Ата - аналар жауабы
Балабақша мен отбасы ынтымақтастығын құру
«Тәй-тәй, бөпем» ата-аналар клубының жиналысына арналған мазмұн
Ақмола облысы
Ерейментау ауданы
«Болашақ» бөбекжай-бақшасы
Кіріспе сөз
Қайырлы кеш, құрметті ата-аналар! Сіздерді көргенімізге қуаныштымыз.
Тәрбие — бір күннің ісі емес. Бала күн сайын көргенін, сезгенін, естігенін бойына сіңіреді. Сондықтан балабақша мен отбасының бір бағытта әрекет етуі — баланың қауіпсіздігіне, мінез-құлқына, жауапкершілігіне және эмоционалдық тұрақтылығына тікелей әсер етеді.
Ойын: «Киндер-сюрприз»
Талқылау форматы: сұраққа жауап, пікір алмасу
Ата-аналар кезекпен «Киндер-сюрприз» алып, жұмыртқаның ішіндегі сұрақтарға жауап береді. Мақсат — күнделікті тәрбиелік жағдаяттарды ашық талқылап, ортақ шешім табу.
-
1-сұрақ
Отбасында бала тәрбиесімен кім көбірек айналысады? Бұл дұрыс па? Неліктен?
-
2-сұрақ
Балаңыз басқа баланың ойыншығын тартып алып, қайтарғысы келмесе, қандай әрекет жасайсыз?
-
3-сұрақ
Балаңыз белгісіз себеппен жылап, жұбанбаса, қандай амал қолданасыз?
-
4-сұрақ
Бала берілген тапсырманы орындаудан бас тартса, қандай шара қолданасыз?
-
5-сұрақ
«Бала», «балабақша», «әке», «ана» дегенде сізге қандай ой немесе елес бірден келеді?
-
6-сұрақ
Балабақшадан не күтесіз?
-
7-сұрақ
Балаңызға жеткілікті назар аударасыз ба?
-
8-сұрақ
Сіздің ойыңызша, тәрбие деген не?
-
9-сұрақ
Қазіргі балалар қандай? Сіз нені байқайсыз?
-
10-сұрақ
Балаңызды балабақшадан алып келдіңіз. Қолынан бөтен біреудің затын көрдіңіз. Не істейсіз?
-
11-сұрақ
Сол жағдаят қайталанса, әрекетіңіз өзгерер ме? Қалай?
-
12-сұрақ
Жұмыстан келіп, үй шаруасына кірістіңіз. Жолдасыңыз теледидар көріп отыр. Балаңыз қайта-қайта келіп, мазаңызды алады. Қандай шешім қабылдайсыз?
Қорытынды ой
«Бала — ата-ананың айнасы». Ендеше, баламыздың бойына өз бойымыздағы жақсы қасиеттерді сіңіре білейік.
Есте қалатыны не?
Ертең бала есейгенде сіз алып берген қымбат ойыншықты да, әдемі киімді де ұмытуы мүмкін. Бірақ бір сәт болса да бірге ойнаған уақытыңыз оның жадында ұзақ сақталады.
Ойын: «Байлаулы бала»
Бір ата-ана ортаға шығады. Әр жағдаяттан кейін белгілі бір шектеу қойылады (аяғы, қолы, көзі, аузы «байланады»). Бұл ойынның мақсаты — кейде баланың мүмкіндігі шектеліп қалғандай болып көрінетінін, ал ересектің міндеті — түсіндіру, бағыттау, қауіпсіздікке жетелеу екенін сезіндіру.
Жағдаят 1
Сіз балаңызбен көл жағасына бардыңыз. Балаңыз суға қызығып, суға қарай жүгіріп кетті. Сіз оны қалай тоқтатасыз?
Ишара: аяғы байланады
Жағдаят 2
Балаңыз біреулер тастап кеткен темекі тұқылын жинап алып, сонымен ойнап отыр. Сіздің әрекетіңіз қандай?
Ишара: қолы байланады
Жағдаят 3
Жұмыстан шаршап келдіңіз. Балаңыз теледидардан атыс-шабыс сияқты өз жасына сай емес фильм көріп отыр. Не істейсіз?
Ишара: көзі байланады
Жағдаят 4
Балаңыз досымен келіспей қалып, дөрекі сөздер айтып қойды. Сіздің айтар сөзіңіз қандай?
Ишара: аузы байланады
Міне, бала осындай «күйге» түседі. Бұған жол бермеу үшін балаға тыйымды құр «болмайды» деп емес, «неге болмайды» және «өйткені…» деген түсіндірумен жеткізу маңызды. Сонда ғана тәрбиедегі мақсат айқындалып, нәтиже береді.
Тәрбиенің ең керемет мектебі — отбасы. Ал ойнай отырып тәрбиелеу — ең маңызды бағыт, өйткені ойын — баланың ажырамас бөлігі.
Қысқа визуализация: «Бақытты балалық шаққа шолу»
Барлығымыз жайғасып, көзімізді жұмып, бір сәт тынышталып отырайық. Еркін тыныс алып, сол тынысымыз арқылы балалық шаққа ой жүгіртейік.
Жаздың шуақты күні. Сіз анаңызбен қол ұстасып келе жатырсыз. Үстіңізде ең сүйікті киіміңіз. Екеуіңіз де қуаныштысыз. Сіз ойнап-жүгіріп анаңыздың алдына шығып кетесіз. Біраздан соң жақын адамыңыздан алыстап қалғаныңызды сезіп, жүгіріп барып қолынан ұстайсыз. Әлгі адам сізге күлімсіреп қарайды. Көзіңізді көтеріп қарасаңыз — алдыңызда мүлдем таныс емес адам… Сіз қолыңызды тез тартып алып, жан-жағыңызға қарайсыз.
Талқылау сұрағы
Енді көзімізді ашайық. Осы сәтте қандай сезімде болдыңыз?
- Ата-аналардың жиі жауабы: қорқыныш
- Бұл қорқыныш сезімі балаларымыздың бойында ешқашан болмасын.
Ынтымақты бекіту
Алақандарымызды алға созайық: оң алақанымыз — отбасы, сол алақанымыз — балабақша болсын. Енді ауызбіршілігіміз нығайып, жұмысымыз алға өрлей берсін деген ниетпен алақандарымызды соғып қояйық.
Материалды дайындаған:
Дүйсенбаева Нұргүл Тайлаққызы
педагог-психолог
«Болашақ» бөбекжай-бақшасы
Ерейментау ауданы, Ақмола облысы