Қазақша рефераттар

Тренинг барысы

Тренингтің мақсаты мен құрылымы

Бұл тренингтің негізгі мақсаты — адам бойындағы ішкі сезімдерді еркін жеткізе білу, кез келген қиын жағдайдан шығудың жолын табу және қарым-қатынасты нығайту. Жаттығулар қатысушылардың өзін-өзі қабылдауын күшейтіп, өзіне деген сенімділігін арттыруға бағытталған.

Көрнекіліктер

  • Түрлі-түсті қарындаштар
  • Ақ қағаз (парақ)
  • Сазды әуен

Әдіс-тәсілдер

  • Тест
  • Психологиялық жаттығулар

Күтілетін нәтиже

  • Эмоцияны тану және жеткізу
  • Өзін-өзі бағалауды нығайту
  • Коммуникацияны жақсарту

Тренинг барысы: «Сенім мен сезім»

Қатысушылармен амандасқаннан кейін тренингтің мақсаты түсіндіріледі: әрқайсымыздың өзімізге деген сенімімізді күшейтіп, сезімімізді ашық білдіруді үйрену. Кездесу жылы, қолдаушы атмосферада өтеді.

1) «Сәлемдесу» жаттығуы

Қатысушылар шеңбер бойымен тұрады. Әр адам көршісін ортаға бір-бірден шығарып, өзіне ұнаған тәсілмен таныстырады.

Мысал: «Айгерім — ақылды, жұмыста беделді, ибалы да инабатты ару».

Талқылау сұрағы

Бір-біріңізді жылы ілтипатпен таныстырған кезде өзіңізді қалай сезіндіңіз?

2) «Бүгінгі менің көңіл-күйім» жаттығуы

Қатысушыларға айна таратылады. Айнаға қарап, берілген эмоцияларды мимика арқылы сомдап көрсетеді.

  • Ащы лимон жегендегі кейіп
  • Тәтті шоколад жегендегі кейіп
  • Бастық ұрысқандағы кейіп
  • Қатты қуанғандағы кейіп
  • Айнаға қарап әдемі күлімдеу
  • Айнаға қарап ашулану

3) «Аң-жәндік» жаттығуы

Параққа екі баған жасайсыз: бірінші қатарға — ұнайтын аңның атын, екінші қатарға — ұнайтын жәндіктің атын жазасыз. Кейін таңдаған сөздерді төмендегі сөйлемдердегі көп нүктенің орнына қоясыз.

  1. 1.Мені жұрт __________ деп ойлайды.
  2. 2.Мені __________ деп ойласа екен деймін.
  3. 3.Дәл өзім __________.
  4. 4.Мен жұмыста __________.
  5. 5.Жарыңыздың алдында __________.
  6. 6.Негізі мен __________.
  7. 7.Достар арасында __________.

Қимыл-қозғалыс және өзін-өзі бақылау

4) «Ормандағы ағаш» жаттығуы

Біз — ормандағы ағаштармыз. Орнымыздан тұрып, күнге талпынған ағаш бейнесін жасаймыз. Жүргізуші айтқан нұсқауларды қимылмен орындаймыз.

Жапырақтар жайнайды

Барлығымыз жымиып тұрамыз.

Жел соғады

Қолымызды жоғары көтеріп, жаймен қозғаймыз.

Жел қатты соғады

Қолымызды тез-тез қимылдатамыз.

Қара бұлт келеді

Көзімізді жұмып, бұлттың бейнесін жасаймыз.

Жаңбыр жауады

Қолымызды шапалақтаймыз.

Аспан күркірейді

Аяғымызбен жерді соғамыз.

Жаңбыр күшейеді

Қолымызды тез-тез шапалақтаймыз.

Жаңбыр саябырлайды

Қолымызды жаймен қозғалтамыз.

Жапырақтар суды сілкіп тастайды

Орнымызда жеңіл секіреміз.

5) «Сіздің көңіл-күйіңіз» сурет тапсырмасы

Қатысушыларға ағаш бұтағы салынған, бірақ толық аяқталмаған сурет беріледі. Өз көзқарасыңызға сүйеніп, жетіспейтін бөліктерін толықтырыңыз. Ұзақ ойланбаңыз: ойыңызға ең бірінші не келсе, соны салыңыз.

Сурет арқылы қазіргі сезіміңізді ашып көрсетуге тырысыңыз.

Тесттің кілті (түсіндіру)

Бұтақты ашық түспен жүргізіп, басқа ешнәрсе қоспасаңыз

Қазіргі сәтте сіз күрделі күйзеліс кезеңінде болуыңыз мүмкін. Бұл көбіне жеке өмірден бөлек, мамандықпен немесе оқумен байланысты мәселені меңзейді.

Бұтақтардың барлығын толық боясаңыз

Сіз бір нәрсеге қатты ренжігенсіз (немесе сол күйге жеткізілгенсіз). Ішкі шиеленіс суреттен байқалады: реніш болмағанның өзінде сезімді сыртқа шығаруға дайын тұруыңыз мүмкін.

Бұтақтарға жапырақ салсаңыз

Ішкі жан дүниеңіз салыстырмалы түрде тепе-тең күйде.

  • Жапырақтар төменгі бөлікте көбірек болса — ойлануға, талдауға бейімсіз.
  • Жапырақтар жоғарғы бөлікте көбірек болса — әрекетке белсенді кірісуге дайынсыз, күшіңіз бар.
  • Жапырақты жеке-жеке бөлмей, тұтас берсеңіз — көңілді, бақытты болуға күш жұмсап жүрсіз; ой шаршауы байқалуы мүмкін.

Ағаш қабығын ерекше мұқият салсаңыз

Жұмысқа берілгендігіңіз жоғары. Уақытты зая кетірмей, іспен айналысуға бейімсіз; бастағаныңыздың нәтижесіне жете аласыз.

Бұтаққа құс немесе жануар салсаңыз

Сізге қарым-қатынас жетіспеуі мүмкін: жақындарыңызбен сөйлескіңіз келеді, ойыңыз бен сезіміңізді бөлісуге ішкі қажеттілік бар.

Егер салған құс/жануар ұсақ болса — бұл қобалжудың белгісі болуы ықтимал. Қандай жағдай болса да, ой бөлісу пайдалы.

Бірнеше жануарлар мен құстарды салсаңыз

Жаныңыз тыныштық іздейді, бірақ оны табу қиындап тұрғандай. Ой көп, ішкі реттеу қажет болуы мүмкін.

Қорытынды: тілек айту және бекіту

Тренинг соңында қатысушыларға гүл, жапырақша немесе жүрекше пішіндері таратылады. Әр адам әріптесіне арнап тілек жазады: кімге арналғанын және кімнен екенін көрсету маңызды.

Жазылған тілектерді дауыстап оқып, барлығымыз бірігіп, өмірге деген нық сеніммен «ағашқа жан бітіреміз». Бұл символдық қадам ортақ қолдауды, жылы қарым-қатынасты және өз-өзіне сенуді күшейтеді.

Біз кез келген қиындықты еңсере аламыз. Өйткені біз өзімізге сенеміз.

Автор туралы

Маңғыстау облысы, Түпқараған ауданы, Форт-Шевченко қаласы, Баутин ауылы, «Ақбота» балабақшасының психологы — Тогаева Акелик Утелгеновна.