Қазақша рефераттар

Ойшылдар тобына

Ашық тәрбие сағаты 1-сынып Сайыс форматы

Мақал — сөздің мәйегі

Бұл тәрбие сағаты оқушыларды топпен жұмыс істеуге, бір-бірінің еңбегін бағалауға және өз ойын жүйелі жеткізуге үйретуге бағытталған. Сонымен қатар балалардың шеберлігін, ой-өрісін, қызығушылығын дамытып, ұйымшылдыққа, шапшаңдыққа, тапқырлыққа тәрбиелеуді көздейді.

Қатысушылар

Ойынға 6 баладан құралған 3 топ қатысады. Қатысушылар саны — 18 оқушы.

Құрылымы

Сайыс 5 кезеңнен тұрады. Әр кезең соңында топтар ұпайларын шығарып отырады.

Жеңімпазды анықтау

Барлық айналымнан кейін ең көп ұпай жинаған топ жеңімпаз атанады. Жауап дайын болғанда белгі беріледі, жылдам жауап берген топ ұпай алады.

Шаттық шеңбері

Балалар, көңіліміздің кілті — езуімізде. Әрдайым күліп, жан-жағымызға күлкі сыйлайық!

Кел, балалар, күлейік,
Күлкіменен түлейік.
Қабақ шытып не керек,
Көңілді болып жүрейік!

Мұғалімнің кіріспе сөзі

Жақсы болу — өзіңнен,
Жаман болу — өзіңнен.
Өзіңді өзің ая да,
Өзің үйрен өзіңнен.

Жақсылық көрсең біреуден, «Мен қандаймын?» деп ойла.
Жамандық көрсең біреуден, «Мен қандаймын?» деп ойла.

Осы сөздермен бүгінгі «Мақал — сөздің мәйегі» сайысына қош келдіңіздер! Ойынымыз ерекше: ұстаздарымыз қонақта, ал біз командамен жұмыс істейміз.

Ойын шарты

  • Сайыс мақал-мәтелдер, жұмбақтар және логикалық сұрақтардан тұрады.
  • Сұрақты мұқият тыңдап, топпен ақылдасып жауап беру қажет.
  • Әр дұрыс жауап үшін ұпай беріледі; шапшаң әрі нақты жауап маңызды.

1-кезең: «Ойлан да, аяқта»

Бұл кезеңде топтарға аяқталмаған мақал-мәтелдер беріледі. Міндет — мақалдың жалғасын дұрыс табу.

«Ойшылдар» тобы

  • Еңбек етсең ерінбей, тояды қарның тіленбей.
  • Әдепті бала — арлы бала, әдепсіз бала — сорлы бала.
  • Отансыз адам — ормансыз бұлбұл.
  • Ақыл азбайды, білім тозбайды.
  • Дұшпан күлдіріп айтады, дос жылатып айтады.

«Білімпаздар» тобы

  • Ағаш көркі — жапырақ, адам көркі — шүберек.
  • Өнер алды — қызыл тіл.
  • Туған жердің күні де, түні де ыстық.
  • Жаңбырмен жер көгерер, батамен ел көгерер.
  • Кітап — білім бұлағы, білім — өмір шырағы.

«Талаптылар» тобы

  • Еңбек етсең емерсің.
  • Бірлік болмай, тірлік болмас.
  • Досы көпті жау алмайды, ақылы көпті дау алмайды.
  • Ел іші — алтын бесік.
  • Көп сөз — көмір, аз сөз — алтын.

2-кезең: «Кім көп біледі?»

Әр топтың топ басшысы мақал-мәтел тақырыбын таңдайды. Топтар өз тақырыбына сай мақал-мәтелдерді жазады.

Отан Еңбек Достық

Одан кейін қысқа сергіту сәті ұйымдастырылады.

3-кезең: Суретті сөзжұмбақ

Интерактивті тақтада суретті сөзжұмбақтар көрсетіледі. Топ мүшелері бірігіп, сөзжұмбақтардың шешімін табады.

Ескерту: Бұл кезең оқушылардың байқағыштығын және бірлесе шешім қабылдауын күшейтеді.

4-кезең: «Жасырдым жұмбақ»

Бұл кезеңде сайыскерлер жұмбақтың шешімін қазақ және орыс тілдерінде айтып, сол жауапқа байланысты мақал-мәтел құрастырады.

1-жұмбақ

Жауабы: кітап / книга

Қабат-қабат қаптама, ақылды болсаң аттама.

2-жұмбақ

Жауабы: ат / конь

Мінсең — көлік, жесең — тамақ.

3-жұмбақ

Жауабы: қоян / заяц

Орғыған қорқақ, өзі қыли, қыс пен жазда екі түрлі тон киеді.

4-жұмбақ

Жауабы: су / вода

Жылт-жылт еткен, жылғадан өткен.

5-жұмбақ

Жауабы: қарға / ворона

Қара түсті қарқылдақ, ұшып-қонып жалпылдап, қоқыстарды шоқитын — қандай құс күн бойы жем іздейді?

6-жұмбақ

Жауабы: аққу / лебедь

Көл бетінде қалқиды, мақта сынды үйілген. Үні әсем сан қилы, мойны садақ иілген. Мамығын ол тарайды, маңғаздана қарайды. Бұл қандай құс?

5-кезең: «Біліміңді мықта»

Қисын-логикалық есептер мен сұрақтар арқылы топтардың ойлау жылдамдығы мен дәлдігі сыналады.

«Ойшылдар» тобы

  1. Егер тырна бір аяғымен тұрса 3 кг болса, екі аяғымен тұрса салмағы қанша?
  2. Бір отбасында 5 бала бар және олардың әрқайсысының бір қарындасы бар. Отбасында қанша бала?
  3. Сенбіден кейін екі күн өткен соң қай күн келеді?
  4. Қос ат жегілген арба 40 шақырым жүрді. Бір ат неше шақырым жүрді?
  5. Түнгі сағат 10-да жаңбыр жауып тұр. 24 сағаттан кейін күн шығуы мүмкін бе?

Жауаптары

  • 1) 3 кг
  • 2) 6 бала
  • 3) Дүйсенбі
  • 4) 40 шақырым
  • 5) Жоқ (24 сағат — 1 тәулік, ол кезде түн болады)

«Білімпаздар» тобы

  1. Бір айда бес жексенбі бола ма?
  2. Сиыр 4 аяғымен тұрса 200 кг болса, 2 аяғымен тұрса неше килограмм?
  3. Күн жылына неше рет шығады?
  4. Үш қыз бір сыныпта оқиды: Айгүл, Әсем, Әлия. Айгүл Әсемнен үлкен, Әсем Әлиядан үлкен. Ең үлкені кім?
  5. Алманың жартысы неге ұқсайды?

Жауаптары

  • 1) Жоқ (айда 35 күн болмайды)
  • 2) 200 кг
  • 3) 365–366 рет
  • 4) Айгүл
  • 5) Екінші жартысына

«Талаптылар» тобы

  1. Үстел беті төртбұрышты. Оның бір бұрышын арамен кесіп тастасақ, неше бұрыш қалады?
  2. Төрт жұмыртқа төрт минутта піссе, екі жұмыртқа неше минутта піседі?
  3. Күн мен түн неге аяқталады?
  4. Жолда үш велосипедші жарысып келеді. Алдынан қарағай шықты. Ол қарағайда 4 алма бар. Велосипедшілер қалай бөліп алады?
  5. Бір қазақ қалаға бара жатыр еді, жолда үш танысы қарсы шықты. Қанша адам қалаға барды?

Жауаптары

  • 1) 5 бұрыш
  • 2) 4 минут
  • 3) «н» әрпіне
  • 4) Қарағайда алма өспейді
  • 5) 1 адам

Қорытынды

Қазылар алқасына сөз

Қазылар орнықтырар әділдікті,
Кімдердің жауаптары кәміл шықты.
Білім мен тапқырлықтың жарысында,
Жеңіске жетер дейміз нағыз мықты.

Осымен «Мақал — сөздің мәйегі» атты сайысымыз аяқталды. Талаптарыңа нұр жаусын! Ендігі сөз кезегі — әділ қазыларға.

Ақпарат

Мекеме
Ақтөбе облысы, Мәртөк ауданы, Мәртөк селосы, №1 Мәртөк орта мектебі
Дайындаған
Бастауыш сынып мұғалімі: Зулкакова Баян Тулегеновна