Әрбір ұлттың баласы өз ұлтыныңарасында өз ұлты үшін қызметқылатын болғандықтан, тәрбием, баланы сол ұлт тәрбиесіментәрбие қылуға міндетті
Ұлт тәрбиесі — ұрпаққа аманат
«Әрбір ұлттың баласы өз ұлтының арасында, өз ұлты үшін қызмет қылатын болғандықтан, тәрбиенің міндеті — баланы сол ұлт тәрбиесімен тәрбиелеу». — М. Жұмабаев
Ата-бабамыз ұрпағына мұра еткен асыл қазынаны ғасырлар бойы жоғалтпай, көшпейтіндей етіп із қалдыруы — көрегендіктің айғағы. Адам баласының өмірінде көрген-білгенін, тоқып-түйгенін қорытып, келешек ұрпаққа мирас етіп қалдыруы — табиғи заңдылық.
Рухани құндылық және адамгершілік өзегі
Адам бойында қалыптасатын имандылық қасиеттерді рухани құндылықтар қатарына жатқызуға болады. Ұлттың рухани тұтастығы — мінез-құлық, ниет, жауапкершілік, үлкенге құрмет, кішіге ізет секілді ұстанымдардың өмір салтына айналуынан көрінеді.
Негізгі түйін
Қазақылық дүниетанымның өзегі — адамшылдық. Ол ұрпақ тәрбиесінде сөзбен ғана емес, өнегелі іс-қимылмен орнығады.
Ұлттық құндылықтар атадан балаға үлкендердің ұлағатты сөздері мен үлгілі іс-әрекеті арқылы беріліп, сезім арқылы жүректен жүрекке жетіп отырған. Сондықтан егемен ел жастарының санасына ұлттық ұлағатты қасиеттерді сіңіру — қоғам үшін аса маңызды міндет.
Тәуелсіздік тұғыры және «Мәңгілік Ел» идеясы
Елбасы Н. Ә. Назарбаевтың «Қазақстан жолы – 2050: бір мақсат, бір мүдде, бір болашақ» атты Жолдауы Қазақстанның 2050 жылға дейінгі даму бағытын айқындаған стратегиялық құжат болды. Онда Тәуелсіз Қазақстанды дамыту, әрбір қазақстандықтың, әр отбасының, жастар мен келешек ұрпақтың мүддесін қорғаудың нақты жолдары ұсынылды.
Ұлттық идеяның өзегі
«Мәңгілік Ел» — жалпы қазақстандық ортақ шаңырағымыздың ұлттық идеясы. Бұл ата-бабаларымыздың сан мың жылдан бергі асыл арманы. Ендеше, Қазақ елінің ұлттық идеясы — Мәңгілік Ел.
Ұстаз шеберлігі және ұлттық мектеп қажеттілігі
Әлеуметтік маңызы зор құндылықтардың мән-мағынасын ұғындыру, оны баланың санасына, сезіміне, түйсігіне, мінез-құлқына әсер ететін деңгейде жеткізу — ұстаздық шеберлікті талап етеді.
Қазіргі қоғамда жетіспей жатқан маңызды бағыттың бірі — қазақы өмір салтына және шығыстық дүниетанымға сүйенген ұлттық мектеп моделін жүйелі қалыптастыру. Мұндай мектептің мақсаты — білім берумен қатар, тұлғаның рухани өзегін бекіту.
Қорытынды: елжанды тұлға тәрбиелеу
Қазақстан Республикасының тәуелсіздігі баянды болуы үшін халық педагогикасынан нәр алған, ұлттық тәрбиені бойына сіңірген, адами құндылықтардың барлық қырын қатар ұстайтын таза елжанды азаматтар қажет.
Тәрбиенің нысаналы нәтижесі
Қазақ елі үшін бар білімі мен қабілетін аямай жұмсайтын, елін және туған жерін қадірлейтін, тілін, халқының салт-дәстүрін, тарихын, дінін, мәдениетін құрметтейтін жеке тұлғаны тәрбиелеу.