Веласкестің әйгілі суретші атанған кезінде дүниеге келген портрет
Сабақтың тақырыбы
Сурет өнеріндегі гуманизм
Сабақтың мақсаты (а) — білімділік
Германия, Нидерланды және Испанияның ұлы суретшілері, олардың шығармалары мен сурет өнеріндегі жаңалықтары туралы түсінік қалыптастыру.
Сабақтың мақсаты (ә) — дамытушылық
Оқушылардың логикалық ойлау қабілетін дамыту, шығармашылық ізденіске жетелеу.
Сабақтың мақсаты (б) — тәрбиелік
Оқушылардың рухани жан дүниесінің дамуына ықпал ету, адамгершілікке тәрбиелеу.
Көрнекілігі
- Суреттер
- Тірек-сызба
Әдісі және түрі
Сабақтың барысы
І. Ұйымдастыру кезеңі
Оқушылардың назарын сабақ тақырыбына аударып, оқу мақсаттарын нақтылау.
1. Жаңа сабақты түсіндіру
Италиядағы Қайта өркендеу дәуірінің өнері Еуропаның басқа елдерінде де өнердің дамуына зор ықпал етті. Итальян шеберлерінің жетістіктерін бойына сіңірген Германия, Нидерланды және Испания суретшілері дүниежүзілік өнерге көптеген жаңалық енгізді.
Альбрехт Дюрер
1471–1528 • Германия
Германияның алдыңғы қатарлы суретшісі. Суретші ғана емес, инженер әрі сәулетші ретінде де танылды.
Рембрандт Харменс ван Рейн
1606–1669 • Нидерланды
Кескіндемеші әрі график, сурет өнерінің ұлы шебері. Адам болмысын ашуда жарық пен көлеңкені батыл пайдаланғанымен ерекшеленеді.
Диего Веласкес
1599–1660 • Испания
Испанияның ең үздік суретшілерінің бірі, сарай суретшісі. Портрет жанрында адамның мінезін дәл берудің шебері.
Тарихи сынақхат (толықтыру тапсырмасы)
Төмендегі мәтіндегі көп нүктенің орнына тиісті сөздерді қойып, деректерді нақтылаңыз.
__________ бала кезінен басылымдарды безендіруге әуестеніп, гравюрамен айналыса бастады. Ол жасаған бейнелер __________ халқының Реформация қарсаңында етек алған мазасыз көңіл күйімен үндес болды.
__________ — аса ірі портрет шеберлерінің бірі. Диірменшінің баласы 1620 жылы аз уақыт __________ университетінде оқып, кейін біржола өнер жолын қуды. Оның басты назар аударғаны — адам, оның мінез-құлқы, ақылы мен толғаныстары. __________ кедейленген шағында өзінің ең таңдаулы шығармаларын тудырды.
Испанияның ең үздік суретшісі — __________. Оның зиратындағы ескерткіште __________ деген сөздер жазылған.
Тұлғаны таны: сәйкестендіру тапсырмасы
Сипаттамаға сәйкес келетін суретшіні және (немесе) шығарманы анықтаңыз.
-
1-тапсырма
Веласкес әйгілі суретші атанған кезеңде жазылған портрет. Автор бұл шығармасы арқылы адамның өзіне ғана тән ерекше мінез-сипатын қылқалам құдіретімен, асқан сүйіспеншілікпен бере білген.
-
2-тапсырма
Рембрандттың ең әйгілі картиналарының бірі — «Адасқан ұлдың қайта оралуы». Ол бұл туындыны өмірінің соңына таман салған. Шығарма адамға деген сүйіспеншілік, адамға деген сенім, күйзеліс пен толғаныс сезімдеріне құрылған.
-
3-тапсырма
Дюрердің таңдаулы гравюраларының бірі «Төрт салт атты» деп аталады. Онда тәңірдің жер бетіндегі адамзаттың үштен бірін жазалауға жіберген — Індет, Соғыс, Ашаршылық және Ажал кейпіндегі салт аттылар бейнеленген.
Сабақты бекіту: «Кім жылдам?»
Төмендегі сұрақтарға қысқа әрі нақты жауап беріңіз.
- 1.Сарай суретшісіне айналып, 40 жыл бойы сарайда қызмет жасаған кім?
- 2.Жоқшылықта қайтыс болып, кедейлер зиратына жерленген суретші кім?
- 3.Қай суретшінің басты жетістігі — жарық пен көлеңкені батыл пайдалануы?
- 4.1632 жылдан Амстердамда тұрып, кейін әйгілі суретшіге айналған кім?
- 5.Суретші, инженер әрі сәулетші болған, көне тілдерге жетік әрі ақын болған кім?
- 6.Гравюра дегеніміз не?
- 7.Германияға, Нидерландыға және Италияға көп саяхат жасап, ондағы шеберлердің жетістігімен танысқан кім?
- 8.Жүзге жуық автопортрет қалдырған суретші кім?
- 9.«Испан мемлекетінің алтын ғасыры» деп қай кезең аталады?
- 10.«Инфанта Маргарита» картинасын кім салған?
Үй тапсырмасы
«Сурет өнеріндегі гуманизм» тақырыбын оқып келу.