Қыс туралы тақпақ айту
Ұйымдастырылған оқу іс-әрекеті: Тіл дамыту
Білім саласы: «Қатынас». Тақырыбы: «Көңілді қыс және қысқы ойындар».
Мақсаты
Бұл сабақ балалардың қыс мезгілі туралы түсінігін кеңейтіп, сөйлеу дағдыларын дамытуды және бірлесіп ойнау мәдениетін қалыптастыруды көздейді.
Білімділік
- Қыс мезгілі туралы білімдерін кеңейтіп, сөздік қорын байыту.
- Сұраққа нақты жауап беріп, сурет мазмұнына сай әңгіме құрастырып айтуға үйрету.
- Қысқы ойындарды және сырғанауға арналған заттарды ажырата білуге дағдыландыру.
Дамытушылық
Табиғат көрінісін сипаттап, қызықты сәттерді әңгімелеу арқылы балалардың шығармашылық қабілетін дамыту.
Тәрбиелік
Бір-біріне қамқор болуға, ұйымшылдықпен ойнауға тәрбиелеу.
Оқу іс-әрекетінің барысы
Ұйымдастыру сәті
Бүгін бізде ерекше күн. Орнымыздан тұрып, апайлармен амандасайық.
Шаттық шеңбері
Арайлап атқан таңға сәлем!
Жылуын шашқан күнге сәлем!
Жайнап өскен бізге сәлем!
Білім беріп тәрбиелеген,
Апайларым, сіздерге сәлем!
I. Кіріспе бөлім
Жұмбақ
Көзіңе көрінбейді,
Тоңдырып қызартады.
Күні-түні ерінбейді,
Өзенге мұз артады.
Жауабы: Аяз
Сұрақ-жауап
- Аяз жылдың қай мезгілінде болады? — Қыс мезгілінде.
- Қыс мезгілі қандай? — Салқын, қар жауады, боран болады, бет-қол тоңады.
- Қыста қалай киінеміз? — Жылы киім киеміз.
- Қандай қысқы ойындарды білеміз? — Аққала жасау, шана тебу, шаңғы, коньки, хоккей.
II. Негізгі бөлім
Қарлы боранымен, сықырлаған аязымен қыс та келіп жетті. Бірақ біз қыстан қорықпаймыз: денемізді шынықтырамыз, жылы киінеміз, сырғанап ойнаймыз, аққала жасаймыз.
Қонақ: Аққала
Тапсырмалар топтамасыЕсік қағылып, бізге қонаққа аққала келді. Ол құр келмей, қызықты тапсырмалар алып келіпті. Ендеше, аққаланың тапсырмаларын орындайық.
1-тапсырма: Сурет бойынша әңгіме құрастыру
Балалар суреттегі қыс көрінісін сипаттайды: ауа райы, адамдардың киімі, ойын түрлері, көңіл күйі.
2-тапсырма: Қыс туралы тақпақ айту
Сырғанаққа мығымбыз,
Шыныққанбыз, шымырмыз.
Таудан төмен сырғанап,
Біз тебеміз сырғанақ.
Аулаға қар үйгізді,
Бетті аязға сүйгізді.
Тоңбасын деп теректер,
Қырау ішік кигізді.
Біз батыр баламыз,
Жылы үй-қорамыз.
Ақ ұлпа қарыңнан,
Аққала саламыз.
Келді-дағы қыс,
Дала аппақ түс.
Қос аяқта шаңғымыз,
Дөңге шықтық бәріміз.
Ағаштардың жапырағын
Ашулы жел тонайды.
Ақ жамылған атырабым,
Қар борайды, борайды.
3-тапсырма: Сергіту сәті
Орнымыздан тұрып, қимыл-қозғалыспен бірге орындаймыз.
Атамның алып күрегін,
Ауланың қарын күредім.
Күнде әжеме құдықтан
Су әкеліп беремін.
Ескерту: өлең жолдары қимылмен көрсетіледі.
4-тапсырма: «Қайсысы артық?» дидактикалық ойыны
Тақтаға әр мезгілге арналған киімдер ілінеді. Балалар олардың ішінен артық киімді табады және ол киімнің қай мезгілде киілетінін айтады.
- Мезгілдер бойынша салыстыру
- Дұрыс дәлелдеп айту
5-тапсырма: Санамақ айту
«1» дегенім — бөрік,
Кисең бойға көрік.
«2» дегенім — етік,
Киер сәнді етіп.
«3» дегенім — ішік,
Теріден тігер пішіп.
«4» дегенім — тымақ,
Қыста кисең жылы-ақ.
«5» дегенім — байпақ,
Іші жылы тайпақ.
Буынғаным — бір белдік,
Мұны, қане, бір делік.
Екі қолғап,
Бір шалбар және үстімде бір тон бар.
Барлық бала кимей ме:
Екі шұлық, бір жейде.
Оған енді тосылмай,
Екі етікті қосыңдар.
Он болды ма барлығы,
Еске сақтап қал мұны!
6-тапсырма: Дәптермен жұмыс
- Ребус шешу.
- «Не артық?» тапсырмасы: қысқы ойынға жатпайтын ойын құралын табу.
7-тапсырма: «Аққала» дидактикалық ойыны
Тақтаға жартылай дайындалған аққала бөліктері ілінеді. Үстел үстінде қалған бөліктер (шелегі, аузы, қолдары, сыпырғышы және т.б.) жатады. Балалар бөлікті таңдап, артындағы сұраққа жауап беріп, орнына іледі.
Талқылау
Аққала неше бөліктен тұрады? Қандай геометриялық фигуралардан құралған?
Дағды
Санау, салыстыру, сөйлемді нақты құрау.
8-тапсырма: Тіл ұстарту жаттығуы
Ша-ша-ша — жап-жасыл шырша.
Ар-ар-ар — қандай аппақ қар.
Ыс-ыс-ыс — келіп қалды қыс.
9-тапсырма: «Зырлайды шанамыз» әнін/өлеңін орындау
Балалар көңілді әуенмен бірге хормен орындайды.
Қорытынды
Сабақ соңында балалардың түсінігін бекіту үшін қысқаша сұрақтар қойылады.
Сұрақтар
- Қыс мезгілі саған ұнай ма? Неліктен?
- Қыста ойнайтын қандай ойындарды білесің?
- Қардан не жасауға болады?
- Сырғанаққа бару үшін қалай киіну керек?
Бағалау және ынталандыру
Балалар бүгін сабаққа белсенді қатысқандықтан, аққала қуанышты хабар жеткізеді: әрқайсысың өте жақсы жұмыс істедіңдер!