Балапанға бидай шаш
Тақырыбы: «Шұбар тауық» (II — кішкентайлар тобы)
Мақсаты
- Балаларды ертегіні зейін қойып, соңына дейін тыңдауға үйрету.
- Тәрбиешінің сұрақтарына анық жауап беруге, бір-бірінің жауабын тыңдауға және өзіне сенімді болуға дағдыландыру.
- Кейіпкерлерге мейірімділік пен аяушылық сезімін тәрбиелеу.
- Белсенді сөздік қорын дамыту.
- Түстер мен геометриялық пішіндерді ажырата білуін жетілдіру, пішіндерден құрастыруға қызығушылығын арттыру.
1) Шаттық шеңбер
Балалар шеңберге тұрады. Тәрбиеші көңіл көтеретін қимыл-қозғалыстармен бірге тақпақты айтады:
Қуыр-қуыр, қуырмаш,
Балапанға бидай шаш.
Түлкі келсе — есік бас,
Әжең келсе — есік аш.
Бас бармақ,
Балаң үйрек,
Ортан терек,
Шылдыр шүмек,
Кішкене бөбек.
Қуыр-қуыр, қуырмаш,
Тауықтарға тары шаш.
Шеп-шеп-шеп.
Тәрбиеші: Балалар, ертегі тамашалағыларың келе ме?
(Балалардың назарын экранға аударады.)
2) Ертегі: «Шұбар тауық»
Балаларға «Шұбар тауық» ертегісі көрсетіледі/оқылады. Тәрбиеші маңызды тұстарға тоқталып, балалардың назарын кейіпкерлердің әрекеттеріне аударады.
3) Сөздік ойын: «Кім тез жауап береді?»
Ертегі желісі бойынша сұрақ-жауап жүргізіледі.
- Қандай ертегі көрдіңдер?
- «Шұбар тауық».
- Шұбар тауық кімдердің үйінде тұрды?
- Ата мен әженің үйінде.
- Шұбар тауық ата мен әжеге қандай жұмыртқа туып берді?
- Алтын жұмыртқа.
- Жұмыртқаны не жарды?
- Тышқан.
- Тышқан жұмыртқаны қалай жарды?
- Құйрығымен қағып кетті.
4) Психологиялық гимнастика: «Көңіл күй»
Балалар кейіпкерлердің эмоциясын бет-әлпет, қимыл арқылы бейнелейді.
Таңдану
Ата мен әже алтын жұмыртқаны көргенде қалай таңданды?
Көңілсіздену
Алтын жұмыртқа жарылып қалғанда олар қалай ренжіді?
Қуану
Жай жұмыртқа туып бергенде олар қалай қуанды?
Көрініс: «Қыт-қыттап Шұбар тауық келеді…»
Шұбар тауық: Сәлеметсіңдер ме, балалар, қыт-қыт-қыт!
Балалар: Сәлеметсіз бе!
Шұбар тауық: Мені таныдыңдар ма?
Балалар: Иә, таныдық. Сен Шұбар тауықсың.
Шұбар тауық: Мен сендерге ойындар әкелдім. Егер ойындарды дұрыс ойнасаңдар, мына жұмыртқаларым ашылады.
Тәрбиеші: Шұбар тауық, біздің балалар ойын ойнағанды өте жақсы көреді.
5) Дидактикалық ойын: «Суреттерді ретімен қойып, әңгімеле»
Балалар ертегі бойынша берілген суреттерді дұрыс ретке қойып, қысқаша әңгімелеп береді.
Тәрбиеші (жұмыртқаны қолына алып): Ой, балалар, мына жұмыртқадан бір дауыс шығып тұрған сияқты…
(Ішінен шиқылдап балапан шығады.)
Балалар: Балапан!
(Балалар таңданады. Шұбар тауық қыт-қыттап алғыс айтады.)
6) Дидактикалық ойын: «Геометриялық пішіндерді ата және сипатта»
Екінші жұмыртқа ашылып, ішінен балапан шығады. Балалар пішіндерді (шеңбер, үшбұрыш, шаршы, тік төртбұрыш) атап, түсін және қасиетін сипаттайды.
7) Дидактикалық ойын: «Балапанды пішіндерден құрастыр»
Үшінші жұмыртқа ашылып, ішінен балапан шығады. Балалар геометриялық пішіндерден балапанның бейнесін құрастырады.
Қосымша тапсырма: «Неше балапан, неше жұмыртқа?»
Балалар жұмыртқалар мен балапандарды санап, нәтижесін айтады.
Шұбар тауық: Жарайсыңдар, балалар! Жұмыртқаларымды ашуға көмектескендеріңе рахмет!
Балалар: Шұбар тауықпен бірге ән айтып, би билейік!
Ән: «Шөжелерім»
Шеп-шеп-шеп, шөжелерім,
Сары алтындай балапаным.
Тез жетіңдер, жем беремін,
Дәнге толы алақаным.
Қорытынды
Шұбар тауық: Балалар, сендермен бірге өте көңілді болды. Мен сендерге сыйлық ала келдім.
(Сыйлық ретінде киндер жұмыртқаларын балаларға таратады.)
Шұбар тауық: Мені атам мен әжем іздеп жүрген болар. Мен енді үйге қайтайын. Сау болыңдар, балалар!