Отбасы - шағын мемлекет
Мақсаты
Бала тәрбиесінің алғашқы қазығы — туған ұя, өз отбасындағы ата-ана тәрбиесі екенін түсіндіру; отбасы сыйластығын нығайту; балаларға қамқорлық жасап отырған ата-аналарға қолдау көрсету.
Негізгі ой
Отбасы — тәлім мен тәрбиенің бастау бұлағы.
Құндылық
Мейірім, адамгершілік, сыйластық пен жауапкершілік.
Қолдау
Баласын аялап өсіріп отырған ата-ананы қадірлеу және көтермелеу.
Кештің басталуы
1-жүргізуші: Армысыздар, құрметті ата-аналар, ұстаздар, оқушылар! Бүгінгі «Аялы алақан» атты мерекелік кешімізге қош келдіңіздер.
2-жүргізуші: Отбасы — шағын мемлекет. Ол — тәлім мен тәрбиенің, үлгі мен өнегенің, мейірімділік пен адамгершіліктің ордасы. Адам баласының өмірге келгеннен кейінгі бар тіршілігі отбасында өтеді.
1-жүргізуші: Отбасы — алтын ұя, киелі шаңырақ. Сол шаңырақтың мұрагері, ұрпақ жалғасы — бала. Баланың негізгі тәрбиесі ең алдымен ата-анадан басталады. Сондықтан баланың бас ұстазы — ата-ана.
Ұлы Абай: «Ата-анаға көз қуаныш — алдына алған еркесі. Көкірегіне көп жұбаныш, гүлденіп ой өлкесі» — деп жырлаған.
Музыкалық номер
Ән: «Анашым» (құрметті аналарға арналады).
Салтанатты ашылу
2-жүргізуші: Бүгінгі мерекелік кештің салтанатты ашылуы үшін ортаға мектеп басшысын шақырамыз.
1-жүргізуші: О, ата-ана! Таянышы, тірегі… Бар бақытты бір басыңа тілейді. Балаларым жақсы болсын деп қашанда, лүпілдейді сенің қамқор жүрегің.
2-жүргізуші: Шариғатта да отбасы жоғары бағаланып, бала тәрбиелеп өсіруге бірінші дәрежелі мән берілген. «Балалар — ата-ана қолына берілген аяулы аманат» делінген. Әрбір ата-ана баласының білімді, мәдениетті, тәртіпті, әдепті болғанын қалайды.
Ортамызда «Баламның табанына кірген шөңге менің маңдайыма қадалсын» деп, перзентін әлпештеп өсірген аяулы аналарымыз отыр.
Марапаттау сәттері
Бүгінгі мерекенің ең салтанатты сәті — отбасына жылу сыйлап жүрген асыл жандарды ұлықтау. Номинациялар арқылы ата-аналар еңбегіне алғыс білдіріледі.
«Жылы жүрек»
Балаға жүрек жылуын, аналық мейірімін, қамқорлығын аямай беріп отырған аналарды марапаттау.
Марапаттау: «Жылы жүрек» номинациясы бойынша.
Ән: «Мама»
Қамқорым, асыл анам, ғазиз анам… Өмірде еш жамандық көрмей жүрші — тілерім осы ғана.
«Болашаққа үлес»
Білім саласында көзге түсіп жүрген оқушылардың ата-аналарын марапаттау.
Марапаттау: «Болашаққа үлес» номинациясы бойынша.
Ән: «Асыл әжем»
Сырымды менің бес саусақтай біледі… Қамқор жанды одан басқа көргем жоқ.
«Спортқа үлес»
Спортта биік жетістікке жеткен жас ұрпақты тәрбиелеп отырған ата-аналарды марапаттау.
Марапаттау: «Спортқа үлес» номинациясы бойынша.
Ән: «Әкелер»
Алдымен сүй ардақты ата-анаңды… Бар жақсылық балаға ата-ананың мейірімінен жасалады.
Ата-аналарға сөз кезегі
1-жүргізуші: Жетекші болып балаңызға жүрдіңіз бе? Бізді ойлап көңіліңіз жүдеді ме? Достарым, тыңдаңыздар ана сөзін — сіздерге арнап айтатын тілегін де.
Сөз кезегі ата-аналарға беріледі.
Музыкалық номер
Ән: «Тәй-тәй»
Тәрбие туралы түйін
2-жүргізуші: Балаға бала күнінде дұрыс тәртіп пен бағыт берілсе, түбінде өнерімен де, мінезімен де қуантады. Бала жастан не білсе, ұядан нені көрсе — соны өмір бойы таниды.
Жүсіп Баласағұнның сөзімен айтқанда: «Өнер-білім берем десең басынан, бер оқуға балаларды жасынан. Ата-анадан өсіп ұрпақ тараған, жақсы-жаман болса бала солардан».
Демек, ата-ананың бақыты — баланың дұрыс адам болып өсуі. Ал балаларыңыздың өздеріңізге бақыт сыйлайтын тұлға болып қалыптасуы — ең алдымен сіздерге байланысты.
Музыкалық номер
Ән: «Бір тілек»
Қорытынды
1-жүргізуші: Ата-ана дейміз бәріміз де аңқылдап, ата-ана дейді жас сәби де жарқылдап. Ата-ана деген — бәйтерегі өмірдің; ата-ана деген — алтын қазық, алтын бақ.
2-жүргізуші: Әрбір отбасына күннің шуағындай шаттық, жылылықтай мейірімділік, қуаныш, береке, бақыт тілейміз. Осымен «Аялы алақан» атты кешіміз өз мәресіне жетті.