Мектепте баламен тығыз байланыста жұмыс жасайтын сынып жетекшісі

Жас ұрпақ тәрбиесіне қойылатын бүгінгі талап — адамгершілік құндылықтарды қастерлейтін, өз Отанын сүйіп, құрметтейтін, кез келген жағдайда өзара қарым-қатынас жасай алатын, өзін-өзі жетілдіру арқылы өмірлік мақсаттарына жете алатын, жеке қызығушылықтары мен қажеттіліктерін қоғам талабымен үйлестіре білетін әлеуметтенген тұлғаны қалыптастыру.

Бұл мақсатқа жету үшін тәрбие үдерісін оңтайлы ұйымдастырып, жеке тұлғаның дамуы мен қалыптасуына ерекше назар аудару қажет. Білім беру жүйесіндегі тәрбие — бүгінгі күннің ең өзекті мәселелерінің бірі. Еліміз өркениетті мемлекеттердің қатарына ену кезеңінде тұрса да, қоғам мүшелерінің рухани әлсіреуіне, қоғамдық сананың төмендеуіне жол беріліп отырғаны жасырын емес.

Қазіргі мектептерде оқу-тәрбие жүйесі нәтижеге бағытталған білім мен тәрбие беруге ұмтылып, түрлі инновациялық әдіс-тәсілдер мен технологияларды тәжірибеге енгізуде. Өйткені бүгінгі кішкентай бүлдіршіндер — ертеңгі елдің болашағы.

Жас шыбықтай иілгіш баланың адамгершілік, азаматтық-патриоттық және басқа да моральдық қасиеттері ең алдымен мектептен бастау алады. Ізгілік дәні олардың бойына дәл осы мектеп кезеңінде себіледі.

Мектепте баламен ең тығыз байланыста жұмыс істейтін тұлға — сынып жетекшісі. Оның байланыс аясы кең, ықпалы айрықша болуы тиіс. Сынып жетекшісі — ұйымдастыру қабілеті жоғары, бала жанын түсінетін мейірімді, адамгершілігі мол, жаңашыл, ізденімпаз, терең ойлы, жан-жақты білімді, өз бойындағы жақсы қасиеттерді бала жүрегіне дарыта білетін ұлағатты ұстаз.

«Сынып жетекшісінің оқушы өміріндегі орны қандай?» деген сауалнама жүргізілгенде, көпшілік оқушы сынып жетекшісін «екінші анам» деп бағалаған. Демек, сынып жетекшісінің басты міндеті — өз сыныбындағы әр оқушыны жан-жақты танып, үнемі байланыста болу.

Мен бастауыш сынып оқушыларына жетекшілік ететіндіктен, жаны нәзік, әр сөзді жүрегіне жақын қабылдайтын балалармен жұмыс істеуде аса сақ болу керек деп есептеймін. Мысалы, оқушыдан тікелей: «Ата-анаңмен қарым-қатынасың қалай?» деп сұрау орынсыз болуы мүмкін.

Сондықтан отбасындағы ахуалды байыппен аңғару үшін «Менің баспанам» әдісін қолданамын. Бұл тәсіл арқылы оқушының ата-анасымен байланысын, көңіл күйін аңғарып, жан дүниесіне бір сәт үңілуге болады.

Ал «Өз қалауың» әдісі бойынша салынған сурет арқылы оқушының арман-мақсатын анықтауға мүмкіндік туады.

Сынып жетекшісінің жоспарында ата-анамен жұмыс алдыңғы орында тұруы тиіс. Бұл бағытта ата-анамен жеке кездесулер, оқушының үйіне бару, сынып жиналыстарын өткізу секілді жұмыстар жүйелі түрде жүзеге асқаны дұрыс.