Қазақша рефераттар

Құлағы екеу

Қарағанды облысы, Сәтбаев қаласы • №19 жалпы орта білім беретін мектебі КММ • Шағын орталық

Тәрбиеші: Оразбаева Ақбаян Мұханбетовна

Тақырып: Күшік

Бұл оқу іс-әрекеті балаларды үй жануарларымен таныстырып, күшікті күту мен қауіпсіз әрекет ету дағдыларын қалыптастыруға бағытталған. Сабақта балалар үлгі бойынша күшік бейнесін аппликация тәсілімен жапсырады, түстер мен көлемді ажыратады, қиылған пішіндерді қағаз бетіне дұрыс орналастырып, желімді таза әрі ұқыпты қолдануды үйренеді.

Мақсаты

  • Тірі табиғат пен қоғамдық өмір арасындағы қарапайым себеп–салдар байланысын түсіндіру.
  • Ересектердің көмегімен жануарға (күшікке) қамқорлық жасай білуге дағдыландыру.
  • Үлгі бойынша күшік бейнесін жапсырмалауды үйрету.
  • Желіммен ұқыпты, таза жұмыс жасауға, бөлшектерді дұрыс орналастырып жапсыруға үйрету.

Көрнекіліктер

  • Күшік суреттері
  • Жұмсақ ойыншықтар
  • Аппликацияға арналған дайын қиылған пішіндер, ақ қағаз, желім, қайшы

Ұйымдастыру кезеңі

Назар аударту

1, 2, 3 — Топтың іші тып-тыныш. Жалқаулықты тастаймыз, Сабақты біз бастаймыз.

«Достық шеңбері»

Біз кішкентай баламыз, Өсіп-өніп толамыз. Тату-тәтті дос болып, Достық шебін құрамыз.

Балалар бір-біріне жылы сөз айтып, өзара достықты бекітеді.

Әңгімелесу: Ит және күшік

Тәрбиеші балалардың кешегі серуенде көргендерін еске түсіріп, тақтадағы суреттерге назар аудартты: «Балалар, не көріп тұрсыңдар?»

Негізгі түсініктер

  • Ит — үй жануары, «жеті қазынаның бірі».
  • Үй иесі сыртқа шыққанда ит үйді күзетеді және шаруашылықта көмектеседі.
  • Итті ренжітуге, ұруға болмайды — ол адамның досы.
  • Иттің баласы — күшік.

Бақылау сұрақтары

  • Ит қалай дыбыстайды?
  • Құлағы нешеу? Аяғы нешеу?
  • Иттер немен ойнағанды ұнатады?
  • Күшік не жегенді ұнатады?

Гигиена ережесі

Итпен немесе күшікпен ойнап, тамақтандырғаннан кейін міндетті түрде қол жуу керек. Қол жумасақ, түрлі ауру жұқтырып алуымыз мүмкін.

Сюжеттік сәт: Адасып қалған күшік

Осы кезде күшіктің қыңсылаған дауысы естіледі. Тәрбиеші балалардың назарын аударып: «Бір дыбыс шыққан сияқты… Ненің дыбысы болды екен?» — дейді.

Балалар кішкентай күшікті көреді. Ол анасынан адасып қалғандай, тоңып тұрғандай әсер қалдырады. Балалар «үрлеп» жылу беріп, күшікті жылытады.

Бақылау

Күшіктің жүні әдемі, түсі — ақ.

Ат қою

Балалар күшікті топқа алып келіп, оған ат қояды: Ақтөс.

Ақтөстің дене мүшелері

Атаулар

  • Басы
  • Көзі
  • Құлағы — екеу
  • Тұмсығы
  • Кеудесі
  • Аяғы — төртеу
  • Құйрығы

Қызықты дерек

Ақтөс еркелегенде құйрығын бұлғайды. Күшік «әу-әу» деп дыбыстайды. Күшік кішкентай кезінде сүтпен қоректенеді, ал өскен соң сүйекті жақсы көреді.

Санату (симметрия)

Күшіктің 2 құлағы, 2 «қолы», 2 «аяғы» — тепе-тең, яғни симметриялы.

Сергіту сәті

Танауы тырналып, ісіпті, Сонда да қуады мысықты. Адамның сенімді серігі — Біл, иттің баласы — күшікті.

Балалар күшіктің қимылын салып көрсетеді.

Шығармашылық жұмыс: Аппликация жасау

Балалар күшік бейнесін үлгі бойынша қағаз бетіне орналастырып, ретімен желімдейді. Жұмыс барысында қауіпсіздік ережелері еске түсіріледі.

Қайшымен жұмыс істеу тәртібі

  1. 1 Қайшыны жолдасыңа үшкір жағын өзіңе қаратып бер.
  2. 2 Қайшының жүзін жабық күйде партаның оң жағына қой.

Желіммен жұмыс істеу тәртібі

  1. 1 Желім құйылған ыдыстың қақпағын мықтап жауып қою керек.
  2. 2 Жұмыс соңында міндетті түрде қолды жуу керек.
  3. 3 Жұмыс кезінде арнайы сүлгі дайындап қойған дұрыс.

Аппликацияны орындау қадамдары

  1. 1 Фонды таңдау.
  2. 2 Күшік бөлшектерін фон бетіне орналастырып көру (ұқсай ма?).
  3. 3 Орнын белгілеп алу.
  4. 4 Әр бөлшекті өз орнына ретімен желімдеу.
  5. 5 Аппликацияны таза қағазбен жабу.
  6. 6 Кепкенше бастырып қою.

Күшіктің бөліктері

Басы, денесі, құлағы, қолы, аяғы, құйрығы.

Ойын: «Көлеңке»

Көлбең-көлбең көлеңкем, Көлбеңдеген көлеңкем. Күшігім қалай жүреді, Кім көрсете біледі?

Көлбең-көлбең көлеңкем, Көлбеңдеген көлеңкем. Күшігім былай жүреді.

Балалар күшіктің жүрісін, қимылын бейнелеп көрсетеді.

Бекіту тапсырмасы

Балалар күшік туралы жаңа мағлұматтарды қорытындылайды: үй жануары нені ұнатады? Суреттегі күшік бейнесінің қасына сүйек суретін желімдеп жапсырады.

Еске сақтау

Күшікпен ойнап болған соң міндетті түрде қолымызды жуамыз.

Қорытындылау

Айналаны қорғаштап: ав, ав, ав, Ұзын тілі салақтап: ав, ав, ав. Қос құлағы салбырап, Достық жайлы ән шырқайды: ав, ав, ав.

Бағалау

Тәрбиеші балалардың жұмысына тоқталып, түстерді ажыратуы мен ұқыптылығын атап өтеді. Әр баланың еңбегі қолдау сөздерімен марапатталады.

Рефлексия

Балалар өз жұмыстарын көрсетіп, «Маған ұнады / келесі жолы бұдан да жақсы жасаймын» деп ой бөліседі.