Сабақтан себепсіз қалған оқушылардың ата - анасы айыппұл төлейдіБір реттік айыппұл 7 айлық есептік көрсеткіш көлемінде
Сабақтан себепсіз қалған оқушылардың ата-анасына айыппұл салынады
Сабаққа себепсіз келмейтін оқушылар үшін жауапкершілік ата-анасына жүктеледі. Қолданыстағы талаптарға сәйкес, бір реттік әкімшілік айыппұл 7 айлық есептік көрсеткіш көлемінде белгіленген — бұл шамамен 15 мың теңгеге жуық.
Айыппұл мөлшері қалай есептеледі?
- Егер оқушы 60 сағат көлемінде сабаққа қатыспаса, ата-анаға 7 АЕК айыппұл салынады.
- Жағдай қайталанса, екінші айыппұл көлемі 20 АЕК болады — бұл 42 мың теңгеден астам.
Дегенмен, кейбір ата-аналар бұл айыппұлдардан да именбейді. Өскеменде мұндай жағдайлар жиілеген соң, мектеп мұғалімдері полиция қызметкерлерімен бірлесіп «Балаларды мектепке қайтарайық» атты акция ұйымдастырып, үй-үйді аралаған.
Рейд барысында сабақтан қалатын балалардың ата-аналарының бір бөлігі ішімдікке салынғаны айтылды. Мысалы, Арина Тарасова биыл 1-сыныпқа баруы тиіс болған, алайда 1 қыркүйектен бері мектепке бармаған. Полицейлердің сөзінше, қызының қайда екенінен маскүнем анасы да бейхабар болған.
Тексеру қалай жүргізіледі?
Инспекторлар материал жинап, көршілерден және басқа да дереккөздерден сұрастыру жүргізеді. Егер заңбұзушылық расталса, әкімшілік жаза қолданылып қана қоймай, қажет болған жағдайда ата-ана құқығынан айыру мәселесі де қаралуы мүмкін.
Ернұр Рахимов, Өскемен қалалық ІІБ кәмелетке толмағандар ісі жөніндегі инспекциясының инспекторы:
«127-бап бойынша әкімшілік айыппұл белгіленеді. 60 сағат бойы сабақты босатса — 7 АЕК. Жағдай қайталанса, екінші айыппұл 20 АЕК көлемінде болады. Қазір материал жинап жатырмыз. Көршілерінен сұраймыз. Егер негіз болса, ата-ана құқығынан айырамыз».
Дереккөз: astanatv