Нұрға толы бүкіл әлем сіздің жүрегіңізде

Ыңғайланып отырыңыздар, денелеріңізді түзу ұстаңыздар. Аяқ-қолды айқастырмаңыздар. Қолды тізеге немесе үстелге қоюға болады. Көздеріңізді жұмуларыңызды өтінемін.

Елестетіңіз: күн нұры төбеңізден өтіп, кеудеңізге қарай баяу жылжып келеді. Кеудеңіздің орта тұсында гүл түйнегі бар. Ол нұрдың әсерімен жайлап ашылып, балғын әрі таза гүлге айналады. Бұл гүл ойыңызды, сезіміңізді, эмоцияңыз бен тілегіңізді тазалап, жүрегіңізді ашқандай болады.

Нұр сәулесі бүкіл бойыңызға тарасын. Ол біртіндеп күшейеді. Оймен нұрды қолдарыңызға бағыттаңыз: қолдарыңыз нұрға бөленіп, сәуле шашсын. Қолымыз тек жақсы, ізгі істер жасасын және баршаға көмектессін.

Нұр аяқтарыңызға тарасын: аяқтарыңыз сәуле шашып, сізді тек жақсылық жасауға жетелейтін жерлерге апарсын. Олар нұр мен махаббаттың құралына айналсын.

Нұр аузыңызға, тіліңізге тарасын: тіліңіз тек шындықты, жақсы әрі ізгі сөздерді айтсын.

Нұрды құлақтарыңызға бағыттаңыз: құлағыңыз тек жақсы сөзді, әсем әуенді ғана естісін. Нұр көздеріңізге де жетсін: көзіңіз тек жақсыны көріп, әр нәрседен жақсылықты байқай алсын.

Басыңыз түгел нұрға бөленсін: санаңызға тек ізгі, сәулелі ой келсін. Нұр күшейіп, бойыңыздан асып, айналаңызға сәуле шашсын.

Осы нұрды туыстарыңызға, мұғалімдеріңізге, достарыңызға, таныстарыңызға бағыттаңыз. Уақытша түсініспей, ренжісіп жүрген адамдарға да нұр жолдаңыз: олардың жүрегі де нұрға толсын.

Нұр бүкіл әлемге тарасын: кең байтақ туған елімізге, барлық адамдарға, жан-жануарларға, өсімдіктерге, барлық тіршілікке жетсін. Ғаламның түкпір-түкпіріне нұр бағыттаңыз.

Осы нұр, махаббат және тыныштық күйінде біраз отырыңыз. Енді нұрды жүрегіңізге орналастырыңыз: нұрға толы әлем жүрегіңізде. Осы әсем қалыпты сақтаңыз. Жаймен көзіңізді ашуға болады. Рахмет.

Ертеректе қариялар ес біле бастаған немерелеріне аңыз-әңгімелер мен ертегілер айтып беретін. Бір күні бір қария немересін жанына отырғызып: «Балам, саған өмір туралы бір аңыз айтып берейін», — дейді.

«Адам бойында екі қасқыр болады. Бірі — қызғаныш пен көреалмаушылық, екіншісі — сабырлылық пен ұстамдылық. Олар өмір бойы бір-бірімен арпалысады», — дейді.

Немересі: «Ата, сонда қай қасқыр жеңеді?» — деп сұрайды. Атасы сәл ойланып, сақалын сипап: «Қайсысын көбірек қоректендірсең — сол жеңеді», — деп жауап береді.