Қазақша рефераттар

Ынтымақ мерекесі

Білім беру саласы: Қатынас · Бөлімі: Тіл дамыту

Тәрбиеші: Ахметкалиева М. Б.

Тақырыбы: «Ынтымақ мерекесі»

Бұл ұйымдастырылған оқу іс-әрекеті 1 Мамыр — Қазақстан халқының бірлігі күні туралы түсінікті кеңейтіп, балалардың тілін дамытуға және достық құндылықтарын нығайтуға бағытталған.

Мақсаты

  • Танымдық: 1 Мамыр — Қазақстан халқының бірлігі күні туралы түсінік қалыптастыру.

  • Дамытушылық: мереке туралы өлеңдер оқу және жаттау арқылы есте сақтау қабілетін дамыту.

  • Тәрбиелік: елімізде тұратын ұлттар мен ұлыстарды құрметтеуге, достық қарым-қатынас орнатуға тәрбиелеу.

Көрнекіліктер

Мерекеге арналған сюжетті суреттер, дәптердегі «ұлттар достығы» тақырыбындағы иллюстрациялар.

Сабақ барысы

Кіріспе бөлім

  • Шаттық шеңберін құру: балалар дөңгелене тұрып, «Достығымыз жарасқан» әнін орындайды.
  • Бір-біріне мерекеге арналған жылы тілектер айтады.

Негізгі бөлім

Дәптердегі ұлттар достығы бейнеленген сурет арқылы жұмыс жүргізіледі. Сабақ сұрақ-жауап, көрнекілік және түсіндіру әдістері арқылы өтеді.

Сөздік жұмысы

Ынтымақ
Адамдар арасындағы бірлік, өзара татулық.
Мереке
Салтанатты той, мейрам.

Тәрбиеші Қазақстан Республикасында тұратын халықтардың тұрмысы мен мәдениеті туралы қысқаша түсіндіреді. 1 Мамыр — Қазақстан халқының бірлігі мен достығын паш ететін айтулы мереке.

Еліміздегі ұлттар мен ұлыстардың достығы мен бірлігі, татулығы мен ынтымағы өзге елдерге үлгі боларлықтай. Қазақтың дархан даласы талай ұлтқа пана болып, қазақ жері бауырластар мекені — достықтың құтты ұясына айналды. Жүрегі жомарт, алақаны ашық халқымыз өзге ұлт өкілдерімен бір ананың баласындай тату ғұмыр кешіп келеді.

«Бірлік бар жерде — тірлік бар», «Ырыс алды — ынтымақ» — халық даналығы.

Өлеңмен жұмыс (С. Оспанов)

Тәрбиеші достық туралы өлеңді дауыстап оқып, мазмұнын түсіндіреді. Балалар өлеңді бірнеше рет қайталап, жаттайды.

Біз — балдырған тең басқан,

Дос құшағын елге ашқан.

Тілегіміз — бейбіт күн,

Ашық болсын кең аспан!

Шығармашылық тапсырма

Балалар ұлттар достығын бейнелейтін сурет салады. Сабақ соңында алған білімдері сұрақ-жауап әдісі арқылы пысықталады.

Күтілетін нәтиже

Жүйелейді

«Ынтымақ мерекесі» туралы түсініктерін жүйелей алады.

Қолданады

Бейбітшілік туралы өз ойларын жеткізе алады.

Түсінеді

Үлкендердің еңбегін құрметтеудің маңызын түсінеді.