Жақын барсаң маңына, сезе қояр дыбыстан

Таудан не күшті?

Жауабы: Адам

Өлсең де өлмейді, өлмесең де өлмейді.

Жауабы: Адамның есімі

Көрмеген ешкім, дәмін татып: қара орман асты, ұйыған қатық.

Жауабы: Адамның миы

Даладай кең, теңіздей терең.

Жауабы: Адамның ойы

Таудан биік, теңізден терең.

Жауабы: Ақыл

Даладай кімнің кең пейілі? Данадай кімнің мол мейірі?

Жауабы: Ана

Отынсыз, сусыз піскен ас — адамның бәрі ішкен ас.

Жауабы: Ана сүті

Дүниеде не жұмсақ?

Жауабы: Ананың алақаны

Маған да, саған да жақын туыс — бес адам. Үш әріптен тұрады: оңнан оқысаң да, солдан оқысаң да өзгермейді. Бәрі де өз жұратың. Айтшы, олар кім?

Жауабы: Ата, ана, апа, аға, іні

Дәу үңгірдің қақпасы: жабылады, ашылады, жоқ болса да топсасы.

Жауабы: Ауыз

Бірде төмен, бірде шығып жоғары. Сөз сөйлесең, қозғалыста болады.

Жауабы: Тіл

Үңгір түбінде жалбырап, өсіп тұр жалғыз жапырақ.

Жауабы: Тіл

Есігін ашсаң — сайраған бұлбұл. Есігін жапсаң — жайраған құр күл.

Жауабы: Тіл

Үңгірді жайлаған, сүйексіз, тиексіз, жылмаңдап сайраған.

Жауабы: Тіл

Күміс қазықтың басы алтын.

Жауабы: Тіл мен сөз

Бір шыққан соң орнына қайта кірмес, қай жақтан келерін адам білмес. Азаттығы — сонымен дүниенің, онсыз тірі пенде өмір сүрмес.

Жауабы: Сөз

Қамалда бар алақандай қызыл от. Отыз жауынгер көрсетеді қызмет.

Жауабы: Тіл мен тіс

Үңгір толы асыл тас.

Жауабы: Тіс

Отыз екі батыр екіге бөлініп, қамалып жатыр.

Жауабы: Тіс

Отыз екі мықты қаз-қатар болып шықты: он алтысы асты, он алтысы үсті.

Жауабы: Тіс

Үсті шарбақ, асты шарбақ, ортасында сарнап тұрған жалғыз бармақ.

Жауабы: Тіс пен тіл

Қатар-қатар тас қойдым, жирен атты бос қойдым.

Жауабы: Тіс пен тіл

Бір беткейде екі көл.

Жауабы: Көз

Жағасы құрақ, мөлдір суат.

Жауабы: Көз

Көреді бәрін өзгенің, көре алмайды өздерін.

Жауабы: Көз

Жарық қылып қос тоғайдың етегін, қос шырақ тұр — айтшы, ол не?

Жауабы: Көз

Қос батыр қатар тұрса да, бірін-бірі көрмейді.

Жауабы: Көз

Кішкене ғана тостаған — жер дүниені бастаған.

Жауабы: Көз

Екі көл — кіл тынған, екі ну — құлпырған. Жатса да қатар жарысып, көрмепті бірде танысып.

Жауабы: Екі көз, екі қас

Дөңнің сыртқы қабаты — қарлығаштың қанаты.

Жауабы: Қас

Қабақта бар қалың тоғай, жолсыз-ақ табарсың оңай.

Жауабы: Қас

Қос дөңгелек мөлдіреп, ішінде бар қарашық. Алға қарай елжіреп, әрдайым қарап таласады.

Жауабы: Жанар

Сөз ұққыш — қос тұтқыш.

Жауабы: Құлақ

Бір таудың екі жағына екі қалқан жабысқан. Жақын барсаң маңына, дыбыстан сезе қояр.

Жауабы: Құлақ

Күмбір-күмбір, қарағым, қартайғанша жарадым.

Жауабы: Құлақ

Алқапта бар биік тау, алды — тік жар, қиық тау. Қос үңгірі желдетіп, ауа жұтар селдетіп.

Жауабы: Мұрын

Қатар жатқан қос ін — аң кірмейтін бос ін.

Жауабы: Танау

Мұрыннан кетпейді, қолға түспейді.

Жауабы: Иіс

Екі көрші: бірі — пысылдауық, бірі — сақылдауық.

Жауабы: Мұрын мен ауыз

Мөлдіреп екі көл жатыр, ортада дөңес бел жатыр.

Жауабы: Мұрын мен көз

Қосылғанда қос шебер — қыруар-қыруар іс өнер.

Жауабы: Қол

Бунақты көсеу, тармағы бесеу.

Жауабы: Қол мен саусақ

Қатар өскен дос құсап, екі жақта қос бұтақ. Әрқайсында — бірі қысқа, бірі ұзын — бес бұтақ.

Жауабы: Қол мен саусақ

Бір бұтақта бес тармақ, бәрінде бар мүйіз қалпақ.

Жауабы: Саусақ

Белдеуде бес ат, бесеуі де қасқа ат.

Жауабы: Саусақ

Бірі үлкен, бірі кіші — бес туысқан, бір істің күші.

Жауабы: Саусақтар

Бөлінбейді қыдырып, кейде жатады жұмылып. Ағайынды бес құрдас, бірдей болып еш тұрмас.

Жауабы: Саусақтар

Көсеуімнің басы — ақ күміс.

Жауабы: Саусақ, тырнақ

Оң жағымда бес сарбаз, сол жағымда бес сарбаз.

Жауабы: Он саусақ

Өсіп тұрады демде, бұтақ сайын теңге.

Жауабы: Тырнақ

Құрамалы сырық, берсең ырық: кетесің тұрып, барасың жүріп, қаласаң отырасың бүгіп.

Жауабы: Аяқ

Екі атым бар тынбайтын, өзімді ғана тыңдайтын.

Жауабы: Екі аяқ

Сырты — орман, алды — жазық. Араласаң, табасың жеті құдық.

Жауабы: Бас

Таппайтын тағат, тығулы сағат.

Жауабы: Жүрек

Сыртқа шығар жолы тұйық, түсі — шымқай қызыл сұйық.

Жауабы: Қан

Жотада бар кеуіп жатқан жалғыз оқпан.

Жауабы: Кіндік

Тақырда тайдың ізі.

Жауабы: Кіндік

Қос жиек, ортасы — ақ сүйек.

Жауабы: Ерін

«Ти» десем — тимейді, «тиме» десем — тиеді.

Жауабы: Ерін

Тілсіз болса да хабар береді.

Жауабы: Ауру

Күндіз қасыңнан қалмайды, бірақ ешкім ұстай алмайды. Қорқақ па — қараңғыға бармайды.

Жауабы: Көлеңке

Суда жатады, өзі батпайды.

Жауабы: Көлеңке

Тепсем — тебілмейді, көмсем — көмілмейді.

Жауабы: Көлеңке

Мен жүгірсем — ол да жүгіреді, мен мүдірсем — ол да мүдіреді.

Жауабы: Көлеңке

Алақаныңмен басарсың, ұстай алмай сасарсың.

Жауабы: Көлеңке

Атқа мінбейді, жаяу жүрмейді: күніне мың шақырым жерді шарлап, ұясына қайта оралады.

Жауабы: Көңіл

Жүйрікте не жүйрік?

Жауабы: Көңіл

Қырық жұма қараңғы үйде тұрды. Алты жұма ауырып жатты. Жиырма жұма байланды, бір жыл бесікте жатты. Ол кім?

Жауабы: Сәби

Онсыз жақсы өмір жоқ, онсыз жақсы көңіл жоқ. Тәтті, бірақ жемейсің; «керек емес» демейсің.

Жауабы: Ұйқы

Өмірде не тәтті?

Жауабы: Ұйқы