Болашақ ұрпаққа
Ризашылық күні: «Болашақ бүгіннен басталады»
Қайырлы күн, қадірлі ұстаздар мен оқушылар! «Болашақ бүгіннен басталады» атты Ризашылық күніне арналған мерекелік кешке қош келдіңіздер.
Бұл күннің мәні
Талайлы тағдырды бір шаңырақтың астына біріктіріп, мұқтаж жанға қанатымен су сепкен қарлығаштай қамқор болған Қазақстанда адамның адамға құрмет көрсететін ерекше күн белгілеу идеясы көтерілді. Мемлекет басшысы Нұрсұлтан Назарбаев барлық ұлттың бір-біріне және қазақ халқына алғыс айту күнін бекітуді ұсынды.
Тарихи негіз
«Сталин режимінде әр жылдары халықтар түгелдей жер аударылды. Оларды вагондардан ауылдарға түсіріп кете берді, еш дүниесі болған жоқ. Сол уақытта бұл далада өздері мұқтаж бола отырып, оларды саман үйлеріне қабылдаған қазақ отбасылары өмір сүрді... Қазақстан халқы Ассамблеясының құрылған күні — 1 наурызда — барлық ұлттың бір-біріне және осы адамдарды қабылдаған, аяушылық білдірген қазақтарға алғыс айту күні белгіленсе әділетті болар еді».
Бұл ой Қазақстан халқы Ассамблеясының «Мәңгілік Ел: бір ел — бір тағдыр» тақырыбындағы ХХІІ сессиясында айтылған.
Негізгі ұғымдар
- Алғыс
- Біреудің жасаған жақсылығы, көмегі мен ниеті үшін ризашылық білдіру; оның іс-әрекетіне жоғары баға беру.
- Ризашылық
- Өзгенің жақсылығына қанағаттану, жүректен шыққан алғыс сезімі мен құрмет.
Көрегендікке тағзым
Нұрсұлтан Әбішұлы Назарбаевтай көреген саясаткердің ерен еңбегін бүгін де, әрқашан да атап өтеміз. Тарих тұлғаны тудырады, ал тұлға тарихтың бағытын айқындайды.
Арнау (өлең)
Қара жер жаралғалы қазағымның, шын сүйіп, шын түсінген азабың кім?
Жүрекке қолды қойып ниет қылдым: «Жетті» деп тарихымды жазатын күн.
Тағдырды Алла ғана нәсіп етіп, тарихты тұлға ғана жасай алмақ.
Ол ұлдың заты — нұрдан, аты — Сұлтан!
Қазақта ер тумайды енді сіздей, жарылып кетсе де өті дұшпанымның.
— Нұраға, о не дейсіз? Біз дайынбыз! Тарих тұр сахнадан сізді күткен…
Орындаушылар: 8-сынып оқушылары.
Ұстазға құрмет — ұлтқа құрмет
Ұстаз болу — аса маңызды әрі жауапты мамандық. Ұстаз тек білім беріп қана қоймай, баланы болашақ үлкен өмірге дайындап, бағыт-бағдар береді, қажет кеңесімен қолдайды.
Құрметті ұстаздар, оқушылар атынан көрсеткен қамқорлықтарыңыз, аялы алақандарыңыз, жылы лебіздеріңіз үшін басымызды иіп, алғыс айтамыз. Еңбектеріңізге жеміс, отбасыларыңызға береке-бақыт тілейміз.
Мектептің жүрегі
Мұғалім — білімнің шамшырағы, бала жанын баптайтын бағбан.
Шәкірт мақтанышы
Өмір теңізіне құлаш ұрған әр шәкірт өз ұстазымен мақтанады.
Сахналық бағдарлама (іріктеме)
- 1 Оқушылар алғысы — 10-сынып.
- 2 Ән: «Әгугәй» — Мұхит, Гүлбану (7-сынып).
- 3 Ән: «Бақыт деген» — Хайрулла, Динара.
- 4 Көркемсөз оқу — Бекнұр, Гүлдерай, Гүлжазира, Динара.
- 5 Қазақ биі — 10-сынып.
- 6 Хор: «Ризамыз».
Болашақ бүгіннен басталады
Бұл мереке атауының өзегі — ертеңге жауапкершілік. Елдің болашағына көз салуға мүмкіндік беретін маңызды ой: «Мен елім үшін не істей аламын?» деген сұраққа жауап іздеу. Қазақстан — 2050 бағыты білімді, дені сау, жаңа көзқарастағы азамат бейнесін қалыптастыруды көздейді. Ол үшін әрқайсымызға табандылық пен еңбек қажет.
Ұстаз туралы өсиет (өлең)
Ұстаз деген — ұлы сөз, ұлағатты, ол болмаса, кім береді парасатты?
Асылын беріп шәкірт бойларына, ағартқан сол үшін де қара шашты.
Ұстазға әркім басын ию керек, кемеңгер, ақылшым деп білу керек.
Жақсылар ұмытпайды ұстаздарын, ойлайды, олар сонымен ұшталғанын.
Отбасы құндылығы: әке, ана, бала
Отбасының басты қуанышы, алтын тіреу діңгегі — бала. Баланың берекелі болып өсуіне берекелі отбасының әсері мол. Халық даналығы: «Әке — асқар тау, ана — бауырындағы бұлақ, бала — жағасындағы құрақ» деп, отбасы қадірін табиғаттың ғажайып құбылысына теңейді.
Әкеге тағзым
Әке — ұрпақ иесі, панасы, үйдің тірегі. Бала үшін әке — шыңы биік асқар тау.
Жан әке, сіз жүргенде көзім тіктеп, өсеміз бәйтеректей өзіңіз құсап.
Үйреттіңіз ерлікті де, елдікті де; дарыттыңыз дархандықты, кеңдікті де.
Бүгін — той. Әніңіз шалқысын, шаттыққа толы болсын әр сағатыңыз.
9 «Б» сынып: Әкелерге тілек.
Анаға алғыс
Ана — әр адамның жарық дүниедегі ең жақыны, жанашыры, қамқоршысы. Ана жүрегі — мейірімнің мекені, ал ананың көз жасы — киелі.
Ана баланы өмірге әкеліп қана қоймай, оны көзінің қарашығындай қорғайды, елінің рухын бойына сіңіреді, жақсылыққа жетелейді. Бойымыздағы ең жақсы қасиеттер алдымен анадан дариды.
Бүгінгі Ризашылық күнін пайдаланып, аналарымызға да басымызды иіп, алғыс айтамыз.
9 «А» сынып: Аналарға тілек. Ән: «Ана, сен бақыттысың» — Мырзабек, Гүлжазира (8-сынып).
Өнер — алғыс тілінің бір түрі
Домбыраның күмбірі, әннің әсемі — жүрекке жол табатын шынайы ықылас. «Құлақтан кіріп бойды алар әсем ән мен тәтті күй…» — өнердің құдіреті де осында.
- • Күй — өнерлі қыздардың орындауында.
- • «Аққу» биі — Сапар Динара (7-сынып).
Қорытынды үндеу
Құрметті оқушылар, жылы сөзді, қайырымды істі, жақсы ойды, кіршіксіз сезімді ешкімнен ешқашан аямаңыздар. «Рақмет» деген қасиетті сөзді жиі айтыңыздар. Алғыс пен ризашылықты естіген сайын адам жақсылық жасауға ұмтылады — осыны жадыңызда сақтаңыз.
Өмірдің әр сәтін бағалау
Бүгінгі күн — қайта келмейтін мүмкіндік. Қарапайым жақсылық та үлкен өзгеріске бастайды.
Табиғат-Анаға алғыс
Мейірімді күніне, көңілді жаңбырына, ақ қарына, жұмсақ бұлтына және жақындардың риясыз махаббатына алғыс айтуды ұмытпаңыз.
Осымен «Болашақ бүгіннен басталады» атты Ризашылық күніне арналған мерекелік кешіміз аяқталды. Келіп тамашалағандарыңыз үшін көп рақмет!
«Қош болып тұрыңыздар көріскенше, осымен концертіміз аяқталды».
Санат: Қазақша материалдар жинағы.