Желтоқсан айы
Тәуелсіздік ұғымы және тәрбие мақсаты
Бұл ашық тәрбие сағатының мақсаты — тәуелсіздік ұғымын түсіндіру, туған жерін және елін сүйетін, ұлтжанды, адамгершілігі мол азамат тәрбиелеу.
Ұйымдастыру сәті
- «Адай» күйі ойнап тұрады.
- Балалар қолдарына жалауша ұстап шығады.
- Үш рет айналып, орындарына тұрады.
- Қонақтармен сәлемдеседі.
Шаттық шеңбері
Жарқырасын күніміз!
Тыныш болсын еліміз!
Аман болсын басыңыз!
Мықты болсын деніңіз!
Бүгінгі ашық тәрбие сағатының тақырыбы: «Менің Тәуелсіз Қазақстаным».
Желтоқсан және мемлекеттік мерекелер
Қай мезгіл?
Қыс мезгілі.
Қыстың қай айы?
Желтоқсан айы.
Желтоқсандағы мерекелер
- 1 желтоқсан — Тұңғыш Президент күні.
- 16 желтоқсан — Тәуелсіздік күні.
- 31 желтоқсан — Жаңа жыл мерекесі.
Біз өткен аптада Тұңғыш Президент күнін атап өттік. Қазақстан Республикасының Президенті — Нұрсұлтан Әбішұлы Назарбаев.
Тәуелсіздік деген не?
Тәуелсіздік — өз алдына дербес мемлекет болу. Тәуелсіз елдің өз Елтаңбасы, Туы және Гимні болады. Бұларды мемлекеттік рәміздер деп атаймыз.
Қазақстан Республикасының Мемлекеттік Елтаңбасы
Егемен еліміздің Елтаңбасынан кең-байтақ Отанымыздың өткен тарихы, бай дәстүрі, салт-санасы мен жасампаз рухы көрінеді.
Шаңырақ — ел бірлігі мен бейбіт өмірдің белгісі. Қазақтың «Шаңырағың биік, керегең кең, босағаң берік болсын» деген тілегі осы мағынаны айқындайды.
Қанатты пырақ — еркіндік пен қуаттың нышаны. Жылқы қазақ үшін қадірлі, тарихта да ел өмірі мен ерлік күресте орны ерекше.
Жеті буынды мүйіз — елдіктің тұтастығын, ата дәстүрін қастерлеуді аңғартады.
Бес бұрышты жұлдыз — жол көрсететін, биік мақсатқа жетелейтін белгі ретінде бағаланады.
Елтаңба авторлары: Жандарбек Мәлібекұлы және Шот-Аман Ыдырысұлы Уәлихан.
Қазақстан Республикасының Мемлекеттік Туы
Мемлекеттік Тудың авторы — алматылық Шәкен Оңласынұлы Ниязбеков.
Көк түс — ортақ аспанның, бейбітшілік пен тұтастықтың белгісі. Жер беті мемлекеттерге бөлінгенімен, жоғарыдағы аспан ешқашан бөлінбейді.
Күн — баршаға ортақ жылу мен нұр. Оның сәулесі тіршілік атаулыға өмір сыйлайды.
Қыран — биіктік пен еркіндіктің нышаны. Тудағы қыран тәуелсіз Қазақстанның асқақ болуын, ғұмырының ұзақ болуын меңзейді.
Ою-өрнек — ұлттық болмыстың, қазақ елінің өзіндік сипатының көрінісі.
Туға тұтас зер салсақ, көк жүзінде нұрын шашқан Күн, астында қалықтаған Қыран — тыныштық пен баянды өмірдің белгісі, ал ою-өрнек тудың қай елдікі екенін танытады.
Мемлекеттік Гимн: қашан орындалады және қалай тыңдалады?
- Жиналыстар мен мәжілістерде орындалады.
- Ескерткіштер орнатылғанда орындалады.
- Шет елдердің мемлекет басшыларын қарсы алғанда немесе шығарып салғанда орындалады.
- Гимн орындалғанда міндетті түрде түрегеп тұрып, оң қолды жүрек тұсына қойып тыңдайды.
Рәміздер туралы тақпақ
Көк аспандай көкпеңбек — Қазақстан жалауы.
Көк емес ол тектен-тек — елдің ашық қабағы.
Ақ ниетті — алтын күн, асқар арман — қыраны.
Жалауы бұл халқымның — мәртебесі, мақтаны.