Бақылау барысы

Серуен №1: Бұлттарды бақылау

Мақсаты: өлі табиғат құбылыстары туралы білімдерін бекіту, табиғатты бақылауға қызығушылықтарын арттыру.

Көркем сөз

«Бұлт» (Ө. Ақыпбекұлы)

Бұлттың қайда тұрағы,
Біле алмадым мұны әлі.
Білерім: көк аспанның
Бұлт — көшпелі бұлағы.

Сұрақтар мен талқылау

Бұлт дегеніміз не?
Бұлттардың түсі қандай болады?
Бұлттар неден тұрады? — сансыз көп су тамшыларынан немесе мұз түйіршіктерінен.
Бұлттардың қандай түрлерін білесіңдер? — түйдек, шарбы, қабат-қабат, түнерген найзағайлы бұлттар.
Неге түйдек бұлттар дейміз? — олар аспанда түйдек-түйдек болып көрінеді.
Шарбы бұлттар неге ұқсайды? — ақ ұлпаға, мамыққа; мұқият қарасаң, таныс бейнелерді көруге болады.
Ең үлкен бұлттар қайсысы? — түнерген найзағайлы бұлттар.
Қандай бұлттар жаңбыр әкеледі? — түйдек бұлттар және түнерген бұлттар.
Бұлттар неліктен аспанда қозғалады? — оларды жел айдайды.

Зерттеу жұмысы

Аспандағы бұлттың түрін анықтау.
Өлі және тірі табиғатқа ұқсайтын бұлттарды табу.

Еңбек

Алаңды егу жұмыстарына дайындау: қоқыс жинау, сыпыру.

Мақсаты: бірлесе жұмыс істеуге ынталарын қалыптастыру.

Ойындар

Қимылды ойын: «Қасқыр қақпан»

Мақсаты: ережені түсініп, шартын сақтап ойнауға, ептілікке және алғырлыққа баулу.

Жеке жұмыс: математикалық жаттығулар

Мақсаты: тақ және жұп сандарды санай білу дағдыларын жетілдіру.

Серуен №2: Желді бақылау

Мақсаты: жел туралы түсініктерін бекіту және жел түрлерін есте сақтау.

Жұмбақ

Ағаштарды шайқайды,
Көзге көрінбейді.
Шарлағанда сай-сайды,
Бір сәт ерінбейді.
(Жел)

Бақылау және түсіндіру

Балалар айналаны бақылап, ағаш бұтақтарының қалай шайқалатынын байқайды. Әңгіме барысында желдің қалай пайда болатыны түсіндіріледі: атмосферада ауа әртүрлі қызады. Жылы ауа жеңіл болғандықтан жоғары көтеріледі, ал суық ауа ауырлап төмен түседі. Осы қозғалыстан жел пайда болады. Желдің күші жылы және суық ауаның температура айырмашылығына байланысты.

Желдің қандай түрлері болады?
Жел неге соғады?
Қатты жел қалай аталады? — дауыл, құйын, бұрқасын, боран.
Әлсіз желді қалай атайды? — самал жел.
Желдің ізін көруге бола ма?

Зерттеу жұмысы

Компас арқылы желдің бағытын анықтау.

Еңбек

Гүл өсіретін клумбаға арналған алаңды дайындау.

Мақсаты: бірлесе жұмыс істеу дағдыларын бекітіп, тапсырманы ықыласпен орындау.

Ойындар

Қимылды ойын: «Кім жылдам?»

Мақсаты: жүгіруге жаттықтыру, жылдамдықты дамыту.

Жаттығу ойыны: бір-біріне доп лақтыру

Мақсаты: қимыл-қозғалыс координациясын дамыту.

Серуен №3: Гүлзарды бақылау

Мақсаты: көктемгі гүлзар туралы түсініктерін кеңейту, өсімдіктерді күту және суару дағдыларын бекіту. Табиғатты сүюге, оның әсемдігін сезінуге тәрбиелеу.

Әңгімелесу сұрақтары

Қандай үй гүлдерін білесіңдер?
Қандай дала гүлдерін білесіңдер?
Олардың қандай айырмашылығы бар?
Сендерге қандай гүлдер ұнайды? Неліктен?
Үйде гүл бар ма? Қандай?
Гүлдерді қалай күтесіңдер?
Гүлдер жақсы өсуі үшін не істеу керек?

Еңбек

Гүл егетін алаңда жұмыс: тазалау, топырақты қопсыту.

Мақсаты: бірлесе жұмыс істеу іскерліктерін бекіту және гүлдердің өсуі туралы түсініктерін қалыптастыру.

Қимылды ойын

«Қай топ тез жиналады?»

Серуен №4: Жәндіктерді бақылау

Мақсаты: «жәндіктер» сөзінің мағынасын бекіту, тіршілік ету ерекшеліктеріне қарай салыстыра білуге үйрету.

Жұмбақтар

Гүлдердің нәрін жинайды,
Адамға бал сыйлайды.
Еңбекқорды аялайды,
Еріншекті аямайды.
(Ара)

Ызыңдап ән салады,
Жұп-жұқа қанаты.
Тәттіге тамсанып,
Қоқысқа қонады.
(Шыбын)

Тор тоқуға шебер-ақ,
Бірақ киім тікпейді.
Өнері де өнер-ақ,
Бірақ ісі бітпейді.
(Өрмекші)

Қанды сорып сүліктей,
Ызыңдап кеп шағады.
Бұл қандай бүлік той?
(Маса)

Құжынаған жұмыскер,
Бірлескенде тым іскер.
(Құмырсқа)

Сұрақтар мен қорытынды

Жұмбақтардың жауабын бір сөзбен қалай атаймыз? — жәндіктер.
Тағы қандай жәндіктерді білесіңдер? — көбелек, құрт және т.б.
Қандай жәндік гүлдерді тозаңдандырады? — аралар.
Жәндіктер қайда тіршілік етеді? — бақтарда, ағаштарда, су тоғандарының маңында.
Неліктен масаны зиянды жәндік деп атаймыз? — ол әртүрлі ауруларды тасымалдауы мүмкін.

Зерттеу жұмысы

Қаңқызды тауып, атын атау.
Құмырсқалардың соқпағын тауып, бақылау.

Еңбек

Алаңды қоқыстан тазалау.

Мақсаты: үлкендерге көмектесуге, олардың еңбегін қадірлеуге тәрбиелеу.

Қимылды ойын

«Аюлар мен аралар»