Жақсы сөз
Сабақтың барысы
I. Ұйымдастыру кезеңі
Мұғалім сөзі: Қош келдіңіздер, құрметті ұстаздар мен студенттер! 22 қыркүйекте аталып өткен Тіл мерекесімен құттықтай отырып, осы мерекеге өз үлесімізді қосу және студенттердің тілге деген құрметін арттыру мақсатында «Ана тілім – ажарым, асыл мұрам» атты ашық тәрбие сағатымызды ашық деп жариялаймыз.
Елбасы Жарлығымен 1997 жылдың 11 шілдесінде бекітілген «Тіл туралы» Заңның 4-бабына сәйкес, Қазақстан Республикасының мемлекеттік тілі – қазақ тілі.
Жүргізуші сөзі
Туған елім – тірлігімнің айғағы,
Тілім барда айтылар сыр ойдағы.
Өссе тілім, мен де бірге өсемін,
Өшсе тілім, мен де бірге өшемін!
— Әбділдә Тәжібаев
Ақын жырлағандай, тіл – қай ел үшін де қастерлі, құдіретті ұғым. Сондықтан әр адам өз ана тілін көзінің қарашығындай қорғауға тиіс. Туған тілдің абыройын асқақтату – әрбір азаматтың абзал борышы.
Тәуелсіз елдің келешегі – жас ұрпақ. Оларды парасатты, білімді, іскер, қабілетті, отансүйгіш әрі ұлтжанды тұлға етіп қалыптастыруда мемлекеттік тілдің қызметі орасан зор. Тіл – таусылмайтын байлық.
Өлең шумақтары
Ана тілім – қазақ тілім, туған тілім,
Қасиетті тілімнің мәнін біл.
Ана тілді құрметтеңдер, адамдар,
Заманға сай өзге тілдің бәрін біл!
Туған тілім – тірлігімнің айғағы,
Тілім барда айтылар сөз ойдағы.
Өссе тілім, мен де бірге өсемін,
Өшсе тілім, мен де бірге өшемін.
Ана тілім – дана тілім, бақ тілім,
Сенсіз бақыт дүниеден тапты кім?
Сенсің менің қасіретім, шаттығым,
Сенсің менің тазалығым, пәктігім.
Ойын: «Ұйқасын тап»
Мақал-мәтелдердің жалғасын тауып, тілдің құдіретін дәлелдеңіз.
- 1. Бас кеспек болса да, тіл кеспек жоқ.
- 2. Ана сүті бой өсіреді, ана тілі ой өсіреді.
- 3. Тілмен байланған тіспен шешілмес.
- 4. Тіл тас жарады, тас жармаса бас жарады.
- 5. Жақсы сөз — жарым ырыс.
- 6. Тіл — адам ойының айнасы.
- 7. Тіл қылыштан да өткір.
- 8. Ойнап сөйлесең де, ойлап сөйле.
- 9. Тисе терекке, тимесе бұтаққа.
- 10. Айтылған сөз атылған оқпен тең.
- 11. Бал тамған тілден у тамар.
- 12. Көп сөз — бос сөз.
- 13. Көп сөз — күміс, аз сөз — алтын.
- 14. Жеті жұрттың тілін біл, жеті түрлі ілім біл.
- 15. Таза сөйлеу — биік мәдениеттілік.
- 16. Жақсы байқап сөйлер, жаман шайқап сөйлер.
- 17. Көре-көре көсем боларсың, сөйлей-сөйлей шешен боларсың.
Қорытынды сөз
Мұғалім: Қалың елім, қазағыңа қорған бол!
Жеткіншегім, жайқала өсіп орман бол.
Шет тілі мен компьютерді меңгеріп,
Елге тірек, нағыз ұлттық тұлға бол!
Ана тілін құрметтеу — тек сөзбен емес, күнделікті қарым-қатынаста сауатты, таза, мәдениетті сөйлеумен көрінетін жауапкершілік. Мемлекеттік тілдің мерейін өсіру — бәрімізге ортақ міндет.