Қазақша рефераттар

Сендерге берер сыйлығым сиқырлы қар

Білім саласы, ұйымдастырылған іс-әрекет

Білім саласы: Таным.

Ұйымдастырылған іс-әрекет: математика, айналамен таныстыру және экология, құрастыру.

Мақсаты

Кіріктірілген сабақтың мақсаты — мектепке дейінгі балаларға арналған математиканың негізгі бағыттарын (сан, есеп, көлем, кеңістік, уақыт, пішін) тірек ете отырып, пәндер арасындағы байланысты (құрастыру, айналамен таныстыру және экология) тиімді қолдану арқылы балалардың ақыл-ой белсенділігін арттыру.

Сонымен қатар елестету мен қиялды дамыту, ертегі кейіпкерлерімен (Бауырсақ, Қызыл телпек, Буратино, Аққала, Алтын балық, Шалқан, Қарлы ханым) бірге шытырман саяхат арқылы баланың танымын тереңдету және нығайту.

Әдіс-тәсілдер және құралдар

Қолданылатын әдіс-тәсілдер

  • Дәстүрлі емес кіріктірілген «саяхат» сабақ
  • Түсіндіру, көрсету
  • Дамытушы ойындар
  • Сызбалармен жұмыс

Қажетті құралдар

  • Ақ қағаз
  • Құрастыру кесінділері
  • Мұз қалашығы (макет)
  • Желдеткіш, жасанды қар
  • Ағаштар, целлофан
  • Ертегі кейіпкерлерінің киімдері

Кіріспе бөлім

Амандасу

Арайлап таң атты,
Алтын сәуле таратты.
Жарқырайды қаламыз,
Жайнай түсті даламыз.
Қайырлы таң, қайырлы күн,
Сәлеметсіздер ме, қонақтар!

Балалар шеңберге тұрып, сөз ойыны арқылы өткен тақырыптарға доппен шолу жасайды.

Добым, добым домала,
Қайда кеттің домалап?
Үстел үстін бүлдірдің,
Тәрелкені сындырдың.
Тентек болып кеттің сен,
Келіп тұр сені тепкім кеп.

Сұрақ-жауап (қайталау)

  1. 1.Жылдың қай мезгілі?
  2. 2.Қыс айларын ата.
  3. 3.Табиғатта қандай өзгерістер бар?
  4. 4.Қардың түсі қандай?
  5. 5.Бір аптада неше күн бар?
  6. 6.Бүгін аптаның нешінші күні?

Саяхаттың басталуы: «Шана» әнімен жолға шығу

Тәрбиеші балаларды саяхатқа шақырады: шананы дайындап, жайғасып, әнмен жолға аттанады.

Кейіпкермен кездесу: Бауырсақ

Бауырсақ: Сәлем, сәлем, достарым!

Балалар: Сәлем, Бауырсақ! Қайда домалап бара жатырсың?

Бауырсақ:
Домалап, домалап атамнан қаштым,
Домалап, домалап әжемнен қаштым,
Домалап, домалап мен сендерге жеттім.

Тәрбиеші Бауырсақты бірге жүруге шақырады.

Шана, шана, шанамыз
Таудан сырғанайды.
Қоңыраулары аязда
Қатты сылдырлайды.

Кедергі: Қарлы ханымның мұз сарайы

Суық боран ертегі еліне апаратын жолды қармен жауып тастаған. Бұл — Қарлы ханымның иелігі: ол мұзбен көмкерілген сарайын шақырылмаған қонақтардан қорғайды. Кірер жолдың бәрі мұзбен құрсауланған.

Боран соғып, Бауырсақты мұз сарайына домалатып әкетеді.

Диалог және шарт

Балалар: Бауырсақ, Бауырсақ, сен қайдасың?

Бауырсақ: Мен мұндамын! (Мұз қалашығынан дауыс естіледі.)

Қарлы ханым:
Мен — қаһарына мінген Қарлы ханым. Сендерге қояр шартым бар: мұз болып қатқан жүрегімді жібітіп, жолда кездесетін қиындықтардың тапсырмаларын жаңылыспай орындап келсеңдер, Бауырсақты босатамын.

Тәрбиеші: Біз осал емеспіз. Қарлы ханым дайындаған кез келген тапсырманы орындай аламыз.

Саяхат тапсырмалары

Кездесу: Қызыл телпек және Сұлу қыз (Мальвина)

Қызыл телпек: Сәлем, балалар! Сендерден көмек сұрасам бола ма? Қасқырдан қашып келемін. Әжеме апарған бәлішімді жеткізу үшін қысқа жолды көрсетіңдерші.

Тәрбиеші: Сұлу қыз, саған не болды? Неге жылап тұрсың?

Сұлу қыз: Мен Буратинодан адасып қалдым. Жолды қалай табамын?

Олар «сиқырлы қарды» ұсынады. Тәрбиеші қарға жазылған тапсырманы оқиды.

1-тапсырма

Қыс туралы қандай тақпақтар білесіңдер?

1) Қыс келді, қыс келді,
Ақтарып ақ қарды.
Аралап қайтайық,
Ақ күміс бақтарды.

2) Ақ қолғап құшақтап,
Сақылдайды қыс аппақ.
Өзен, теңіз, тау, төбе
Киген аппақ сәукеле.

3) Біз батыл боламыз,
Жылы үй — бақшамыз.
Ақ ұлпа қарлардан
Ақ қала соғамыз.

4) Жапалақтап қар жауып,
Аяз қатты қысқанда,
Жем шашайық қамқор боп
Бақшадағы құстарға.

2-тапсырма

Дамытушы ойындар

  • «Шарбақтың артында…»
  • «Мына суретте не бейнеленген?»
  • «Айырмашылығын тап»

Тапсырмалар орындалған соң, Қызыл телпек пен Сұлу қыз саяхатқа бірге қосылады.

Кездесу: Алтын балық және «Шалқан» ертегісіндегі атай

Атай: Сәлеметсіңдер ме, балалар? Менің көмекшілерім — ит пен мысықты көрдіңдер ме? Бірін-бірі қуып, ойнап кетіпті.

Алтын балық: Мазамды алған балықшыдан, байлыққа тоймаған әжейден әбден шаршадым. Тыныш теңіз іздеп келемін.

Олар да «сиқырлы қарды» ұсынады. Тәрбиеші тапсырманы оқиды.

3-тапсырма

Жұмбақ шешу

  1. 1.Тісі жоқ тістеп алады, қолы жоқ сурет салады. (Аяз)
  2. 2.Суға салсаң батпайды, отқа салсаң жанбайды. (Мұз)
  3. 3.Қысы-жазы бір түсте. (Шырша)
  4. 4.Үй үстінде алтын тас, алайын десем табылмас. (Жұлдыз)

4-тапсырма

Оригами

Мысық, күшік, қоян бейнелерін бүктеу.

Тапсырмалар орындалған соң, атай мен Алтын балық та саяхатқа қосылады.

Кездесу: Пингвин және күлдіргіш (клоун)

Пингвин: Мен суықта, аппақ қардың үстінде мұзды суға шомылғанды жақсы көремін. Күлдіргіштің жылағанын естіп, шыдай алмадым.

Күлдіргіш: Цирктен адасып қалдым. Барар жолды көрсетсеңдер екен.

Олар «сиқырлы қарды» ұсынады.

5-тапсырма

Құрастыру

«Қол орамалды жамау» (бөліктерді сәйкестендіріп құрастыру).

6-тапсырма

Дамытушы ойын

«Емен ағашының артында нелер жасырынған?»

Тапсырмалар орындалған соң, Пингвин мен күлдіргіш те бірге жүреді.

Кездесу: Аққала және көктемнің нышаны

Аққала:
Қардан аппақ домалатып жасалған —
Өзім сұлу, өзім нағыз қар адам.
Ыстықтап кеттім, еріп бара жатқан сияқтымын…
Мыналар не өзі?

Балалар: Бұл — бәйшешек!

Аққала: Қар астынан бәйшешек шығыпты — демек, көктем де келіпті. Мен сендермен қоштасайын. Сендерге сыйлығым — сиқырлы қар.

7-тапсырма

Дәптермен жұмыс

Берілген тапсырмаларды дәптерде орындау.

Қорытынды: «Жеті сиқырлы қар» және мейірімнің жылуы

Барлық тапсырма сәтті орындалды. Айналаға көз жүгіртсек, жеті сиқырлы қар жеті түске боялғандай әсер қалдырады. Қар астынан бәйшешектер қылтиып шығып, алғашқы кемпірқосақ көрінеді. Мұздар еріп, балалардың жүрек жылуы мәңгі мұз болып қатқан Қарлы ханымның да көңілін жібітеді.

Қарлы ханымның алғысы

Қарлы ханым:
Сендерге көп рақмет! Білімдеріңді көрсеттіңдер: ақылды да зейінді екендерің байқалды. Бауырсақ, саған сәт сапар! Ал сендерді ойын алаңына шақырамын. Жүріңдер!

Ертегі қалашығындағы саяхат аяқталады.