Қайырлы таң саусақтарым

Ашық оқу іс-әрекеті

Білім беру салалары: Коммуникация, Таным, Шығармашылық
Бөлімдері: Сөйлеуді/тілді дамыту, Сурет салу
Тақырыбы: «Ертегілерге саяхат»

Мақсаты

Балалардың ертегі туралы түсінігін бекіту.
Сұрақ-жауап арқылы сөйлеу мәдениетін дамыту, сөздік қорын байыту, дұрыс сөйлеуге баулу.
Ойын арқылы ойлау қабілетін күшейту, шығармашылық ынтасын ояту.
Нүктелі әдіспен сурет салуды меңгерту.
Саусақ жаттығулары арқылы ұсақ моториканы дамыту.
Дыбыстық жаттығулар арқылы дыбыстарды анық айтуға машықтандыру.

Әдіс-тәсілдер

Түсіндіру
Көрсету
Сұрақ-жауап
Дидактикалық және қимылды ойындар

Көрнекіліктер

«Бауырсақ» ертегісінің конусты суреттері
«Жеті лақ» ертегісінің суреті
Дидактикалық ойын: «Орнын тап та атын айт!»

Құрал-жабдықтар

Ақ қағаз
Сары түсті гуашь
Қол сүрткіш
Мақталы таяқша

Билингвалдық компонент

Түлкі: лиса
Бауырсақ: колобок
Қоян: заяц

Сабақтың барысы

Мотивациялық-қозғаушы бөлім: «Шаттық шеңбері»

Тәрбиеші балаларды шеңберге жинап, ортақ көңіл күй қалыптастырады: «Шеңберіміз неге ұқсайды? Ендеше шарымызды үрлейік те үлкен шар жасайық». Одан кейін «денеміз сау болсын» деген ниетпен сергіту-емдеу сөздері айтылады:

— Қайырлы таң, көздерім! Көздерім, сендер ояныңдар!

— Қайырлы таң, құлақтарым! Сендер ояныңдар!

— Қайырлы таң, саусақтарым! Сендер ояныңдар!

— Қайырлы таң, Алтын күн! Күн сияқты күлімде!

Іздену-ұйымдастырушы бөлім: ертегілерге сапар

Тәрбиеші балалардан: «Ертегілерге саяхат жасағыларың келе ме? Қалай барамыз?» деп сұрайды. Осы кезде пойыздың гуілдеген дыбысы естіледі. Балалар «пойызға мінеміз» деп келісіп, қимылды ойын ойнайды.

Қимылды ойын: «Көңілді пойыз»

Балалар бір қатарға тұрып, пойыз болып «аялдамаларға» қозғалады, дыбыстар мен қимылдарды келістіріп қайталайды.

1-аялдама: «Жеті лақ»

Сұрақ-жауап

Лақтардың анасы қайда кетеді?
Оларды кім жеп қоюы мүмкін?
Анасы орманға не үшін барды?

Тақпақ

Аслан: «Лақ, лақ, лағым,
Секеңдеген шұнағым».

2-аялдама: «Бауырсақ»

Жұмбақ

Тәрбиеші балаларға кейіпкерлерді танып, оқиғаны еске түсіруге көмектесетін сұрақтар қояды:

Бауырсақ кімдерден қашты?
Бауырсақты кім жеп қояды?

Жұмбақ

Өзі қорқақ, құлағы ұзын. Ол не?

Балалар: қоян.

Сергіту сәті

Ұзын құлақ сұр қоян,
Естіп қалып сыбдырды.
Ойлы-қырлы жерлерден,
Ытқып-ытқып жүгірді.

3-аялдама: «Шұбар тауық»

Көмек көрсету

«Шұбар тауық көрінбейді, бірақ қыт-қыттаған дауыс естіледі». Балапан балаларға тіл қатады: «Сәлеметсіңдер ме! Мен анамнан адасып қалдым».

Дауысқа еліктеу

Балапан: «Қыт-қыт-қыт».

Тақпақ

Рахат:
«Шөп-шөп, шөжелерім,
Сары алтындай балапаным.
Тез жетіңдер, жем беремін,
Дәнге толы алақаным».

Тәрбиеші: «Жарайсыңдар! Енді бәріміз пойызға мініп, тобымызға қайтайық».

Өнер орталығы: нүктелі әдіспен сурет салу

Тапсырма: балапанға көмектесу үшін жемсауыт ішіне тары бейнесін салу. Балалар ақ қағазға сары гуашьпен, мақталы таяқша арқылы нүктелі әдіспен тарыны бейнелейді.

Саусақ жаттығуы: «Амандасу»

Балалар саусақтарын қимылдатып, бір-бірімен «амандасу» қимылдарын орындайды (ұсақ моториканы дамыту).

Жұмысты аяқтау

Дайын болған суреттер «балапанға сыйлық» ретінде ұсынылады, балалар еңбегі мадақталады.

Дыбыстық жаттығулар

Масалар: ыз-ыз-ыз
Аралар: ыж-ыж-ыж
Тауықтар: қыт-қыт
Жыландар: ыс-ыс-ыс

Рефлексивті-түзету

Сұрақтар

Бүгін біз қай аялдамаларға бардық?
Қандай ертегі кейіпкерлерімен кездестік?

Билингвалдық бекіту

Қоян — заяц, Бауырсақ — колобок.

Балалар мадақталып, жетістіктері атап өтіледі.