Бүгін ұлыстың ұлы мерекесі - наурыз
Қош келдің, Наурызым!
Бұл мерекелік шараның мақсаты — балаларды қазақтың салт-дәстүрімен және ұлттық киім үлгілерімен таныстыру, ұлттық құндылықты дәріптеу.
Мақсаты
Балаларды қазақтың салт-дәстүрімен, қазақ ұлттық киімдерімен таныстыру.
Жүру барысы
Жүргізушілердің құттықтауы, балалардың өлеңі, әні, көрісу дәстүрі, бата, би.
Сахналық көрініс
Жүргізуші қонақтарды құттықтап, көктеммен бірге келген жаңа жылдың — Наурыздың мәнін ашады. Сахнаға балалар шығып, мерекеге арнаған өлеңдерін оқиды.
Жүргізуші
Құрметті қонақтар, апайлар! Наурыз мерекесі құтты болсын! Күлімдеген шуақты көктеммен бірге қазақ даласына жаңа жыл келді. Бәріңізге жаңа жыл — бақыт жылы, бейбіт жыл болсын!
Анель
Қыс өтіп, қар кетіп,
Шырайлы жаз жетіп.
Шаруаның кенелген,
Мейрамы ежелден.
Құтты болсын Наурыз!
Бекарыс
Наурыз тойы — салтанат,
Наурыз тойы — мархабат.
Әр жүректен ән тарап,
Шаттанады шартарап.
Келесі көрініс
Жүргізушілер залдан шығып кетеді. Сахнаға ата мен әже немересін күткендей болып келіп отырады.
Ата мен әженің сағынышы
Ата
Бүгін — ұлыстың ұлы күні, Наурыз! Қаладағы немерелер не істеп жүр екен? Өздерін қатты сағындық.
Әже
Мен де сағындым. Жыл сайын Наурызда келіп қалатын еді… Бүгін де келіп қалар.
Балалардың келуі
Көңілді әуенмен залға балалар кіреді. Ата мен әже қуанып, балалардың бастарын сипайды. Тәрбиеші немерелерді мерекеге ертіп келгенін айтып, олардың сағынышын жеткізеді.
Тәрбиеші
Әже, ата, бүгін мерекеге немерелеріңізді ертіп келдім. Сіздерді қатты сағыныпты.
Ата
Біз де сағындық. Бойларың да өсіп қалыпты!
Өнерге шақыру
Тәрбиеші: Тек бойларың ғана емес, ойларың да өсті. Құр қол келген жоқпыз — өнерімізді ала келдік!
Әже: Ендеше, көрсете ғой өнерлеріңді. Балабақшаға баратын балалар ғой!
Тәрбиеші: Ендеше, балалар, Наурыз мерекесіне арнап ән шырқайық.
Ән: «Наурыз»
Көрісу және бата
Сахнаға төрт бала кіріп, ата мен әжемен көріседі. Бұл — Наурыздағы ең жылы, ең мағыналы сәттердің бірі.
Балалардың сәлемі
Балалар: Сәлеметсіздер ме!
1-бала: Ата, әже, Наурыз мерекесі құтты болсын! Наурыздан Наурызға жете беріңіздер. Сіздермен көрісейік деп келдік.
Түсіндіру
Ата: Иә, балаларым, өркендерің өссін. Көрісу — жақсы дәстүр. Жасы кішілер жасы үлкендерге келіп көрісіп, батасын алады.
Әженің батасы
Әже: Ал, ендеше, мен бата берейін. Отыра қойыңдар.
Жас қайырлы болсын,
Өмір ұзақ болсын,
Әлі талай көрісуге жазсын.
Қорытынды өнер
Би
Балалар: Ата, әже, біз сіздерге би билеп береміз.
Би: «Боз жорға»