Ауыл жағдайы


Ауыл, аудандарда ауыз су мәселесі әлі өткір күйінде қалып отыр. Мәселен, Қазақстанның барлық түкпіріне белгілі Сарыағаштың арасан суын айтса да болады. Өткенде ақпарат құралдарында Сарыағаштың шипалы суы орнына Павлодарда ауыз су пайдаланылып, арасан ретінде халыққа ұсынылғаны әшкереленді. Қызығы сол, Сарыағашта күні кешеге дейін арасаннан көрі табиғи ауыз су тауып ішу қиынға айналып келген еді. Өйткені, аудан орналасқан аймақ суы шипалы. Оны үздіксіз ішу ағзаға зиян.
Сондықтан Қазақстан Үкіметі кешегі әлеммен тірескен Одақтың қолынан келмегенін жасап, тау бөктерінен Сарыағашқа таза ауыз су тартуға қыруар қаржы бөлген.
Бір қиындығы, аты дардай аудан болса да Сарыағаш халқы суды сағатпен алатын. Облыс әкімі Өмірзақ Шөкеев осы мәселеге облыс бойынша айрықша назар аударып, арнаулы комиссия құрғызып түбегейлі зерттетті.
Соның нәтижесі қатты байқалып жатыр. Облыс әкімінің тапсырмасы бойынша барлық аудан, қалалар 1 қарашаға дейін тәулік бойы ауыз сумен қамтамасыз етілуі керек. Ауданды ретке келтіріп алғаннан кейін кезек ауылдарға бұйырмақ. Бүгінде Сарыағаш қаласында 32 мыңнан астам халық тұрады. Аудан әкімі Нұрмахан Жолдасов баяндағандай, оның 15896-сының ауыз суға толық қолдары жетіп отыр.
Ауыз су жүйесі бойынша үшінші орамдағы 4086 үйдің 2939-ы 24 сағат бойы үздіксіз су алып жатыр. Оған тәулігіне 4000 текше метр су айдалуда. Осы үйлердің 1764-іне есептегіш құралдар орнатылған. Бұл әдіс онсыз да қат ауыз суды бей-берекет пайдаланудан құтқарады. Бүгінде күніне 30 үйге су кіргізіледі екен. Екінші кезектегі кесте бойынша тағы да 2502 үйге су беріледі.
Сонымен қатар, Келес су айдау стансасынан су алып отырған 800 отбасына жаңадан су құбыры тартылмақ.
Қаржысыз ештеңе шешілмейді. Сарыағаштың суды сатып ішетіндей болуының астарында бұрын жеткілікті қаржы бөлінбегендігі себеп болған-ды. Осы мәселелер мемлекетіміздің экономикалық қуаты артқан сайын оңтайлы шешіліп келеді. Біз тек ауыз су мәселесін ғана сөз еттік. Әйтпесе, Сарыағаш баяғы күлге аунаған тауықтай күйелеш, ескі қала емес, сәулетті қалаға айналып келеді.
Мұны қала халқы да айқын сезіне бастады.
Оңтүстік Қазақстан облысы, Сарыағаш ауданы.

КӨҢІЛДЕ СЕНІМ КӨПТЕУ КҮДІГІНЕН
Өсербай ДАБЫЛОВ, “Мерей” шаруа қожалығының механизаторы.
Ауылым – алтын бесігім. Осы сөзде қаншама терең мағына жатыр. Біздің қазақтың тамыр тартқан топырағы осы ауылдан басталады. Осыны жете біліп, жөн түсінген мемлекеттік саясатқа біз қашаннан разымыз. Еліміздің халыққа жақындығының арқасында қайсыбір кезеңдері мемлекетімізде Ауыл жылдары жарияланды. Сол жылдардың шарапатын қаншама елді мекендер көрді. Соның ырыздығы енді байқалып жатыр. Аталған жылдар ел үшін текке кеткен жоқ. Егемендіктің алғашқы жылдарында басқа түскен барша қиындықтарды осы тұста біршама жеңіп, жүкті бірсыпыра жеңілдетіп алудың орайы келгенін енді ешкім жоққа шығара алмайды.
Мен бұрыннан келе жатқан қарапайым еңбек адамымын. Бірақ, осы қоғамның бір мүшесі ретінде елімізде болып жататын барша өзгерістер мен қайта құрулардан әсте шет қалып көрген емеспін. Сондықтан да орын алатын әрбір жаңалықты мен де елеңдеп күтіп отырамын. Сондайда жағдайымызды жақсартып, ауыртпалығымызды азайтатын жайлар болып жатса, елмен бірге өзім де қуанамын. Тап сондай жүрекке жылы тиіп, сана самғатар әңгімелер елімізде жиілей түскенін де көңіл құсын көкке серпіндіретінін несіне жасырайын. Осындай кезеңдерде төбеміз көкке жеткендей марқайып қаламыз. Сол жақсылықтардың, жағымды жаңалықтардың бір тармағы біздің ауыл өмірімен де тікелей қабысып жатыр.
Бір кездері Сәбит Мұқанов “Гүлденсе ауыл гүлденеміз бәріміз”, деп бекер жырламаған. Ауылдың жайы жақсы болса, жоғарыдағы жұрттың да жағдайы жаман болмайды. Өйткені, арғы тегі ауылдан шыққан қазақтың ауылға алаңдамайтыны жоқ. Осы ретте мені еліміздің таяу жылдарда Бүкіләлемдік сауда ұйымына мүше болып енуге тілек білдіріп жүрген жайы ойландырады. Әлбетте, мұндай беделді де белсенді халықаралық ұйымға ену арқылы еліміздің рыногын әр түрлі бағалы тауарлармен үйіп қойған жақсы.
Бірақ, осыған орай өз тауарларымызды да солай шет елдерге шығара алатын қабілетіміз болуы керек. Егер біздің сауда қатарларымызды Қытай мен Вьетнамның арзан да сапасыз күріштері жаулап алып, өзіміздің Сырдың бағалы да маңызды дақылын ығыстырып шығарып жататын болса, біздің еңбегіміздің еш, тұзымыздың сор болғаны – болған. Сондықтан мәселенің осы жағын да мықтап ойланып, нәрсіз өнімдердің өзіне лайықты бәсекелес бола алатын жағымызды ойлауымыз керек. Дегенмен, билік басындағылардың тапсырмасынан кейін жағдайдың бұл сипатына да жеткілікті мән берілетін шығар деген үміттеміз.
Қызылорда облысы, Қазалы ауданы, Өркендеу ауылы.


Ұқсас жұмыстар
Аудиттің мәні және оның нарықтық экономика жағдайындағы ролі
Нарық жағдайында шағын кәсіпкерліктің дамуы
Оңтүстік Қазақстан облысындағы несие нарығының қазіргі жағдайын талдау
Ауыл мектебі оқушыларын рухани-адамгершілікке тәрбиелеудің педагогикалық шарттарының орындалуы
Ауыл шаруашылығы өнімдерін өңдейтін кәсіпорынның пайдалылығын арттыру жолдары
Қазақ халқының ХVІІІ ғасырдағы саяси жағдайы
Реформадан кейінгі жылдардағы елдің жағдайы
Бөкей хандығының құрылуы және оның саяси жағдайы
Кәсіпорынның қаржылық жағдайын бағалау және кәсіпорынның қаржылық тұрақтылыққа жету жолдары
Жастардың әлеуметтік қазіргі жағдайы мен перспективасы


Көмек