Тәуелсіздік - қазақ халқының сан ғасырлық асыл арманы
Сабақтың тақырыбы
Менің Тәуелсіз Қазақстаным!
Сабақтың мақсаты
- Оқушылардың Қазақстан туралы білімдерін кеңейту.
- Отанды сүюге, ел байлығын қорғауға, елжандылыққа және жауапкершілікке тәрбиелеу.
- Өнерге қызығушылықты дамытып, патриоттық сезімді ояту.
- Ел тарихын тануға баулу, туған жерін сүйетін, намысшыл, адамгершілігі мол азамат тәрбиелеу.
Сабақ барысы
Қазақстан Республикасының мемлекеттік әнұраны орындалады.
Тәуелсіздік туралы ой
1986 жылғы 16 желтоқсан қазақ жастарының ұлттық оянуы мен серпілісінің нышанына айналды. Тәуелсіз ел болу — кеудеңді кере тыныстап, еңсеңді көтеру; атадан балаға мұра болып келе жатқан салт-дәстүр мен әдет-ғұрыпты айқын танытып, өзіңнің өзгелермен тең екеніңді сезіну; әрі ана тіліңде емін-еркін сөйлеу.
Тәуелсіздік
Мағынасы зор, тамыры терең ұғым.
Азаттық
Ғасырлар бойы аңсаған қасиетті арман.
Бостандық
Ел рухын көтеретін қастерлі құндылық.
Қазақ баласы үшін бұл сөздерден асқан қастерлі ұғым жоқ. Халқымыз азаттықты ғасырлар бойы аңсады, сол асыл мұратқа жету жолында күресіп, қан төкті. Кенесары мен Наурызбай, Исатай мен Махамбет сынды ерлердің, Қайрат пен Ләззаттай қайсар жастардың ерлігі — ұлт жадындағы мәңгілік өнеге.
Тарихқа көз жүгірту
1991 жылғы желтоқсанда Қазақстан Республикасы тәуелсіздігін жариялап, тас бұғаудан босап, қайта түлеген ел ретінде төрткүл дүниеге танылды. Төл тарихымыздың жаңа кезеңі — жаңғыру дәуірі басталды. Бұл үлкен көштің басында еліміздің тұңғыш Президенті Нұрсұлтан Әбішұлы Назарбаев тұрды.
Елорда және ел рәміздері
Бүгінде Тәуелсіз Қазақстанның жүрегі — Арқа төсіндегі ару қала, Елордамыз Астанада соғады. Ақорданың төбесінде қасиетті көк байрақ желбірейді.
Маңызды белестер
Біз қандай елміз?
Дербес, азат елміз.
Мемлекетіміздің Елтаңбасы, Туы, Әнұраны, Астанасы, Ата Заңы, мемлекеттік шекарасы және мемлекеттік тілі бар. Бұл — еліміз үшін үлкен бедел мен жоғары деңгейдің белгісі. Бұл — Тәуелсіздік дәуірі.
Ұлттық сана
Тәуелсіздік ұлттық сананы оятты, баршаны ата-баба жолына үңілдірді.
Халық мұрасы
Ата-баба ерлігі — халық мұрасы, тарихтың мақтанышы.
1986 жылғы Желтоқсан: отты оқиға
1986 жылғы Желтоқсан оқиғасы тәуелсіздікті аңсаған жастардың ұлттық намысын дүниежүзіне танытты. Бұл оқиғаның құрбандары болған Қайрат Рысқұлбековтің, Ләззат Асанованың, Сәбира Мұхамеджанованың, Ербол Сыпатаевтың ерлігі ел жадында мәңгі сақталады.
Өлең жолдары
Өсер ұлдың қай сәтте де бірлік болмақ қалауы,
Лаула, лаула — желтоқсанда мұзға жаққан алауы.
Өздеріңдей өр намысты жас өркені бар елдің
Ешқашанда еңкеюге тиіс емес жалауы.
Тәуелсіздік құрбандарын 1 минут үнсіздікпен еске алу.
Тәуелсіздік — ең қымбат құндылық
Н. Ә. Назарбаевтың пікірі
«Біз тәуелсіздікті аңсап, зарығып жеттік. Енді сол тәуелсіздіктің белгілерін ерекше қадірлеуіміз керек. Әрбір азамат Қазақстанның туын, елтаңбасын, әнұранын тұмардай қасиет тұтуы қажет. Елдігіміздің сыналатын тұсы — осы».
Бізді, жерімізді, елімізді бақытты еткен — Тәуелсіздік. Бабаларымыз сонау сақ заманынан бастап азаттық үшін арпалысты. Бүгін сол сан ғасырлық арман орындалды.
Сағынғали Сейітовтің толғауы
Үзінді
Тәуелсіздік тізгіні берік қолда,
Таңғажайып атың да дәл табылды.
Табылды да талай жұртқа танылды,
Қазақ елі, көкке жетті көк туың.
Сен — Тәуелсіз мемлекетсің кәдімгі,
Егеменді елім менің — ең қымбат қазынам!
Егеменді еліміз тәуелсіздік алған жылдар ішінде талай биік асуларды бағындырды. Тәуелсіз Қазақстанымыздың ғұмыры ұзақ, тұғыры биік болсын!
Тәуелсіздік мерекесі құтты болсын!
«Атамекен» әні оқушылардың орындауында шырқалады.