинағы