Қазақша рефераттар

Сызықтық алгоритмді программалау

Сабақ туралы мәлімет

Өңір / Қала
Жамбыл облысы, Тараз қаласы
Білім беру ұйымы
№39 мектеп-гимназия
Пән / Сынып
Информатика, 7-сынып
Мұғалім
Кадырова Светлана Сабитқызы
Сабақтың тақырыбы
Сызықтық алгоритмді программалау

Сабақтың мақсаты

Білімділік

Сызықтық бағдарламаның құрылымымен таныстыру; өткен тақырыптарды қайталау арқылы сызықтық алгоритмді, блок-сызбасын және программасын құру дағдыларын қалыптастыру.

Дамытушылық

Есте сақтау қабілетін дамыту; теориялық білімді практикамен ұштастыра білуге үйрету.

Тәрбиелік

Пәнге қызығушылықты арттыру; әр оқушының алғырлық және зеректік қасиеттерінің дамуына жағдай жасау.

Қолданылатын құралдар

  • Интерактивті тақта
  • Таратпа қағаздар
  • Слайдтар

Сабақ форматы

Типі
Дамытушылық
Түрі
Аралас сабақ
Әдісі
Практикум, сұрақ-жауап, тест, қосымша тапсырмалар

Сабақтың құрылымы

  1. I

    Ұйымдастыру кезеңі

    Құрал-жабдықтарды және оқушылардың сабаққа дайындығын тексеру; тақырып пен мақсатты хабарлау.

  2. II

    Үй тапсырмасын сұрау

    Өткен материалды сұрақтар арқылы қайталау және бекіту.

  3. III

    Жаңа тақырыпты түсіндіру

    Сызықтық алгоритмнің мәні және Паскаль тіліндегі сызықтық программаның құрылымы.

  4. IV

    Практикалық жұмыс

    Деңгейлік тапсырмалар арқылы формулаларды Паскаль тілімен жазу және есептер шығару.

  5. V

    Сабақты бекіту

    Ойға шабуыл, логикалық сұрақтар және тест тапсырмалары.

  6. VI

    Үйге тапсырма

    §3.3 оқу; берілген өрнекке алгоритм, блок-сызба және программа құрастыру.

Оқушылар нені білуі тиіс

Негізгі ұғымдар

  • Сызықтық алгоритмнің анықтамасы
  • Блок-сызбаның жалпы түрі
  • Программаның жалпы құрылымы
  • Сызықтық алгоритмге программа құрастыру

Мұғалімнің іс-әрекеті

  • Деңгейлік тапсырмалар арқылы жаңа материалды меңгерту
  • Әр оқушының тақырып бойынша ең төменгі нәтижеге жетуін қамтамасыз ету
  • Есептерді тексеру, қажет жерде түзету енгізу
  • Бағалауды критерий бойынша әділ жүргізу

Үй тапсырмасын қайталау: қысқа сұрақ-жауап

Алгоритм дегеніміз не?

Алгоритм — мақсатқа жету үшін әрекеттердің рет-ретімен орындалуы.

Алгоритмнің түрлері қандай?

Сызықтық, тармақталған, циклдік.

Алгоритмді жазу пішімі қандай?

алг <алгоритмнің аты>

басы

алгоритм командалары

соңы

Өрнектерді есептеу блогының қызметі

Математикалық өрнектерді есептеу.

Алгоритмді жазудың тәсілдері

  • Қарапайым тіл арқылы
  • Түйінді сөздер арқылы
  • Блок-сызба арқылы
  • Программалау тілі арқылы

Программа қандай қызметші сөзден басталады?

Program

Алгоритмді компьютер түсінетін тілде жазу қалай аталады?

Программалау.

Жаңа тақырып: сызықтық алгоритм және Паскальдағы құрылым

Сызықтық алгоритм деген не?

Әрекеттердің тізбектей орындалуы сызықтық алгоритм деп аталады. Мұнда командалар бірінен кейін бірі ретімен орындалады, ал блок-сызбада блоктар бір сызық бойымен тізбектеле орналасады.

Паскаль программасының негізгі бөліктері

Паскаль тіліндегі программа шартты түрде үш бөліктен тұрады:

Program E1;

{ сипаттау бөлімі }

begin

{ операторлар бөлімі }

end.

Оператор ұғымы

Оператор — алгоритмді жүзеге асыру барысында орындалатын әрекетті анықтайтын тілдің қарапайым сөйлемі. Операторлар тізбектей орындалады және нүктелі үтірмен ; ажыратылады. Операторлар бөлімі begin және end сөздерімен қоршалады.

Сызықтық программада жиі қолданылатын операторлар

  • := меншіктеу операторы
  • Read / ReadLn енгізу операторы
  • Write / WriteLn шығару операторы

Есеп шығаруда қолданылатын негізгі алгоритм түрлері

Сызықтық Тармақталған Циклдік

Мысал есеп

Екі бүтін санның қосындысын есептеу үшін (c = a + b) блок-сызбасын, алгоритмін және программасын құрастырыңдар.

Бекіту: деңгейлік тапсырмалар

I деңгей

Төмендегі өрнектерді Паскаль тілінде жазыңдар:

  • (a - b)^2 / (2a)
  • x^2 * (2x + sqrt(y))
  • sqrt(1 + sqrt(x))
  • sqrt(x^2) * (x - 1)

II деңгей

  • 1) Y = x^2 + 3

    Мәнін есептеудің алгоритмін, блок-сызбасын және программасын құрыңдар.

  • 2) Трапеция ауданы

    S = (a + b) * h / 2 формуласы бойынша блок-сызба және программа жазыңдар.

III деңгей

Жаяу адам таулы жерде жүріп келеді. Жазықтағы жылдамдығы — U1 км/сағ, өрге шыққандағы — U2 км/сағ, ылдиға түскендегі — U3 км/сағ. Қозғалыс уақыты сәйкесінше t1, t2, t3 сағ. Жаяу адам қанша жол жүрді?

Сергіту сәті: логикалық сұрақтар

1) Бөлмедегі мысықтар

Бөлменің әр бұрышында бір мысықтан отыр. Әр мысыққа қарама-қарсы үш мысық көрінеді. Бөлмеде неше мысық бар?

Жауабы: 4

2) Стакандар

Үстел үстінде үш стакан шие тұр. Марат бір стакандағы шиені жеп қойды. Неше стакан қалды?

Жауабы: 3 стакан

3) Үш ат жегілген шана

Үш ат жегілген шана бір сағатта 15 км жүріп өтті. Әр аттың жылдамдығы қандай?

Жауабы: 15 км/сағ

4) Доптың кері қайтуы

Допты лақтырғанда, сол ізімен кері қайтуы үшін қалай лақтыру керек?

Жауабы: Жоғары

5) Қараңғы бөлме

Қараңғы бөлмеде май шам және керосин лампасы бар. Алдымен нені жағасыз?

Жауабы: Шырпы

6) Баспалдақтың ортасы

Баспалдақ 15 басқыштан тұрады. Дәл ортасында тұру үшін нешінші басқышқа шығу керек?

Жауабы: 8

Білімді дамыту: тест тапсырмалары

1) Алгоритм дегеніміз —

  • a) командалардың кез келген ретсіз тізбегі
  • b) блоктар мен сызбалар түріндегі арнайы құрылым
  • c) нәтижеге жету үшін атқарушыға қажетті әрекеттерді түсінікті әрі дәл көрсететін нұсқаулар реті
  • d) компьютерде ғана орындалатын машиналық тілдегі нұсқаулар

2) Алгоритмнің жалпы сипаттамасы —

  • a) алгоритм атқарушылары
  • b) блок-сызбалар
  • c) командалар жүйесі
  • d) алгоритм қасиеттері

3) Әрбір ереженің анық, мағыналы болуы қай қасиет?

  • a) дискреттілік
  • b) анықтылық
  • c) нәтижелілік
  • d) түсініктілік

4) Бір алгоритмді әртүрлі бастапқы мәліметтермен бірнеше рет қолдану қасиеті

  • a) жалпылық
  • b) анықтылық
  • c) нәтижелілік
  • d) түсініктілік

5) Алгоритмнің графикалық түрде жазылуы

  • a) программа
  • b) блок-сызба
  • c) сөздік
  • d) кестелік

6) «Басы» сөзі жазылған эллипс нені білдіреді?

  • a) алгоритмнің басталуы
  • b) әрекеттерді орындау үдерісі
  • c) мәліметтерді енгізу және шығару
  • d) алгоритмнің аяқталуы

7) Тіктөртбұрыш нені білдіреді?

  • a) алгоритмнің басталуы
  • b) әрекеттерді орындау үдерісі
  • c) мәліметтерді енгізу және шығару
  • d) алгоритмнің аяқталуы

8) Командалары бірінен соң бірі орындалатын алгоритм

  • a) тармақталған
  • b) циклдік
  • c) сызықтық
  • d) дұрыс нұсқасы жоқ

Үй жұмысы, бағалау және рефлексия

Үй тапсырмасы

§3.3 тақырыпты оқу. Y = (A*X + B) - C өрнегі үшін алгоритм, блок-сызба және программа құрастырып келу.

Бағалау

Бағалау критерийлері бойынша жұмыс нәтижесін әділ бағалау, практикалық тапсырмаларды орындау сапасын ескеру.

Рефлексия

Сабақты «БББ» әдісімен қорытындылау: Білемін — Білдім — Білгім келеді.