Қазақша рефераттар

Балаларды шапшаңдыққа баулу

Мақсаты

Білімділік

  • Салауатты өмір салтын қалыптастыру және балалардың денсаулығын нығайту.
  • Хатха-йога элементтері арқылы дене түзулігін, икемділікті және ой-өрісті дамыту.
  • Алға домалауды үйрету және нысананы дәл көздеуге баулу.

Дамытушылық

  • Шапшаңдық, ептілік, ұйымшылдық және тапсырманы нақты орындау дағдыларын дамыту.
  • Қимыл-қозғалыс тәжірибесін кеңейту.
  • Өмірлік маңызы бар жүріс дағдылары мен біліктерін жетілдіру.

Тәрбиелік

  • Спорттың адам өміріндегі маңызын түсіндіру.
  • Достыққа, өзара қолдауға тәрбиелеу.

Әдіс-тәсілдер

Түсіндіру, көрсету, ойын.

Құрал-жабдықтар

АКТ, балалар санына қарай кілемшелер, матрас, боулинг құралдары, ойын атрибуттары.

Сабақтың құрылымы

1) Мотивациялық-қозғаушылық кезең

Мақсат қою және сапқа тұрғызу

Нұсқаушының іс-әрекеті

  • Жаттығу мен белсенді іс-әрекет үшін спорт залына баруды ұсынады.
  • Балаларды бір-бірден сапқа тұрғызады, жүру тәртібін түсіндіреді.
  • Сәлемдесіп, белгі бойынша әртүрлі жүріс түрлерін орындатуға бағыт береді.

Балалардың іс-әрекеті

  • Спорттық киімге, тапсырмалар мен ойындарға қызығушылық танытады.
  • Спортша амандасады: «Физкульт-сәлем!»
  • Сапта маршпен жүреді, белгіге сай жүріс түрлерін ауыстырады.

2) Ізденуші-ұйымдастырушылық кезең

«Ғажайып сәт»

Нұсқаушы балаларға балабақшаға келе жатып әдемі қорапша тапқанын айтады. Қорапшаның ішінде балалардың жаттығу жасап жатқан суреттері бар екенін көрсетіп, сұрақ-жауап арқылы тақырыпқа жетелейді: «Бұлар кімдер? Суретте не істеп жатыр?»

Қорытынды: бүгін балалар жаңа жаттығулармен танысып, оларды бірге орындайды.

Жалпы дамыту жаттығулары (хатха-йога элементтері)

Асана жаттығулары нұсқаушының көрсетуі бойынша, қауіпсіздік ережелерін сақтай отырып орындалады. Омыртқаны тік ұстау, тынысты бақылау және денені бос ұстау ескертіледі.

I. Отыру қалпы және аяқтарды алмастыру

  1. 1. Оң аяқты артқа бүгіп, табанды бөксе бойымен орналастырамыз; сол аяқты дененің алдына бүгіп қоямыз. Қолды тізеге қоямыз, бас бармақ пен сұқ саусақты түйістіреміз. Омыртқа мен басты тік ұстаймыз.
  2. 2. Алдыңғы қалыпты сақтап, оң және сол аяқтың қалпын ауыстырамыз.
  3. 3. Оң аяқты шапқа қарай бүгеміз, кейін сол аяқты қасына қоямыз. Екі аяқты да демалыс күйінде ұстауға тырысамыз.

II. Алға еңкею және созылу

  1. 1. Алдыңғы қалыптан сол аяқты алға созамыз. Сол аяқ табанын бас бармақ пен сұқ саусақпен ұстап, басты тізеге жақындатамыз, денені босаңсытамыз.
  2. 2. Жаттығуды аяқтарды алмастырып (оң/сол) қайталаймыз. Денені босаң ұстап, қозғалысты бақылап орындаймыз.
  3. 3. Екі аяқты алға созып, бақайларды бас бармақ және сұқ саусақпен ұстаймыз. Басты тізеге жақындатамыз, тізені түзу ұстаймыз.

III. Етпетпен жату және арқа бұлшықеттерін белсендіру

  1. 1. Етпетімізден жатамыз. Қолды екі жаққа қойып, алақанды еденге тигіземіз. Бұлшықеттерді босатып, өзімізді теңізде жүзіп келе жатқандай елестетеміз.
  2. 2. Етпетімізден жатып, кеуде мен аяқты жоғары көтереміз.
  3. 3. Бір тізеге тіреліп, кеуде мен бір аяқты жоғары көтеру арқылы тепе-теңдікті сақтаймыз.

IV. Демалыс қалпы (еңкею)

  1. 1. Жартылай бүгіліп, басты тізеге жақындатып тұрамыз.
  2. 2. Тізеге түрегелеп отырып, маңдайды еденге тигіземіз.
  3. 3. Тізерлеп отырып, маңдайды еденге тигіземіз. Қолды екі жанына, маңдай тұсына қоямыз.

V. Бұралу және «көбелек» қалпы

  1. 1. I бөлімдегідей отырып, алға еңкейіп, басты алақанға тигіземіз.
  2. 2. Сол жамбасқа отырып, оң аяқты сол аяқтың тізесіне қоямыз. Сол қолды оң тізенің астынан өткізіп, оң қолды артқа жіберіп, екі қолды қосамыз. Омыртқаны мүмкіндігінше тік ұстаймыз.
  3. 3. Табандарды бір-біріне тигізіп, қолмен ұстаймыз. Тізені еденге қарай түсіреміз.

VI. Тыныс алу және зейін

I бөлімдегідей отырып, қолды біріктіріп «үшбұрыш» жасаймыз. Лотос элементін орындап, оң жақтан тыныс алып, сол жақтан тыныс шығарамыз (нұсқаушының бақылауымен).

Негізгі қимыл-қозғалыстар

  1. 1. Алға домалауды бекіту.
  2. 2. Нысанаға дәл көздеуді үйрету.

Тапсырмалар: боулинг ойыны арқылы дәлдікке жаттықтыру. Балалар жаттығуларды нұсқаушының көрсетуімен орындайды.

Қимылдық ойын: «Шортандар мен табандар»

Шарты: «Қатты ағыс» келгенде шортандар шығады. Сол сәтте табандар «тастың артына» тығылып үлгеруі керек. Мақсат — балаларды шапшаңдыққа, тез бағдарлануға баулу.

3) Рефлексиялық-түзетушілік кезең

Денсаулық технологиясы: релаксация

«Қане, әуе шары болайық». Шар — сендердің іштерің. Қолды ішке қойып, мұрынмен тыныс алып «шарды үрлейміз», ауызбен тыныс шығарып «желін шығарамыз». Көзді жұмып, түнгі аспанды елестетеміз: жарық ай, көп жұлдыз. Жұлдыздар жанып, жарқырап, кейде ағып түсіп жоғалады. Таң атады, күн шығады — біз де оянамыз.

Соңында нұсқаушы балаларға «Аспан ата» сыйлаған жарқыраған жұлдызшаларды береді және оның мәнін түсіндіреді.

Қорытынды

  • Нұсқаушы балалардың белсенділігін атап өтіп, көңіл-күйлерін көтеріп, мадақтайды.
  • Балалардан сабақта не көбірек ұнағанын сұрайды.
  • Балалар қоштасады: «Физкульт-сау бол!»

Күтілетін нәтиже

Біледі

  • Сапқа тұруды.
  • Жүрістің әртүрлі түрлерін.
  • Баяу жүруді жүгірумен алмастыруды.

Меңгереді

  • Алға қарай домалауда тепе-теңдікті сақтауды.
  • Нысанаға дәл көздеуді.
  • Хатха-йога элементтерін.

Жасай алады

  • Сапқа тұруды және саптық тәртіпті сақтауды.
  • Ойын шарттарын орындауды.