Қазақша рефераттар

Тәжірибе жасау

Сабақ туралы қысқаша мәлімет

Сабақтың тақырыбы

Су. Судың қасиеттері.

Сабақтың типі

Жаңа материалды меңгерту сабағы.

Сабақтың әдістері

  • Сұрақ-жауап, түсіндіру, әңгімелеу
  • Топтастыру, сызба, топпен жұмыс
  • Практикалық жұмыс, бақылау, талдау, салыстыру
  • Тест тапсырмалары

Сабақтың мақсаты

Білімділік: Оқушыларды судың қандай күйде болатынымен таныстыру. Практикалық жұмыс арқылы бақылау, талдау, салыстыру және қорытынды шығара білуге үйрету.

Дамытушылық: Оқушылардың ойын жүйелі баяндауын, түсініп оқуын, ойлауын және есте сақтау қабілеттерін дамыту.

Тәрбиелік: Табиғатты сүюге, оны қорғауға тәрбиелеу.

Көрнекіліктер мен ресурстар

  • Интерактивті тақта, слайдтар, суреттер
  • Жарты шарлар картасы
  • Үнтаспа
  • Тәжірибеге қажетті заттар

Пәнаралық байланыс

Әдебиеттік оқу.

Сабақтың барысы

1) Ұйымдастыру бөлімі

  • Психологиялық дайындық: су дыбысын тыңдап, сол көңіл күйге сай қимыл-қозғалыс жасау.
  • Оқушыларды топқа бөліп отырғызу.

2) Үй тапсырмасын тексеру (тақырып: Ауа)

I топ

Ауа туралы не білеміз?

II топ

Ауаның қандай қасиеттері бар?

III топ

Ауаның табиғаттағы және адам өміріндегі маңызы қандай?

Еске түсіру: «Не көрдік? Не білдік?»

Бұл бөлімде өткен сабақтарда ауаның қасиеттерін дәлелдейтін тәжірибелерді қайта еске түсіреміз.

  • I топ: Ауаның орын алатынын дәлелдейтін тәжірибе.
  • II топ: Ауаның сығылып, серпілетінін көрсететін тәжірибе.
  • III топ: Оттың жануы үшін ауаның қажеттілігі туралы тәжірибе.

Қорытындылау: «Не үйрендік? Не білдік?»

  • I топ: Ауаның табиғаттағы маңызы.
  • II топ: Ауаның адам өміріндегі маңызы.
  • III топ: Ауаны қорғау жолдары.

Ой қорыту (кесте арқылы)

Негізгі сөз: ауа

Ауаның қасиеттері

Мөлдір, түссіз, иіссіз; пішіні жоқ; сығылады және серпіледі; жылы, салқын, ыстық, суық болады. Ауасыз от жанбайды.

Құрамы және ластану себептері

  • Құрамы: азот, оттегі, көмірқышқыл газы және басқа газдар. Ауа — газдардың қоспасы.
  • Ластану себептері: түрлі қалдықтар, улы газдар, түтін, радиация, ағаш кесу, орман-тоғайдың өртенуі.

Таза ауаны сақтау үшін

Зауыт-фабрикалардың суреттерімен жұмыс жүргізіледі. Әр топтан бір оқушы өз ұсынысын ортаға салады.

3) Жаңа тақырыпқа кіріспе: жұмбақтар

Аяғы жоқ жорғалайды, жүреді,
Аузы да жоқ сыңғырлайды, күледі.
Онсыз бірақ жер бетінде тірлік жоқ,
Айтыңдаршы, осыны кім біледі?

Жауабы: су

Көзге көрінбейді,
Қолға ілінбейді.

Жауабы: ауа

Көзге көрінгенмен,
Ұстасаң қолға ілінбейді.

Жауабы: бу

4) Әдеби байланыс: «Су» өлеңі (Е. Өтетілеуұлы)

Су – тіршілік негізі,
Онсыз өмір сүрмейсің.
Гигиена егізі,
Су деп және білгейсің.

Су – табиғат байлығы,
Өзен-көлге барғайсың.
Кемі екі рет әр күні
Суға түсіп тұрғайсың.

Үйде ванна, душ болса,
Салқын сумен құйынғын.
Ыстық сумен шомылсаң,
Суық сумен жуынғын.

Су сергітер бойыңды,
Онымен дос болғайсың.
Судан кейін сен енді
Ісіңді оңай жалғайсың.

Айналаңды қоршаған
Табиғатты сүйе біл.
Қауіп-қатер төнсе оған,
Қамқорға алып сүйе біл.

Білгін мұны, балалар:
Сусыз құрғақ далалар,
Сусыз қараң далалар.
Ескертеміз бар ұлға,
Ескертеміз бар қызға:
Суды босқа ағызба!

Өлең мазмұны бойынша сұрақтар

  • I топ: «Су – тіршілік көзі» дегенді қалай түсінесің?
  • II топ: Судың қандай пайдасы бар?
  • III топ: Суды қорғау үшін қандай шаралар жүзеге асырылады?

Су туралы түсіндіру: негізгі ұғымдар

Картамен жұмыс

Жарты шарлар картасында су көк түспен белгіленеді. Су Жер шарының төрттен үш бөлігін алып жатыр. Сусыз өмір жоқ: су — тіршіліктің негізі.

Су — сұйық зат. Ол өзен, көл, теңіз және мұхиттарды құрайды. Аспаннан жаңбыр түрінде түседі.

Судың күйлері

  • Күн суытқанда су қатып, мұзға айналады. Мұз бен қар — судың қатты күйі.
  • Дымқыл шүберекпен үстел сүртсек, біраздан соң кебеді: су буға айналып ұшып кетеді.
  • Бу — мөлдір, түссіз газ. Бұл — судың газ күйі.

Судың қасиеттері (тәжірибе арқылы)

1) Пішіні

Судың нақты пішіні болмайды (ыдыс пішінін алады).

2) Түсі

Судың түсі жоқ, ол түссіз.

3) Мөлдірлігі

Су — мөлдір.

4) Дәмі

Судың дәмі жоқ.

5) Иісі

Судың иісі жоқ.

6) Ағуы

Су — сұйық, ағады.

«Су» сөзіне топтастыру

Шық, бу, мұз, тұман, мұздақ, қар, жаңбыр, сел, көл, өзен, теңіз, мұхит.

Қорытынды және бағалау

Сатылай талдау

Бөлім Мазмұны
Тақырып Су
Қасиеттері Түссіз, мөлдір, иіссіз, дәмсіз, пішіні жоқ, ағады.
Пайдасы Тіршілік көзі, табиғат байлығы, тазалық пен гигиенаның негізі.
Өз ойым Суды үнемдеп, ластамай, табиғатты қорғау керек.

Бағалау

Оқушылардың жұмысы су тамшыларын санау тәсілі арқылы бағаланады: әр тапсырма үшін «тамшы» беріледі, соңында жиналған тамшылар саны бойынша қорытынды баға шығарылады.

Негізгі ой

Су — өмірдің өзегі. Оны қорғау мен үнемдеу — әрқайсымыздың ортақ міндетіміз.