Торт медовик
Үй рецепті
Медовик — бал қосылған торт
Бұл медовиктің ерекшелігі — қамыры міндетті түрде қоймалжың болуы керек. Дұрыс дайындалса, жұқа шелпектер жұмсақ болып піседі, ал қаймақты крем тортты нәзік әрі шырынды етеді.
Пеш температурасы: 180°C. Әр шелпек шамамен 7–10 минут піседі. Бұл мөлшерден 4–5 шелпек шығады.
Қамыр құрамы
- Ұн 400 г
- Бал (мёд) 500 г
- Сары май (сливочное масло) 125 г
- Жұмыртқа 3 дана
- Көпсіткіш (разрыхлитель) 10 г
- Ванильді қант 10 г
- Лимон қабығының үгіндісі 1 шай қасық
Қамырды дайындау
-
1) Құрғақ қоспаны дайындау
Ұнды електен өткізіп, көпсіткішпен жақсылап араластырыңыз.
-
2) Жұмыртқаны бөлу
3 жұмыртқаның ағы мен сарысын бөлек ыдыстарға бөліп алыңыз.
-
3) Бал қоспасын дайындау
Балды ыдысымен бірге ыстық су буына қойып ерітіңіз. Үстіне 125 г сары май қосып, толық ерігенше араластырыңыз. Содан кейін жұмыртқаның сарысын және лимон үгіндісін қосып, тағы араластырыңыз.
-
4) Ақуызды көпірту
Жұмыртқаның ағын миксермен көпіршік болғанша шайқаңыз. Шайқау барысында ванильді қантты қосыңыз.
-
5) Қоймалжың қамыр илеу
Електен өткізілген ұн қоспасына балдан дайындалған қоймалжыңды және көпіртілген ақуызды қосып, біркелкі масса болғанша араластырыңыз. Қамыр сұйықтау, қоймалжың болып шығуы тиіс.
-
6) Шелпек пісіру
Табаның ішіне арнайы қағаз төсеп, жеңіл майлап алыңыз. Қамырды құйып, бетін тегістеңіз. Алдын ала қыздырылған пеште 180°C температурада 7–10 минут пісіріңіз.
Осы мөлшерден 4–5 шелпек шығады. Піскен шелпектерді 2–3 сағат суытып алыңыз.
Крем құрамы
- Қаймақ (майлылығы 30%) 1 кг
- Шекер 400 г
- Ванильді қант 10 г
Кремді дайындау
Қаймақ, шекер және ванильді қантты бір ыдысқа салып, миксермен біркелкі болғанша жақсылап араластырыңыз.
Тортты жинау
-
1
Дайын шелпектерді қалаған пішінде қиып дайындаңыз.
-
2
Әр шелпектің арасына кремді қалыңдап жағып, шелпектерді қабаттап жинаңыз.
-
3
Үстіне және жанына үгінділерді себіңіз.
Дайындаған: Жадыра