Балаларды ойындар арқылы заттарды пішіні мен көлемі бойынша саралауға, бір жерден екінші жерге жинай білуге үйрету

Білім беру саласы: Таным

Ұйымдастырылған оқу іс-әрекеті: Сенсорлық тәрбие

Тақырыбы: Әр текті заттарды пішіні мен көлемі бойынша саралау
Көрнекілігі: Доптар, қораптар
Мақсаты: Балаларды ойындар арқылы заттарды пішіні мен көлемі бойынша саралауға, бір жерден екінші жерге жинауға үйрету. Есте сақтау мен ойлау қабілеттерін дамыту, сөз дыбыстарын дұрыс айтуға, дербес іс-әрекет жасауға және түстерді ажыратуға дағдыландыру.
Әдіс-тәсілдері: Сұрақ-жауап, көрсету, түсіндіру, ойын ойнату, ән айту
Сөздік жұмыс: доп сары түсті көк түсті домалақ

Ойын арқылы ұйымдастыру: «Добым, добым, домала»

Дайындық

Балаларды көрпешелердің үстіне жайғасып отыруға шақыру.
Аяқтарын ашып, доп келгенде тез ұстап алатындай ыңғайланып отыруды ескерту.

Сұрақ-жауап (үлкен көк доп)

— Мынау не, балалар?: — Доп.
— Біз доппен не істеп жатырмыз?: — Бір-бірімізге домалатып жатырмыз.
— Доп әдемі ме?: — Иә, әдемі.
— Доп үлкен бе, кіші ме?: — Доп үлкен.
— Доптың түсі қандай?: — Түсі көк.

Сұрақ-жауап (кіші сары доп)

— Ал мына доптың көлемі үлкен бе, кіші ме?: — Бұл доп кіші.
— Кіші доптың түсі қандай?: — Түсі сары.
— Қараңдаршы, қандай көңілді домалайды. Доптың пішіні қандай?: — Пішіні домалақ.

Қозғалыс сәті

Балалар орнынан тұрып, қол шапалақтайды. Екі допты салыстырып, «үлкен — кіші», «көк — сары» ұғымдарын қайталайды. Допты жерге соққанда секіретінін бақылап, балалар да доп сияқты секіреді.

Саралау және жинау тапсырмасы

Ойыннан кейін доптар жан-жаққа шашылып қалады. Балалар оларды түсі мен көлеміне қарай қораптарға жинайды:

Көк қорапқа

Көк түсті үлкен доптар салынады.
Сары қорапқа

Сары түсті кіші доптар салынады.

Нәтижесі: балалар тапсырманы орындап, доптарды қораптарға ұқыпты орналастырады.

Ән: «Доп»

Домала доп, домала,
Балшыққа тек жолама.
Жек көремін оныңды,
Бүлдіресің қолымды.

Секіріп өт ордан да,
Секіріп өт жолдан да.
Қуса күшік жетпесін,
Машина басып кетпесін.

Күтілетін нәтиже

Балалар заттардың үлкен және кіші болатынын ажыратады.
Түстерді (көк, сары) ажырата алады.
Заттарды пішіні бойынша (домалақ) таниды және сөздік қорын толықтырады.