Қазақша рефераттар

Туған жерге туың тік

Тәрбие сағаты: «Әлемге — бейбітшілік!»

Бұл тәрбие сағатының өзегі — Отанды сүю, ел мен жерге құрмет сезімін күшейту, оқушылардың патриоттық рухын ояту және саяси мәдениетін қалыптастыру. Мақсат — өз туған еліне жауапкершілікпен қарайтын, бейбітшіліктің құнын терең түсінетін тұлға тәрбиелеу.

Сабақтың мақсаты

  • Оқушыларды Отанды сүюге тәрбиелеу, патриоттық сезімін нығайту.
  • Саяси мәдениетін қалыптастыру, қоғамдық санаға жауапкершілік ұялату.
  • Елін, жерін құрметтейтін азаматтық ұстанымы берік тұлға қалыптастыру.

Көрнекіліктер

Слайдтар

Тарихи деректер, соғыс жылдарынан үзінділер, бейбіт өмір көріністері.

Нақыл сөздер

Отан, ерлік, бірлік туралы ойды тереңдететін плакаттар.

Ұлы бабалардың портреттері

Ел тарихындағы батырлар мен ардагерлердің рухын дәріптеу.

Тарих тағылымы: соғыс қасіреті және бейбіт күннің бағасы

Соғыс — адамзатқа төнген қасірет. Бұл бөлімде Ұлы Отан соғысы туралы, майданға аттанған ағаларымыздың ерлігі және олардың аңсаған бейбіт заманы — бүгінгі өміріміз туралы айтылады. Слайд арқылы тарихи деректер көрсетіліп, Екінші дүниежүзілік соғыстың отын тұтандырған фашизмнің басқыншылық саясаты түсіндіріледі.

Негізгі ой

Бейбітшілік — кездейсоқ келген сый емес, ол — ұрпаққа аманат.

Тәсіл

Тарихи кадрлар, әңгімелеу, өлең оқу арқылы сезім мен ойды ұштастыру.

Нәтиже

Ерлік пен жауапкершілікке негізделген азаматтық көзқарас қалыптастыру.

Оқушылар оқитын өлеңдер

I оқушы

Менің атам — майдангер,

Отан үшін от кешкен.

Өліммен де беттескен,

Омырауын оқ тескен.

Менің атам — майдангер.

II оқушы

Жеңіс күні… Ойлап, ойлап тұрдым көп,

Сауал бердім білгім кеп:

«Қуанышты мереке —

Жеңіс күні қай күн?» — деп.

Атамнан да сұрадым,

Әкемнен де сұрадым,

Ағамнан да сұрадым,

Әжемнен де сұрадым —

Тосты бәрін құлағын.

«Дұрыс», — десті, — «сұрағың!

Бейбіт күннің бәрі де

Жеңіс күні, шырағым!»

Әдеби композиция (оқу үшін ұсынылатын шығармалар)

  • «Сен құрметте оны!»

    Ә. Сәрсенбаев

  • «Балдақты адам»

    Ә. Дүйсенбиев

  • «Салют»

    Ә. Табылдиев

Жерлестер ерлігі: Ұлан ауданынан шыққан батырлар

Көптеген қазақстандықтар майдандас достарымен бірге Жеңіс үшін күресті. Олардың көбісі қанды шайқастарда ерлікпен қаза тапты. Бұл бөлімде өз өлкеміз — Ұлан ауданынан шыққан батыр ағаларымыз туралы мағлұмат беріледі.

Қасым Қайсенов

1918 жылы Ұлан ауданы Жантас ауылында дүниеге келген. 1940 жылы әскер қатарына алынып, партизан отрядын басқарған. Бірнеше орден-медаль иегері, «Халық Қаһарманы», жазушы. 2006 жылы өмірден өтті.

Ізғұтты Айтықов

1922 жылы Тарғын ауылында туған. 1942 жылы Сталинград үшін шайқаста барлаушы болған. «Қызыл Жұлдыз» орденінің иегері, Кеңес Одағының Батыры.

Төлеген Тоқтаров

1941 жылы соғысқа аттанып, атқыштар дивизиясында қызмет етті. Мәскеу үшін шайқаста ерлік көрсетті. Ұлан ауданы Көре-Күдік өңірінің тумасы.

Хамит Мұхамадиев

Ұлан ауданының Тарғын ауылында дүниеге келген. 1941 жылы армия қатарына алынып, атқыштар дивизиясында болды. «Алтын Жұлдыз» медалі мен Ленин орденінің иегері. Ерлікпен қаза тапқан.

Ерлікпен қаза тапқан ұландықтар

Степан Борозенец, Иван Варепа, Трофим Клименко, Владимир Колесников, Николай Лут.

1 минут үнсіздік

Адамзатты фашизмнен құтқару жолында мерт болған, біздің бақытымыз үшін құрбан болған ерлерді үнсіз еске алайық.

Мақал-мәтелдер: Отан, ерлік, туған жер

Туған жерге туың тік.

Отан — оттан да ыстық.

Өз елім — өлең төсегім.

Туған жердің күні де ыстық, түні де ыстық.

Ер — елінде, гүл — жерінде.

Кісі елінде сұлтан болғанша, өз еліңде ұлтан бол.

Туған жердей жер болмас, туған елдей ел болмас.

Қорытынды ой: бейбітшілік — ұрпаққа аманат

Біз ерлерімізді ұмытпай, олардың есімін әрдайым құрметпен еске алуымыз керек. Солардың ерен ерлігінің арқасында біз бүгін бейбіт аспан астында өмір сүріп отырмыз.

Ұлы Отан соғысы — ақ шашты аталарымыз бен әкелеріміздің ерлік пен қаһармандыққа толы биік рухын күллі әлемге танытқан сындарлы кезең. Ал 9 мамыр — Жеңіс күні — сол жанқиярлықтың мәңгілік жадымызда сақталуына арналған қастерлі мереке.

1941–1945 жылдардағы алапат от кешу — халқымыздың ортақ тарихының ажырамас бөлігі. Аға ұрпақтың төзімділігі мен табандылығы, қайраты мен қаһармандығы болмаса, бүгінгі тәуелсіз Қазақстанның жарқын болашағы да бұл қалпында болмас еді. Сондықтан біз Ұлы Жеңісті жақындатқан ардагерлердің алдында бас иеміз.

I оқушы: «Бейбітшілік болса…»

Жер жүзінде бейбітшілік болсын!

Бейбітшілік болса —

Алаулап гүл тұрады,

Туған жер құлпырады.

Бейбітшілік болса —

Түрленіп бақша-бағы,

Тірлік те жақсарады.

Бейбітшілік болса —

Үйлер де құламайды,

Ешкім де жыламайды.

Бейбітшілік болса —

Балалар болады аман,

Аналар болады аман.