Қазақша рефераттар

Қонақтармен таныстыру

Кіріспе

Армысыздар, құрметті қонақтар, ұстаздар және оқушылар! 25 қазан–5 қараша аралығында өтетін «Дініңді сақта, салтыңды сатпа, сенімді ақта, ел болашағы – жастар!» атты онкүндік аясында 8–9-сынып оқушыларының қатысуымен ұйымдастырылған «Дін – тәрбие діңгегі» кездесуіне қош келдіңіздер.

Кездесудің мақсаты

  • Діни экстремизмнің алдын алу бағытында жастардың діни сауаттылығын арттыру.
  • Терроризм мен діни экстремизмнің алдын алу және онымен күресу жолдарын, сондай-ақ олардың елімізге тигізер зардаптарын жан-жақты талдап, жастарға ой салу.
  • Қауіп төндіретін жат діни ағымдардан сақ болуға шақырып, жастарды отансүйгіштікке тәрбиелеу.
  • Қазақ халқының діни ұстанымы мен салт-дәстүрін қастерлей сақтауға үлес қосып, ұрпақтар сабақтастығын нығайту.

Қонақтар

Діни сала

Балмағанбет Балқыбайұлы атындағы мешіттің бас имамы: [аты-жөні көрсетіледі]

Мемлекеттік құрылым

Ішкі саясат бөлімінің бас маманы: [аты-жөні көрсетіледі]

Мұғалімнің сөзі

Бүгінгі таңда елімізде түрлі конфессия өкілдерінің бейбіт қатар өмір сүруі және өзара тиімді қарым-қатынас жасауы үшін қолайлы жағдайлар жасалған. Қазақстандағы конфессияаралық қатынастар көптеген елдер үшін үлгі бола алады.

Дегенмен, кейбір дін ұстанушылар агрессия мен діни радикализмнің қауіпті түрлеріне бой алдырып, азаматтардың қауіпсіздігі мен мемлекеттің тұрақтылығына қатер төндіруде. Соңғы жылдары экстремистер бейбітсүйгіштікке, ұстамдылыққа баулитын және өзге діни көзқарастарға түсіністікпен қарауға тәрбиелейтін ислам дінін бұрмалап, қоғам ішінде іріткі салуға ұмтылуда. Бұл тек дінаралық татулыққа ғана емес, мұсылмандар арасындағы бірлікке де кері әсерін тигізеді.

Маңызды ой

Елбасы Нұрсұлтан Әбішұлы Назарбаев «Қазақстан – 2050» стратегиясы туралы Жолдауында елдің дәстүрлері мен мәдени нормаларына сай діни сананы қалыптастырудың маңызын атап өтті. Дін зайырлы қоғамымыздың ажырамас бөлігі болғандықтан, құзырлы мемлекеттік органдар еліміздегі діни қатынастарды дамытуға және тұрақтылықты сақтауға әрдайым мүдделі.

Қазіргі таңда көптеген мемлекет үшін терроризммен күрес мәселесі өзекті. Терроризм — адамзатқа төнген ауыр қасірет, қоғамның тыныштығы мен қауіпсіздігіне бағытталған зұлмат.

Қазақ халқының ұлы ойшылы Абай Құнанбаев қара сөздерінде: «Адам баласын заман өсіреді, кімде-кім жаман болса, оған замандастарының бәрі кінәлі» деп ой түйіндейді.

Бұл сөз қоғам, орта және тәрбие ықпалының қаншалықты маңызды екенін көрсетеді. Сондықтан жастардың дені сау, рухы мықты, санасы сергек болып қалыптасуы үшін жүйелі тәрбие мен дұрыс бағыт берудің орны ерекше.

Осы орайда бейнеролик ұсынамыз. (Бейнеролик көрсетіледі.)

Біздің мақсатымыз — жастарды жат діни ағымдардың ықпалынан сақтандыру. Ендеше, оқушыларға ақыл-кеңесін айту үшін Балмағанбет Балқыбайұлы атындағы мешіттің имамына сөз береміз.

Оқушылар тарапынан сұрақтар бар, келесі кезекте сұрақ-жауап бөліміне өтеміз.

Есте сақтайтын қауіпсіздік ережелері

Мұны білу өте маңызды

Ескерту: ҚР көптеген діни-экстремистік ұйымдарға тыйым салған.

  1. 1. Таныс емес, көшеде кездескен адамның діни ұйым жиналысына шақыруына ермеңіз, діни тақырыптағы күмәнді диалогқа араласпаңыз.
  2. 2. Кездескен діни ұйым өкілдерімен алғашқы әңгімеде өз діни көзқарасыңызды ашық жариялауға асықпаңыз.
  3. 3. Егер сұрақ қоюды шешсеңіз, арандатуға ермей, сабырлы әрі сыпайы түрде сұраңыз.
  4. 4. Діни мазмұндағы парақша, брошюра, журнал ұсынса, алғыс айтып, сыпайы түрде бас тартыңыз.
  5. 5. Діни жиынға қатысуға ниеттенсеңіз, ол туралы алдын ала көбірек біліңіз; туыстармен, достармен, сенімді адамдармен ақылдасыңыз.
  6. 6. Есте сақтаңыз: миссионер-уағызшылардың басты мақсаты — сізді өз сеніміне тарту. Сіздің мақсатыңыз — деструктивті ұйымдардың ықпалына түспеу.
  7. 7. Діни жиналыстарға жалғыз бармаңыз: қасыңызға досыңызды немесе туысыңызды ертіп жүріңіз.
  8. 8. Жақындарыңыздың пікірін елемей, «рухани саулық» іздеп, теріс бағыттағы ұйымға қосылу дұрыс шешім екенін қайта ойланыңыз.
  9. 9. Өмірде мақсатқа жетіп, ішкі тыныштық табу үшін дәстүрлі емес бағыттағы ұйымдар мен күмәнді «миссияларға» жоламаған жөн.
  10. 10. Есіңде болсын: Құдайға сену немесе сенбеу — өз таңдауың. Өзге ағымның жетегінде кетіп, достарың мен жақындарыңнан айырылып қалғың келмесе, ойланып шешім қабылда.

Қорытынды сөз

Бүгінгі «Дін – тәрбие діңгегі» атты тәрбие сағатымызды төмендегі оймен қорытындылағым келеді: діни экстремизм қоғам ішінде іріткі салуға, өшпенділік отын тұтатуға және қантөгіске жол ашуы мүмкін. Пиғылы бөтен, қазақтың болмысына жат ағымдарға дер кезінде тосқауыл қоймасақ, ертең бірлігімізге сызат түсуі ықтимал.

Егер елімізде Құран жолын берік ұстанатын, иманы таза, ниеті түзу азаматтар көп болса, қоғамда береке, бірлік, тыныштық орнығады.

Құрметті қонақтар, бүгін мектебімізге келіп, ойларыңызды ортаға салып, ақыл-кеңес бергендеріңіз үшін үлкен рақмет! Алланың нұры жаусын. Келесі кездескенше, сау болыңыздар!