Қос құбыр

Жұмбақтар — адамның сәні, онсыз жоқ мәні.

Жауабы: Киім

Дорбаға тығып бас бағын, байлай салдым қос жағын.

Жауабы: Тымақ

Қыста шығарда тысқа: құлағы салпақ, құйрығы жалпақ, төбесі жайпақ, түкті маңдайы тайпақ, іші мамық байпақ. Қара орманды қаптадым, сөйтіп жан сақтадым.

Жауабы: Тымақ

Ортасы күмбез, жиегін көмкерген. Етегі желкендей — киім еді ол нендей?

Жауабы: Кимешек

Әкем ақ тауын ақ шарбымен орады.

Жауабы: Сәлде

Әшекейлі күбіні, үйілі тұрған шөмеле, кигіздім биік төбеге.

Жауабы: Сәукеле

Сырт жағына зер жіппен көз тартатын көрікпен, ою-өрнек бастырған. Шалқасынан тастаған кәдімгі сырлы тостаған. Қойсаң егер төңкеріп, төңірегін көмкеріп — тостағандай бос тұрған. Киіз үйден аумайды, басқұрмен бастырған.

Жауабы: Тақия

Іші — егіс, сырты — тегіс.

Жауабы: Тон

Аузы бір — қос құбыр.

Жауабы: Шалбар

Ерте тұрдым да қос жолға түстім.

Жауабы: Шалбар

Қолы бар, саусағы жоқ. Мойны бар, басы жоқ.

Жауабы: Көйлек

Қандай байлық ішінде барын өзім білетін: қоймалар көп үстімде, көшіп бірге жүретін.

Жауабы: Жаңқалталар

Киімдегі қуыс — ұсақ-түйекке ыдыс.

Жауабы: Қалта

Күндіз таяғымды қаптаймын, түнде босағаға тастаймын.

Жауабы: Аяқ киім

Күні бойы жүргізеді, үйге де кіргізеді. Бірақ өзі ізетті: босағада қалып, шығуымды күтеді.

Жауабы: Аяқ киім

Бес айналы туыс, тапқаны бір қуыс.

Жауабы: Тырнақ пен етік

Судан ғайып, әжемде бар қос қайық.

Жауабы: Кебіс

Қаз-қарта тесігі бар, қақпақсыз есігі бар. Көмейінде тілі бар, аузын буар жібі бар. Кеме сынды пішімі — білсең айтшы, осы не?

Жауабы: Бәтеңке

Есігі біреу, бөлмесі бесеу.

Жауабы: Қолқап

Аузы біреу, бес құдық. Қысты күні бойлатам, бесеуіне бес құрық.

Жауабы: Қолқап

Ағайынды бес туыс, жамылатын тоны бір. Бесеуінде бес қуыс, сырттан кірер жолы бір.

Жауабы: Қолқап

Іші мата, тысы мата, арасы мақта. Төрт бұрышты қабылған — бұл не, жатарда табылған?

Жауабы: Көрпе

Жайсаң — түңлік, жисаң — діңгек.

Жауабы: Қолшатыр

Дөңгелек өзі, төртеу көзі. Ұстайды мықтап, тұрғанды сырттап.

Жауабы: Түйме