Қазақша рефераттар

Оқушыларды жолда жүру ережесімен таныстыру

Қызылорда облысы, Қазалы ауданы, Қазалы ауылы, №100 орта мектебі

Бастауыш сынып мұғалімі: Бердешева Жадыра

Сабақтың тақырыбы

Жолда жүру ережесін білесің бе?

Көрнекілігі

Бағдаршам, жол белгілері салынған суреттер, интерактивті тақта, жол ережесіне арналған кітаптар.

Сабақтың мақсаты

  • Оқушыларды жолда жүру ережелерімен таныстыру.

  • Жол қауіпсіздігін есте сақтауға баулу, жол белгілерінің мәнін меңгерту.

  • Көшеде дұрыс жүріп-тұруға, жол ережесін сақтауға тәрбиелеу.

Сабақтың барысы

I. Ұйымдастыру кезеңі (кіріспе)

Бүгін біз «Жол травматизмінің алдын алу» тақырыбындағы тәрбие сағатын бастаймыз. Жол заңы әркімнен тәртіп пен сақтықты талап етеді. Жол тәртібін бұзу — қауіпті жағдайға әкеледі.

Көбіне жолдағы келеңсіз оқиғалар балалардың жол бойында бейберекет жүруі, доп қууы, шаңғы тебуі, жүріп бара жатқан көлікке жармасуы немесе қалтарыстан кенет жолға шыға келуі салдарынан болады. Мұндай әрекеттердің соңы кейде ауыр жарақатқа, тіпті қайғылы жағдайға ұласуы мүмкін.

Сондықтан әрбір оқушы мектепте оқытылатын «Жолда жүру ережесі» тақырыбын мұқият тыңдап, әр сабақтан қорытынды жасап отыруы тиіс. Үлгілі, тәртіпті оқушы көшеде де, жолда да ережені бұзбайды.

Сұрақ:

Қандай бала жол ережесін бұзбайды?

Жауап: Үлгілі, тәртіпті бала.

Ендеше «Жолда жүру ережесін сақтаймыз!» атты тәрбие сағатымыз ашық деп жарияланады.

II. Негізгі бөлім

Жұмбақтар

  1. Ала таяқ ұстаған, жол тәртібін нұсқаған.
    Өміріңді күзеткен, ысқырықпен түзеткен.
    Жауабы: милиционер
  2. Көше бойлап аяңдайды, адам тасып аялдайды.
    Жауабы: автобус
  3. Көліктің қаншасын үстінен өткізген,
    Іргеден басталып, алысқа жеткізген.
    Жауабы: жол
  4. Жоқ өзінде бас та, ауыз да, құлақ та,
    Бақырайған үш көзі бар бірақ та.
    Жауабы: бағдаршам
  5. Арқаным бар тым ұзын, ала алмайсың бір үзім.
    Табыңдаршы, балалар, бұл жұмбақтың шешуін.
    Жауабы: жол
  6. Өзі сөйлей білмейді, бірақ «Тоқта!» «Жүр!» дейді.
    Жауабы: бағдаршам

Мұғалімнің түсіндірмесі

Бағдаршам — қауіпсіздігімізді қамтамасыз ететін маңызды көмекші. Оның белгілерін дұрыс түсініп, күнделікті өмірде қолдана білу баршамызға қажет. Елді мекендерде ортақ көше қатынасы ережелері енгізілген, оны оқушылар да, ересектер де, жүргізушілер де міндетті түрде орындауы керек.

Сұрақ

Жиек жол деген не?

Жауап

Адамдар жаяу жүретін, көшенің жиегіндегі тар жол.

Сұрақ

Жаяу адамға қай жермен жүруге болмайды?

Жауап

Көлік жүретін жолдың ортасымен жүруге болмайды.

Бағдаршам ережелері

Қызыл

Тоқта!

Сары

Сақтан!

Жасыл

Жол ашық!

Қызыл көзін ашқанда,
Сынық сүйем баспа алға.
Сары көзін ашқанда,
Қарап қалма аспанға!
Жасыл көзін ашқанда,
Өте бергін, жасқанба!

Оқушылар бағдаршам сигналдарын қолдарына ұстап, кезегі келгенде көрсетеді.

Ән: «Бағдаршам»

1) Көшеде біз сақ болайық,
Қаймықпасын ата-ана.
Жолда сен бол лайық,
Жас ұлан деген атқа.

Қайырмасы:
Әрқашан күн сөнбесін,
Аспаннан бұлт төнбесін.
Қасымда болсын анам,
Болайын мен де аман!

2) Жолда жүру әліппесін
Білген жөн бес саусақтай.
Сонда ғана жүре аласың,
Өзіңді сау сақтап.

Назар аударайық

Көкпеңбек ісінген бас-көзің неге керек?

Бұл жол ережесін сақтамаудың салдары ауыр екенін еске салатын ой тастау сұрағы.

Қорытынды

Бүгінгі сабақты қорытындылай келе, «Жас дәуірдің балалары» әнін орындайық. Деніміз сау, еліміз тыныш болсын. Жол тәртібін сақтап, әрдайым аман-есен жүрейік.

Есте сақтайық

  • Жаяу жүргінші тек қауіпсіз жерден өтеді.
  • Бағдаршам сигналдарын қатаң сақтайды.
  • Жол — ойын алаңы емес.