Қазақша рефераттар

Табиғат тобы

Сабақтың тақырыбы: Су. Судың қасиеттері

Бұл танымдық сабақта оқушылар судың табиғаттағы орны мен негізгі қасиеттерін тәжірибе арқылы зерттеп, суды таза сақтаудың маңызын түсінеді.

Сабақтың мақсаты

  • Су туралы ғылыми түсінік қалыптастыру.
  • Тәжірибелер нәтижесінде судың қасиеттерімен таныстыру.
  • Суды таза сақтауға, ұқыптылыққа тәрбиелеу.

Сабақ туралы қысқаша

Сабақтың түрі
Танымдық сабақ
Әдістері
Сұрақ-жауап, тәжірибе, оқу және жазу арқылы сын тұрғысынан ойлау
Пәнаралық байланыс
Ана тілі, қазақ тілі, математика
Көрнекіліктер
Сызба, табиғат суреттері, кесе, тәрелке, үнтаспа, Венн диаграммасы

Сабақтың барысы

1) Ұйымдастыру және қызығушылықты ояту

Сабақ басында оқушылардың назарын жыл мезгілдері тақырыбы арқылы табиғатқа аудару ұсынылады. Сұрақтар:

  • Жылдың неше мезгілі бар?
  • Қазір жылдың қай мезгілі?
  • Әр мезгіл неше айдан тұрады?
  • Қазір күздің нешінші айы?

Әдеби байланыс: А. Құнанбаевтың «Күз» өлеңі

Сұр бұлт түсі суық қаптайды аспан,

Күз болып, дымқыл тұман жерді басқан.

Білмеймін тоңғаны ма, тойғаны ма,

Жылқы ойнап, бие қашқан, тай жарысқан.

Талқылау сұрақтары: Күз мезгілінде табиғатта қандай өзгерістер болады? Адамдар қысқа қалай дайындалады?

Табиғат туралы қысқаша түсінік

Табиғат екіге бөлінеді: өлі табиғат және тірі табиғат.

Өлі табиғат

Ауа, су, тау, тас, жер, күн, ай, жұлдыз.

Тірі табиғат

Адамдар, жануарлар, өсімдіктер.

Топқа бөлу

I топ: Су II топ: Ауа III топ: Табиғат IV топ: Адам V топ: Өсімдік

2) Үй тапсырмасын тексеру

  1. Ауаның табиғаттағы пайдасы.
  2. Адам өміріне ауаның пайдасын дәлелдеу.
  3. Ауаның шаруашылықтағы маңызы.

3) Жаңа сабақ: Судың қасиеттерін зерттеу

Бақылау арқылы бастау

Стақандағы суды екінші ыдысқа құйып, судың сылдырын тыңдату ұсынылады. Сұрақтар:

  • Бұл ненің дыбысы?
  • Су қандай зат?
  • Судың түсі қандай?
  • Судың пішіні бар ма?
  • Суды қай жерлерде кездестіруге болады?

Тәжірибелер

Тәжірибе 1: Судың түсі

Бір ыдысқа сүт, екінші ыдысқа су құйып, салыстыру. Қорытынды: су түссіз.

Тәжірибе 2: Мөлдірлік және иіс

Колбаның астына дөңгелек, шаршы, төртбұрыш сияқты әртүрлі фигуралар қойып, судың мөлдір екенін анықтау. Иісін иіскету. Қорытынды: су мөлдір және иіссіз.

Тәжірибе 3: Пішін және жұққыштық

Суды бөтелкеге, стаканға, кесеге құйып бақылау: су ыдыстың пішінін қабылдайды. Бір ыдыстан екіншісіне құйғанда тамшылардың қалатынын көрсету: су жұққыш.

Тәжірибе 4: Аққыштық

Ыдыстағы суға матаны батырып көру және судың қозғалысын бақылау. Қорытынды: су аққыш, сұйық.

Қорытынды топтастыру

иіссіз сұйық түссіз аққыш мөлдір пішіні жоқ жұққыш

4) Жазылым және оқылым тапсырмалары

Дәптермен жұмыс

«Су – бу – мұз» сөздерін пайдаланып, қысқа әңгіме құрастыру.

Оқулықпен жұмыс

Мәтінді бөліп-бөліп оқып, мазмұнын түсіндіру және сұрақтарға жауап беру.

5) Топтық жұмыс

I топ: «Су» — мақал-мәтелдер

  • Сулы жер — нулы жер.
  • Таудың көркі — бұлақ.
  • Өзен жағалағанның өзегі талмас.

II топ: «Ауа» — су туралы тыйым сөздер

  • Суға түкірме.
  • Судың бетін ашық қалдырма.

III топ: «Табиғат» — сурет салу

Табиғат тақырыбына қатысты сурет салып, ойды қысқаша қорғау.

IV топ: «Адам» — су туралы өлең

Шаршағаныңды басатын,

Сарайыңды ашатын,

Су болмайды қашанда

Қайнаған судан асатын!

V топ: «Өсімдік» — сөйлемді дәлелдеу

«Сусыз тіршілік жоқ»

Мәтіннен бір сөйлемді оқып, оның мағынасын түсіндіріп, өмірмен байланыстырып қорғау.

6) Жұмбақтар

  1. Қанатсыз құс қалқып барады.
    Көзінен жасы тамшылап барады. (Бұлт)
  2. Жылт-жылт етеді,
    Жылғалардан өтеді. (Су)

7) Сергіту сәті

Ойын ережесі: дұрыс болса — отыру, бұрыс болса — тұру.

Суды жейміз

Бұрыс — тұру

Суды ішеміз

Дұрыс — отыру

Сумен жуынамыз

Дұрыс — отыру

Су қатпайды

Бұрыс — тұру

Су сұйық

Дұрыс — отыру

Қорытынды ой

Адам ағзасына үнемі қорек қажет: таза ауа, жеміс-жидек, көкөніс, тағам және су. Су — тіршілік көзі. Ол қатты, сұйық және бу күйінде бола алады.