Қазақша рефераттар

Сабақ әңгімеден бастау

Сабақ туралы мәлімет

Пәні
Әліппе
Пән мұғалімі
Жаназилова Айнагүл
Сабақтың тақырыбы
«М» дыбысы мен әрпі
Сабақтың мақсаты
«М» дыбысын сөз ішінде дұрыс оқуға жаттықтыру; мақал-мәтел айтуға, оның мазмұнын ашып түсіндіруге үйрету; «қандай?» сұрағына дұрыс жауап беруді қалыптастыру; адамгершілік тәрбие беру.

Көрнекіліктер

  • Кеспе әріптер
  • Мысық, моншақ, мата, мотоцикл суреттері
  • Слайдтар мен флипчарттар
  • «Мата фабрикасы» туралы бейнеролик

Оқыту әдістері

  • Көрнекілік
  • Түсіндіру
  • Сұрақ-жауап
  • Талдау–жинақтау
  • Әңгімелеу

Пәнаралық байланыс

Еңбекке баулу: мамандық иелерінің еңбегін бағалау, құрметтеу, қарым-қатынас мәдениетін қалыптастыру.

Сабақтың барысы

I. Сабақты әңгімеден бастау

Тыңдалым, дыбысты ажырату

Мұғалім балаларға Мараттың иті мен мысығы туралы қысқа әңгіме айтады. Әңгімелеу кезінде «м» дыбысын созып айтып, оқушылардың дыбысқа мән беруіне жағдай жасайды.

Әңгімеден үзінді (диалог)

Ит: «Әуп-әуп! Сен үйде не істейсің?»

Мысық: «Мияу, мияу! Мен тышқан аулаймын.»

Ит: «Қалай аулайсың?»

Мысық: «Тышқандар індерінен шығып ойнай бастайды. Мен ақырын, еппен, дыбысымды шығармай жақындаймын да, бір-ақ секіріп бас саламын.»

Мысық: «Мияу, мияу! Марат менімен дос. Біз үнемі ойнаймыз. Кел, екеуміз де дос болайық!»

Ит: «Әуп-әуп! Жарайды.»

Сұрақ

«Мараттың мысығы қандай дыбыс шығарады?»

Балалар кезекпен «мияу» деп жауап береді. Осы сәтте мұғалім «м» дыбысының таңбасын көрсетіп, жаңа әріппен таныстырады.

Оқулықпен жұмыс

Оқулықтың 40-бетіндегі «моншақ», «мысық», «мотоцикл» сөздерімен жұмыс жүргізіледі: буындар мен сөздер баған түрінде оқылып, бірге қайталанады.

II. Жазу жұмысы (дәптер)

Қол жаттықтыру, әріпті дұрыс жазу

Жазу дәптерінің 37-бетінде «м» әрпінің баспа және жазба түрлері таныстырылады. Оның дауыссыз дыбыс екені анықталады.

Оқушылар үлгі бойынша «м» әрпін және «мал», «мол» сөздерін көркем етіп жазады.

Сергіту сәті

Кәне, қанат қағайық,
Қарлығаш болып ұшайық.
Ұшып-ұшып алайық,
Қайта отырып жазайық.

III. Мәтінмен жұмыс және талдау

Оқылым, түсіну, талдау–жинақтау

Оқулықтағы мазмұнды сурет бойынша әңгіме құрастырылады. Кейін берілген шағын мәтін әртүрлі оқу тәсілдерімен оқылып, талдау–жинақтау әдісі бойынша қарастырылады.

Бағыттаушы сұрақтар

  • Алғашқы сөйлемде неше сөз бар?
  • Мәтінде қандай балалардың аты аталған?
  • Марат не алды?
  • Алмат не алды?

IV. «Мата фабрикасы» тақырыбы арқылы әңгіме

Тіл дамыту, еңбекке баулу

Оқулықтың 41-бетіндегі суреттерге сүйене отырып, әңгіме жүргізіледі. «Көйлек қайдан келді?» сұрағына жауап іздеу барысында оқушылар өз пікірлерін ортаға салады.

Одан кейін «Мата фабрикасы» туралы бейнеролик көрсетіліп, көргендері негізінде ортақ мазмұндағы әңгіме құралады.

Талқылауға арналған сұрақтар

  • Мата қалай жасалады?
  • Фабрикада жұмыс қалай ұйымдастырылады?
  • Маталарға өрнектер қалай салынады?

Әңгіме барысында еңбек адамын құрметтеу, мамандардың еңбегін бағалау және қарым-қатынас мәдениетін қалыптастыруға мән беріледі.

Сергіту сәті (қайталату)

Кәне, қанат қағайық,
Қарлығаш болып ұшайық.
Ұшып-ұшып алайық,
Қайта отырып жазайық.

V. Бас әріпті жазу және дыбыстық талдау

Көркем жазу, дыбыстық талдау

Жазу дәптерінің 38-бетінде «М» дыбысының бас әрпін жазу жұмысы жүргізіледі. Үлгі бойынша көркем жазу жаттығулары орындалады.

Мұғалім оқушыларға «мата» сөзіне дыбыстық талдау жасатады және сөзді көркем етіп көшіртеді.

Сол сөзді пайдаланып, оқушылар сөйлем құрап, сөйлем ішінде дұрыс жазуға жаттығады.

VI. Қорытынды оқу тапсырмалары

Буындық және дыбыстық талдау

Оқулықтың 41-бетіндегі баған түрінде берілген сөздерге буындық және дыбыстық талдау жасалып, олардың жазылуына назар аударылады. Кісі аттарын дәптердегі бос жолдарға жаздыруға болады.

Қайталау сұрағы

Бүгін біз қандай әріппен таныстық?

Сабақ әріптерге байланысты ойын түрлерінің бірімен аяқталады.

VII. Сабақты бекіту және бағалау

Өтілген материал бойынша қысқа қорытынды жасалып, «м» дыбысы кездесетін сөздерді атап айту, буындап оқу, дұрыс дыбыстау дағдылары бекітіледі.

Оқушылардың оқу, жазу, талдау жұмыстары ескеріліп, нәтижесі бойынша бағалау жүргізіледі.