Қалғу - менің тұлпары, ұйқы менің желмаям
Б. Момышұлы — дана да дара тұлға
Елдік пен ерліктің киесіндей, батырлық пен батылдықтың иесіндей, асылдық пен жасындықтың үлгісіндей аты аңызға айналған баһадүр батыр — Бауыржан Момышұлы. Оның өмір жолы, сұрапыл соғыс жылдарындағы жанқиярлық ерлігі, өжеттігі мен өрлігі, алғырлығы мен көрегендігі — біле білген жанға ұлы тәрбие, үлкен өнеге мектебі.
Батыр Бауыржан Момышұлы — алмас қылыштай өткір де қайсар, дана да данышпан, шешен әрі ақын. Ол сөз қадірін өз қадірімен тең көріп, «өз қадірі — ел қадірі» деп бағалаған айбынды азамат. Дара тұлғаның ғибратқа толы ғұмыры, жүріс-тұрысы, сөйлеген сөзі мен терең мағыналы ойлары көптің көкейінде.
Ой мен уақыт туралы толғаныс
«Қарттықтың екі елі ажырамайтын бір тірлігі — ой… Ой үстінде қалғып-мүлгу. Қалғу — менің тұлпарым, ұйқы — менің желмаям. Көзім ілініп кетсе, жаһан кезіп серуендеп, шаршағанымды оянғанда бір-ақ сезем. Алайда қайда қашып құтыласың… Тәтті дәмің таусылмай, көз жұмбайсың. Бірақ көп жасап, қатарымнан айрылып, жетім болғым келмейді. Өзімнен кішілерге топырақ салғыза көрме, тағдырым…»
Қайсарлық пен мейірімнің өлшемі
«Әдіссіздік — әлсіздік, ептілік те — ерлік.
Маған деген атақты міндет етсең, өзің ал.
Әділдікке бас ұрып, у берсең де маған — бал.
Қатал болар мезгілде, шатырлаған жайдай бол,
Мейірім түсер мезгілде, ағарып атқан таңдай бол.»
— З. Ахметова
Б. Момышұлы — адамгершіліктің, азаматтықтың, патриоттықтың, имандылықтың символы іспетті көркем бейне. Батыр атамыздың ойшылдығы, отаншылдығы, ұлтжандылығы, қаһармандығы, дарындылығы және жоғары адамгершілік қасиеттері — оны ел жадында айрықша тұлға ретінде орнықтырды.
Баукең — өз халқының ғана емес, әлем жұртына ортақ перзент дәрежесіне дейін көтерілген азамат.