Атағына бүкіл шығыс халқы ортақтасқан, қазақтың атын шығарған аяулы қыздарымыз
Ел мен ердің жеңісі
Бұл тәрбие сағаты Ұлы Отан соғысы жылдарындағы қиындықтарды, халық көтерген қасіретті еске алып, бүгінгі ұрпақты Отанды сүюге, қорғауға баулуға және қазақстандықтардың ерлік жолымен таныстыруға арналады.
Екі жүргізушінің сөзі
І жүргізуші
Армысыздар, құрметті ұстаздар мен оқушылар! Ұлы Отан соғысы кезіндегі қиындықтарды, халық көтерген қасіретті еске ала отырып, өзіміз сияқты жалынды жастарды Отанын сүюге, оны қорғауға баулу және қазақстандықтардың ерлік істерімен таныстыру мақсатындағы «Ел мен ердің жеңісі» атты ашық тәрбие сағатына қош келдіңіздер!
ІІ жүргізуші
1945 жылдың мамырында, маусымында, шілдесінде... Айтшы, замандасым, елге оралған майдангерлер туралы не білесің?
І жүргізуші
Бұл жайды туған ел жақсы біледі. Ал біз ше — ойсыз өсіп, ержетіп жүрмедік пе? Ей, замандас! Сұр шинель мен керзі етік киген жандар нені еске түсіреді?
ІІ жүргізуші
Елінен де, өзінен де күй кетіп, төрт жыл бойы шинель мен керзі етік киді. Майдангерлер кейін де біраз жыл сол әскери киімнің салмағын сүйретіп жүрді.
Соғыстың салмағы: адам тағдыры мен халық қасіреті
Соғыс — адам баласы үшін ең үрейлі, ең қорқынышты ұғым. Өйткені соғыс атаулы адамзатты қырып-жоюға бағытталған. Тарихта үстемдік пен байлық үшін талай рет адам қаны судай ақты. Соның ішінде 50 миллионнан астам адамның өмірін жалмаған Екінші дүниежүзілік соғыс — ең қасіретті беттердің бірі.
Әділетсіз арпалысқа Қазақстаннан 2 миллионға жуық түрлі ұлт өкілдері әскер қатарына шақырылды. Майдан даласынан 394 мың қазақ боздағы оралмады. Бұл соғыс қайғы-қасірет әкелмеген бірде-бір отбасы қалған жоқ: бірінің әкесі, бірінің ағасы қаза тапты, қаншама жас боздақтың қыршын ғұмыры қиылды.
Қазақ қыздарының ерлігі
Ерлермен тізе қосып, жауға қарсы шығуға бел буғандардың қатарында қазақтың жас қыздары да болды. Олар өз еркімен өтініш беріп, соғыс майданына аттанды. Соғыс өрті оларды ерте есейтті: кеше ғана гүлдей құлпырған бойжеткендер әскери киім киіп, қару асынып, тілі мен діні бөлек жаумен шайқасқа түсті. Оқ пен оттың ортасында жүріп, ерліктің ерен үлгілерін көрсетті.
Мәншүк пен Әлия — Шығысқа ортақ мақтаныш
Екінші дүниежүзілік соғыста Шығыс халықтарының қыздары арасынан «Батыр» атағын алған екі-ақ ару бар. Олар — қазақтың Мәншүк Мәметова мен Әлия Молдағұлова. Есімдері бүкіл Шығысқа ортақтасқан, қазақтың атын асқақтатқан аяулы қыздарымыз.
Көрсетілім
Туған өлкеміздің төл перзенті Әлия Молдағұлова туралы фильмді бірге тамашалайық.
(Фильм)
Ұлы Жеңіс: тарихтың мәңгілік күні
«Шүйінші, халқым, шүйінші! Шүйіншіге сүйінші! … Соғыс бітті жеңіспен, жеңдік жауды күресте, жасалсын той-мереке», — деп Таир Жароков жырлағандай, Ұлы Отан соғысының жеңіспен аяқталғанына 65 жыл толды. Бұл — кеңес халқының ержүректілігі мен төзімін танытқан, тарихта мәңгі қалатын күн.
Бұл күнді алғы шепте қайсарлықпен шайқасып, ерліктің сан үлгісін көрсеткен ардагерлер атап өтеді. Сондай-ақ елі мен жері үшін жанын қиып, туған-туысына, ауылына оралмай қалған қаһарман ерлерді бүкіл ел болып еске алады.
Жеңіс мерекесін бұрынғы Кеңес Одағы құрамындағы 15 республика халқы ғана емес, неміс басқыншыларынан азат етілген Еуропа қалаларының да тұрғындары атап өтеді: Варшава, Прага, Будапешт, Бухарест, София, Белград, Париж, Вена және басқа да көптеген шаһарлар.
Өнер нөмірі
Бейбіт өмірді сыйлаған ерлер рухына арналған ән шырқалады.
(Ән)
Естелік
Ұрпақтың парызы — ерлікке тағзым етіп, тарих сабақтарын жадыда сақтау.
Майдан мен тыл: төзім мен бірліктің шежіресі
Жеңіс оңайлықпен келген жоқ. Жеңіс жолында Отан үшін талай миллиондаған асыл азамат мерт болды. Жауымен жан аямай шайқасып, ерліктің ерен үлгілерін көрсетті. Соғыс талай үйді тұл етті: ана жарынан айырылып жесір қалды, бала әкесіз не анасыз жетім атанды.
Фашистердің тұтқын лагерлерінде ана мен бала айуандықпен өлтірілді. Ал тылда қалған қарттар, аналар, белі бекімеген балалар соғыстың салмағын арқалап, бірде аш, бірде тоқ тынбай еңбек етті. Дегенмен ешкімнің еңсесі түспеді. Отаншылдық сезім, түрлі ұлт өкілдерінің бірлігі мен ерлігі Жеңіс сағатын жақындата түсті.
Би
Тобымыздың өнерлі қыздары мен сері жігіттері би нөмірін ұсынады.
(Би)
Жеңіс туралы жыр
І жүргізуші
Жеңіс деген өтеуі жас ғұмырдың,
Жеңіс деген — бейбіт күнім, бүгінім.
Жеңіс тойын жақындатып әкелген —
Төккен қаны әке-аға, інінің.
ІІ жүргізуші
Жеңіс деген — шат күлкісі баланың,
Тыныштығы жер мен жаһан даланың.
Жеңіс деген — сылдыр күлкі, асқақ ән,
Тыныштығың сол Жеңістен басталған.
Өлең
Ұлы Отан соғысын жырға қосқан ақындардың келесі жыр шумақтарын қабыл алыңыздар.
(Өлең)
Сол күнде бүкіл әлем күлім қақты,
Нұрланып ой, күн, жұлдыз сәуле шашты.
Құс сайрап, жануарлар сайран салып,
Жайқалып өсімдіктер шешек атты.
Жеңдік жауды, алдық кекті,
Мөңкіп тулап басылды апат.
Мең-зең етіп жер мен көкті,
Тынды-ау ақыр бір ғаламат.
Сахналық көрініс және ардагер сөзі
Бүгін сіздердің алдарыңызда сұм соғыстың шағын бір көрінісін сахнада сомдап көрсетеміз. Қабыл алыңыздар!
(Көрініс)
Естелік жыры
Алпыс бес жыл — бейбіт көктем таң атқалы,
Алпыс бес жыл — шуақты күн таратты әнін.
Есімде сонан бері алпыс бес рет,
Ашылды Жеңіс күннің парақтары.
Алпыс бес жыл — үзілмеді құстар әні,
Кетті енді сұм соғыстың қыспағы мәңгі.
Алпыс бес жыл — жауымыздың ажал оғы
Біздің елдің үстімен ұшпағалы.
Ардагерге сөз
Ардагерге сөз беріледі.
Қорытынды: ұмытылмас ерлік, мәңгілік тәуелсіздік
Елімізге лаң салған алапаттың жеңіспен аяқталғанына 65 жыл толды. Ешкім де, ешқашан да ұмытылмайды.
Отанымызды сүйіп, қастерлей білейік. Ата-баба дәстүрін, әдет-ғұрпын берік ұстанып, үлкенге ізетті, кішіге ілтипатты болайық. Оңайлықпен келмеген тәуелсіздігіміздің туы мәңгі желбіресін.
Ел-жұртымыз аман, берекелі заман болсын! Отанын сүйетін азаматтарымыз көбейе берсін!