Қоғамдық орында көбірек болу
Адам өзін бағалай алмаса, өз мүмкіндіктеріне, бойындағы күшіне және тартымдылығына деген сенім әлсірейді. Мұндай күй өмірді күрделендіріп, қуаныштан алыстатады. Бірақ өзін бағалаумен қатар, өз-өзіне сенуді үйренуге болады: бұл жолда қиындықтар кездескенімен, жүйелі әрекет еткен адам міндетті түрде нәтижеге жетеді.
Адамдар ақыл-ойы мен мінез-құлқы, құндылықтары мен талпынысы арқылы ерекшеленеді. Дегенмен көпшілік өз бойындағы жақсы қасиеттері бола тұра, сырт келбетіндегі болмашы кемшілікке бола өзін төмен санайды. Бұл — өз-өзіне сенімсіздіктің жиі кездесетін себебі.
Өзіңізді бағалау — келбеттің «көрікті» не «көріксіз» болуына тәуелді емес. Өзіңізді қалай жаратылсаңыз, сол күйіңізде қабылдап, құрметтей алмасаңыз, ішкі бақытты тұрақты сезіну қиын. Сондықтан ең әуелі бір қадам жасаңыз: өзіңізді кінәлаудан емес, өзіңізді сүюден бастаңыз.
«Жаңа өмір бастаймын» деп ойлау ғана жеткіліксіз — өзгеріс нақты әдеттер арқылы қалыптасады. Төмендегі ережелер өзіңізге сенімділікті нығайтуға көмектеседі; қажет тұстарын таңдап алып, күнделікті өмірге енгізіп көріңіз.
Өзіңізге сенімділікті арттыратын 8 ереже
Адамдармен көбірек тілдесіңіз
Өзіңізге сенімді болу үшін жұмыста, үйде, көршілермен немесе таныстармен жиі қарым-қатынас жасаңыз. Бұл — табиғи «жаттығу»: уақыт өте кез келген адаммен тіл табысу жеңілдейді.
Сыртқы келбетіңізге уақыт бөліңіз
Сырт келбет — өзіңізге деген көзқарасқа әсер ететін маңызды бөлік. Таза, ұқыпты киіну, киімнің үтіктелуіне мән беру, гардеробты реттеу — бәрі де ішкі жинақылықты күшейтеді.
Өзіңізге жарасымды киімдерді таңдаңыз, үстіңізге қонымдылығын қадағалаңыз. Тән сұлулығы жан сұлулығымен үндескенде ғана үйлесім пайда болады. Айнадан жинақы, ұқыпты бейнені көрген сайын сенім мен өзіңізге деген құрмет артады.
Өзіңізді ешқашан өзгемен салыстырмаңыз
Өзгені «талантты», «тартымды», «сәтті» деп, өзіңізді кемсіту — сенімге үлкен соққы. Әр адамның өзіне тән ерекшелігі бар.
Қарапайым тәсіл: қағаз бен қалам алып, өзіңіздегі жетістіктер мен кемшіліктерді екі бөлек жазыңыз. Көп жағдайда жетістіктеріңіздің саны басым екенін көресіз.
Өзіңізді жиі мақтаңыз
Жетістік пен табыс үшін өзіңізді мақтауды ұмытпаңыз. Жақындарыңызға да жақсы жаңалықтарыңызды айтуға болады — бұл мотивацияны арттырады.
Үлкен нәтиже бірден келмейді: мол табыс пен биік мақсатқа апаратын жол кішкентай жеңістерден басталады. Аз ғана жетістікке қуана біліңіз — бұл мақтауға әбден лайық.
Арман-мақсатыңызға қарай қадам жасаңыз
Өзіңізді жақсы көріп, өзіңізге сену үшін үздіксіз даму қажет. Өз идеалыңызды анықтап, сол бейнеге жақындауға тырысыңыз.
Бұл мақсат «оңай» не «қиын» деп алдын ала күмәнданбаңыз. Сабыр сақтап, ерінбей әрекет етсеңіз, нәтиже бір аптада болмаса — бір айда, болмаса — бір жылда міндетті түрде көрінеді.
Қоғамдық орындарда жиірек болыңыз
Сенімділікті арттырудың тиімді жолы — адамдардың арасында көбірек болу. Бос уақытта мейрамхана, кино, театр, мұз айдыны, саябаққа барыңыз немесе жай ғана дүкен аралаңыз.
Үйде тұйықталып қалмаңыз. Демалыс күні немесе жұмыстан кейін қайда баратыныңызды алдын ала жоспарлаңыз: орта ауысқанда көңіл күй де сергіп, мұңаю азаяды.
Суретке жиі түсіңіз
Суретке түсуді ұнататын адамдар көбіне ашық келеді. «Әдемі шықтым ба, шықпадым ба?» деген ойды бірінші орынға қоймаңыз: сурет — өзіңізді сырт көзбен байқап, қимыл-қалпыңызды түсінуге көмектеседі.
Арнайы орын іздеудің қажеті жоқ — қай жерде жүрсеңіз де түсіңіз. Ең бастысы, тұйықталып қалмай, өзіңізге де, айналаңызға да ашыла білу.
Жаңа заттар сатып алыңыз
Тозған киім адамға сенім қоспайды. Жаңа киім тек сыртқы бейнені жаңартпайды — көңілге де қуат береді. Сатып алғанда ең әуелі бағасына емес, денеңізге қонымдылығына мән беріңіз: кейде арзан киімнің өзі өте жарасымды болуы мүмкін.
Егер дәл қазір гардеробты толық жаңартуға мүмкіндік болмаса, өзіңізді күтуге арналған ұсақ-түйек заттар (косметика, күтім құралдары және т.б.) алып, көңіл күйді көтеруге болады.
Ең маңыздысы — өзіңізге шынайы болу
Өзіңізді сүю — аса күрделі нәрсе емес, тек өз-өзіңізді алдамау керек. Бұл бір күнде немесе бір аптада аяқталатын шаруа емес: сенім мен ішкі сүйіспеншілік уақыт өте қалыптасады.
Басқалардың пікіріне бола бас қатырудың қажеті жоқ. Ең маңыздысы — сіз туралы жақындарыңыздың және өзіңіздің ойыңыз. Осыны түсінген сәтте өзіңізге деген сенім де, құрмет те күшейеді.
Дайындаған: Асыл
Сіздің де қосарыңыз болса, пікір қалдырыңыз немесе пошта арқылы жолдаңыз — ұсыныстарыңыз сайтта жарияланады.