Отбасында атадан кейінгі адам кім
Тәрбие сағатының барысы
Бүгінгі тәрбие сағатымыз «Менің отбасым» тақырыбына арналған. Сабақ барысында біз отбасы туралы — адамға ең қымбат, ең жақын адамдар туралы, олардың мейірімділігі, сүйіспеншілігі мен имандылығы жайлы әңгімелейміз.
Ой қозғау сұрақтары: «Отбасы деген не? Кім өз отбасы туралы айтып береді?»
Отбасындағы ең үлкен, қадірлі жан — ата
Отбасында ең үлкен, қадірлі адам — ата. Ол — өнеге, ақыл, тәжірибе мектебі.
Менің атам мықты адам,
Күштілерден ықпаған.
Жас кезінің өзінде,
Жігітті жоқ жықпаған.
Домбырасын қолға алып,
Ән салады аташым.
Күй тартқанда толғанып,
Қызығына батамын.
Айтады ертек жан атам,
Ақ сақалын сипалап.
Құмарымды тарқатам,
Жер мен көкті аралап.
Ертегілер еліне
Бір шегетін сапарды
Ардақтаймын өмірде
Асқар таудай атамды.
Атадан кейінгі асыл жан — әже
Атадан кейінгі қадірлі жан — әже. Әже — мейірімнің шуағы, отбасындағы жылулықтың бастауы.
Ән
«Әжемнің шайы»
Куәгер кешегі заманға,
Әрдайым жайдары жүзді.
Көп ертек білетін қызықты,
Көрсеңдер аяулы әжемді.
Әлдекім әжемнің шашына
Әдейі бор жағып қойғандай,
Кимешек тартқанда басына
Болады ақша бұлт қонғандай.
Асқар тау — әке
Отбасындағы жауапкершіліктің, қорған мен тіректің символы — әке.
Жұмбақ: «Атаңның баласы. Кей кезде таласып қаласың әжеге. Білгенің асады кәдеге. Ол кім?» Жауабы: әке
Ыстық-ау кім-кімге де әке деген,
Суыққа шалындырмай мәпелеген.
Өмірдің соқтығымен өрге тартып,
«Алдымен адам бол!» деп жетелеген.
Мейірімнің бастауы — ана
Үйімізге құт дарытып, түн ұйқысын төрт бөліп бөбегін тербететін; ауырғанда дәрігердей демейтін; қызығыңды да, бұзығыңды да көтеріп, әрдайым жанында қорған болатын ең аяулы жан — ана.
Әлпештеген баласын
Ана — бақыт, ана — күн.
Әркім сүйіп өзінің
Мақтан етер анасын.
Өзіңсің, сүйікті анам, құдіретім,
Жанымды жадыратып күлдіретін.
Сендегі маған деген мол мейірді
Нұр толы қос жанарың білдіретін.
Ән
«Әке мен ана туралы ән» — оқушылардың орындауында.
Қорытынды
Ата, әже, әке, ана — бәрі де біз үшін ең қымбат адамдар. Отбасы — сыйластық пен сүйіспеншілік ұялаған, адамгершілік құндылықтар қалыптасатын қасиетті орта.
Құт-береке атаң қымбат,
Мейірімді әжең қымбат.
Асқар тауың әкең қымбат,
Аймалайтын анаң қымбат.
Талқылауға арналған сұрақ
Отбасын кімдер құрайды? Әр адамның отбасындағы орны мен жауапкершілігі қандай?
Дереккөз
Орны: Қандыағаш қаласы, №1 орта мектеп
Дайындаған: Құрақбаева К. Е.
Материал: «Отбасы — шаңырақ берекесі»