Суреттен ненің суретін көріп тұрмыз
Сабақтың тақырыбы
Ү дыбысы мен әрпі
Сабақтың мақсаты
Негізгі дағды
- Ү дыбысымен және оның әріп таңбасымен таныстыру.
- Ү дыбысының ерекше айтылатынын түсіндіріп, артикуляциясын көрсету және меңгерту.
- Сөздерге дыбыстық талдау жасай білуге үйрету.
Тіл дамыту
- Үлгі бойынша баспа әріптерді жазуға дағдыландыру.
- Суреттер бойынша әңгіме құрастыру арқылы сөздік қорын байыту.
- Буын туралы түсінігін кеңейту.
Көрнекі құралдар
Сабақтың барысы
1) Ұйымдастыру кезеңі
Балаларды сабаққа дайындау, зейінін шоғырландыру.
2) Өтілген сабақты қорытындылау
Сұрақ-жауап
- Суреттен нені көріп тұрмыз?
- Аңдардың суретін.
- Аттарын атаңдар.
- Аю, қасқыр, түлкі, т.б.
- «Аң» сөзіндегі бірінші дыбыс қандай?
- А дыбысы.
- Екінші дыбыс ше?
- Ң дыбысы.
- Өткен сабақта қандай дыбыспен таныстық?
- Ң дыбысымен.
- Ң дыбысы қай дыбысқа ұқсайды?
- Н дыбысына.
Мұғалім балаларға: жұмбақ арқылы бүгінгі жаңа тақырыпты бастайтынын айтады.
3) Жаңа сабақ
Жұмбақ
Баласын ертіп соңынан,
Сүңгіп, жүзіп үйретті.
Су жұқпайтын тонына —
Кім білмейді? (Үйректі)
Балалар суда жүзетін құстардың бірі — үйрек екенін айтады. «Үйрек» сөзінің басында ү дыбысы анық естіледі.
Дыбысты дұрыс айту
Ү дыбысын айтқанда ерін алға созылады. Сондықтан дыбысты анық, дұрыс айтуға жаттығамыз.
Дауысты ма, дауыссыз ба?
Ү дыбысы — дауысты дыбыс. Ол «қызыл үйге» жатады.
Әріпті меңгерту
- Үү әрпін ауада жазып көреміз.
- Кеспе әріптер тақтасынан ү әрпін тауып, көрсетеміз.
- Тақтаға жазып, жазылуын талдаймыз.
«Үйрек» сөзі: буынға бөлу және дыбыстық талдау
Сөз буынға бөлінеді: үй-рек.
Сергіту сәті
Орнымыздан тұрайық,
Алақанды ұрайық.
Бір отырып, бір тұрып,
Біз тынығып алайық.
Көрнекілікпен жұмыс
Тақтаға сурет ілінеді. Суреттегі балаға ү дыбысынан басталатын ат қоямыз: Үсен.
Суреттердің атауы
- Үкі
- Үй
- Үйрек
Буын санын анықтау
- Үкі сөзінде екі буын бар.
- Үй сөзінде бір буын бар.
- Үйрек сөзінде екі буын бар.
Әңгімелеу: «Үйрек пен түлкі»
Ертеде бір үйрек болыпты. Ол көлде жүзіп жүрген аққулардың сұлулығына қызығып, оларды қызғанады. «Неге жұрт аққуды жақсы көреді, жемейді?» деп ойлайды. Бір күні үйрек түлкіні көріп: «Түлкі, түлкі, сен неге мына семіз аққуларды жемейсің?» — дейді.
Түлкі: «Олардың ұйықтайтын жерін көрсетші», — дейді. Үйрек уәде бойынша түлкіні аққулардың ұйықтайтын жеріне ертіп келеді. Мұны сезген қос аққу ұшып кетеді. Ашуланған түлкі үйрекке бас салып, жегісі келеді.
Үйрек жалбарынып: «Түлкіжан, мені жеме. Мен сенің тапсырмаларыңның бәрін орындайын», — дейді. Түлкі келіседі. Енді біз үйрекке көмектесіп, оны түлкіден құтқарайық.
Тапсырмалар
1-тапсырма: Жұмбақтарды шешу
-
Күндіз соқыр, не деген,
Түнде қандай көреген. (Үкі) -
Кезікті бір жануар,
Үстінде екі тауы бар. (Түйе) - Өзі қу, жүрген жері айқай да шу. (Түлкі)
-
Ақ сандығым ашылды,
Ішінен жібек шашылды. (Күн)
2-тапсырма: Дыбысты табу
Осы сөздердің ішінде ү дыбысы бар ма? Қай жерде кездеседі (басында ма, ортасында ма)?
3-тапсырма: Дыбыстық талдау
Үкі, түйе, күн, түлкі сөздеріне дыбыстық талдау жаса.
Қорытынды: Біз тапсырмаларды орындап, үйректі түлкіден құтқардық.
Айтылымға жаттығу: жаңылтпаш
Үміт түбіт түтті,
Түбітті түтіп бітті.