Қазақша рефераттар

Геометриялық фигураларды атау

Оқу мақсаттары мен күтілетін нәтижелер

Оқу мақсаты (1.3.1.2)

Жазық фигураларды (үшбұрыш, дөңгелек, шаршы, тіктөртбұрыш) және кеңістік фигураларды (куб, шар, цилиндр, конус, пирамида, тікбұрышты параллелепипед) тану және оларды қоршаған ортадағы заттармен сәйкестендіру.

Сабақ мақсаттары

  • Жазық және кеңістік фигураларды ажыратады.
  • Фигураларды қоршаған ортадағы заттармен салыстырып, сәйкестендіре алады.
  • Жазық геометриялық фигураларды салып үйренеді.

Бағалау критерийлері

Геометриялық фигураларды дұрыс атайды және ажыратады.

Құндылық

Бір-біріне құрмет көрсету мәдениетін қалыптастыру.

Пәнаралық байланыс

Қазақ тілі, өнер. АКТ: интерактивті тақта.

Бастапқы білім

Оқушылар заттарды материалына қарай ажырата алады.

Сабақтың құрылымы

Сабақтың басы (5 минут): таңғы шеңбер

Өсеміз біз күліп-ойнап,
Он саусақтың саласындай.
Өсеміз біз күліп-ойнап,
Бір адамның баласындай.

Балалар, бір-біріміздің қолымыздан ұстап, алақан арқылы жүректің жылуын сезінудің қандай тамаша екенін байқайық. Бұл — ортақ қуаныш пен бірліктің белгісі.

Өткенді қайталау

  1. 1. Өткен сабақта қандай геометриялық фигуралармен таныстық?
  2. 2. Геометриялық фигураларды атап шығу.
  3. 3. Жіптің көмегімен түзу сызық, қисық сызық, кесінді, сынық сызық құрастыру.
  4. 4. Кесінді мен сызықтың айырмашылығын түсіндіру.

Сабақтың мақсаты: жазық геометриялық фигураларды салып үйрену.

Сабақтың ортасы: тәжірибе және тапсырмалар

1) Тәжірибе жасау (топтық жұмыс)

  • Топтарға конус, пирамида, параллелепипед сияқты кеңістік фигуралар беріледі. Оқушылар ақ қағазға олардың табанын сызады.
  • Алынған сызбаны қиып алады.
  • Қиылған жазық фигураны бастапқы кеңістік фигурамен салыстырады.

Бақылау және қорытынды

Оқушылар конустың үстел бетіне толық жата алмайтынын, тек табанымен ғана тірелетінін байқайды. Ал дөңгелек толықтай үстел бетінде жатады. Осы бақылауға сүйеніп, дөңгелек — жазық, ал конус — кеңістік геометриялық фигура екенін қорытындылайды.

Дөңгелекті тағы қандай фигураның көмегімен салуға болатынын талқылаймыз. Оқушылар цилиндр деп айтуы мүмкін: цилиндрдің табанын бастырып сызу арқылы дөңгелек алуға болады. Ал шарды бастырып сызу мүмкін емес, дегенмен ол да кеңістік фигурасына жатады.

2) «Орындап көр»

Оқушылар айналасын зерттеп, пішіні жазық фигураларға ұқсайтын немесе ізі жазық фигураның пішінін елестететін заттарды табады.

Негізгі дағды: сәйкестендіру және дәлелдеу.

3) «Шығарып көр»

Суреттегі заттарды мұқият қарап, олардың жақтары қандай пішін құрайтынын анықтайды. Осылайша оқушылар кеңістік және жазық фигуралар туралы білімін талдап, қолданады.

Негізгі дағды: талдау және қорытынды жасау.

Дәптермен жұмыс

Фигураларды топтастыр

Оқушылар фигуралардың типтерін ажыратып, оларды топтарға бөледі. Әр топты өзіне тән тұйық сызықпен қоршап сызады.

Фигуралар мен заттардың пішіндерін салыстыр

Кеңістіктегі заттың пішіні қай жазық фигураға сәйкес келетінін анықтайды. Сәйкес фигураны заттың түсіне үйлестіріп бояйды.

Қосымша тапсырма

Сіріңке таяқшалары мен ермексазды пайдаланып, жазық фигураларды құрастыру.

Дереккөз

Көкшетау қаласындағы физика-математика бағытындағы Назарбаев Зияткерлік мектебі.

Мұғалім: Сабитова А. С.

Материал тақырыбы: «Жазық геометриялық фигураларды салу».