Патшаның басы ақылсыз
Алтын күз мерекесінің көрінісі
«Аяулы күз, Алтын күз» атты кішкентай ханзада мен кішкентай ханшайым сайысы фанфар үнімен ашылады. Сахна ортасында «Балауса» балабақшасының биші қыздары «Көбелек» биін орындайды.
Ертегіден бастау алған ой
Авторлық баяндау
Ерте, ерте, ертеде — ешкі жүні бөртеде — бір патша өмір сүріпті. Ол патша тасқындай қатал, мейірімсіз, қатыгез болыпты; қара халыққа қайырымсыз екен. Сараңдығы мен өзімшілдігі сондай, қол астындағы жұрттан ұнамды, жақсы нәрсе көрсе, тартып алып, бұқараға күн көрсетпепті.
Түс және торғайдың сұрағы
Бір күні патша терең ұйқыға кетеді. Түсінде шиқылдап бір торғай ұшып келіп:
— Кімнің басы ақылсыз? — Патшаның басы ақылсыз.
— Кімнің жаны рақымсыз? — Патшаның жаны рақымсыз.
— Тағы айтарым бар…
Торғай тағы да «Кімнің басы ақылсыз?» деп қайталағанда, патша шыдай алмай: «Тоқтат, торғай!» — деп айқайлап, шошып оянады.
Уәзірдің жорығы
Қатты қорыққан патша дереу уәзірлерін шақырып: «Мен түс көрдім. Түсімде торғай маған “ақылсызсың” деп айқай салды. Осы түсті жақсы жорып беретін адамға ат басындай алтын беремін» — дейді.
Сонда бір уәзір ортаға шығып: «Ұлы мәртебелі патшам, қара халыққа қатал да мейірімсіз болмаңыз. Халықтың көңілін көтеру үшін сарайда ойын-сауық ұйымдастырыңыз. Жұрт разы болса ғана арманыңызға жетесіз» — деп ақыл айтады.
Патша бұйырып: «Ендеше, нені күтіп тұрсыңдар? Жақсы бір ойын-сауық кешін бастамаймыз ба?» — дейді.
Салтанатты кештің ашылуы
Екі жүргізушінің қошеметі
1-жүргізуші: Армысыздар, ата-аналар, шақырылған қонақтар және бүлдіршіндер!
2-жүргізуші: Қайырлы күн, құрметті қонақтар, жас достар! Берекелі де мерекелі «Аяулы күз, Алтын күз» атты кішкентай ханзада мен кішкентай ханшайым байқауына қош келдіңіздер!
Күз — береке айы
1-жүргізуші: Күз айы — мерекелі ай. Қырман толып, халқымыздың ырысы артатын берекелі кезең. Келесі күзге дейін жүрегімізде сақталатындай арман сезімін себелеп, үнемі асқақ мұраттарға жетелейтін қасиетті ай. Ендеше, келіп отырған Алтын күз мерекесі әрбір жанға құт пен береке, ырыс пен табыс әкелсін!
Байқаудың мақсаты
2-жүргізуші: Бүгінгі байқаудың негізгі мақсаты — жаңа ғасырдың ұлы көшінде егемендігі еңселенген Тәуелсіз Қазақстанда өсіп келе жатқан жастарымыздың рухын көтеру, эстетикалық талғамын арттыру. Сондай-ақ өнерге, сезімталдыққа, сыпайылыққа, мейірбандылыққа, адалдыққа және еңбекқорлыққа тәрбиелеу.
Күз туралы жыр
1-жүргізуші:
Күздің желі гуілдейді бір сарын,
Ұшсын желмен жүрегімде тұнған мұң.
Қоштасады шыр айналып жапырақ,
Қоштаспасын тек жаздағы жыр-сағым.
2-жүргізуші:
Әр мезгілдің бар ерекше асылы,
Күзге бірақ көңілім сәл жасыды.
Қалғытпа тек қысы-жазы жырымды,
Жаз — ғұмырдың жүректегі жасығы.
Үміткерлерді сахнаға шақыру
1-жүргізуші: Олай болса, «Аяулы күз, Алтын күз» тақырыбындағы «Кішкентай ханзада мен кішкентай ханшайым» сайысымызға қатысатын үміткерлерді қошеметпен ортамызға шақырайық.
2-жүргізуші: Қарсы алыңыздар — кешіміздің үміткер ханзадалары мен ханшайымдары!