Наурыз аруы байқауы
ШҚО, Аягөз қаласы №5 жалпы білім беретін орта мектеп коммуналдық мемлекеттік мекемесі
Бастауыш сынып мұғалімі: Аязбекова Дария Сериковна
Гүл мереке, күн мереке — 8 наурызға арналған сыныптан тыс іс-шара сценарийі. Мазмұны ананың қадір-қасиетін ұлықтауға, қыздарды әсемдікке, іскерлікке баулуға және көпшілік алдында өзін еркін ұстай білуге бағытталған.
Мақсаты
Тәрбиелік бағыт
- Ана — адамзатты жарық дүниеге әкеліп, тәрбиелеп өсіретін ұлы тұлға екенін түсіндіру.
- Ананың еңбегін еш нәрсемен өлшеуге болмайтынын ұғындыру: түн ұйқысын төрт бөліп, перзентін азамат етіп өсіреді.
- Барлық ананы және болашақ ана болатын қыздарды сыйлауға, құрметтеуге баулу.
Дамытушылық бағыт
- Қыздарды әсемдікке, ұқыптылыққа, шеберлікке баулу.
- Көпшілік алдында өзін мәдениетті ұстауға үйрету.
- Өнерін жасымай, сенімді түрде көрсете білуге тәрбиелеу.
Іс-шара жоспары
I бөлім
«Ана — өмір шуағы» (әдеби монтаж)
Аналарға, әжелерге арналған өлеңдер, көрініс, ән және балалардың жүрекжарды тілектері.
II бөлім
«Наурыз аруы» байқауы
Қыздардың таныстыруы, білім сайысы, қолөнер, өнер көрсету, дәм дайындау және киім үлгісі.
Құттықтау сөзі
Құрметті апалар, аналар, қыздар! Сіздерді 8 наурыз мерекесімен құттықтаймын! Бұл күні ең жылы сезімдер — қайырымдылық пен кішіпейілділік, үміт пен сенім, махаббат пен адалдық — бір арнаға тоғысады. 8 наурыз — тамаша мереке, көктемнің мерекесі, табиғаттың оянатын мезгілі, адамның бақыты мен махаббат кезеңі.
I бөлім: «Ана — өмір шуағы» (әдеби монтаж)
Өлең жолдары (оқушылар орындайды)
1-оқушы
Жер бусанып, көк шығып,
Арықтардан су ақты.
Бүрлеп өсіп көк шыбық
Жұтып жатыр шуақты.
Аналардың мерекесі
Бәрімізді қуантты.
2-оқушы
Сегізінші наурыз —
Келген кезі көктемнің.
Босап бақша-бауымыз,
Мұз-қар еріп кеткен күн.
3-оқушы
Сегізінші наурыз —
Күлімсіреп көктен күн.
Елге ұсынып сары уыз,
Елжіреп нұр төккен күн.
4-оқушы
Сегізінші наурыз —
Жыл құсы ұшып жеткен күн.
Тамшы жерге салып із,
Жаңбыр жұпар сепкен күн.
5-оқушы
Арнада су тасынып,
Көзге түскен беттен гүл.
Үлкен-кіші асығып,
Күткен мейрам неткен бұл?
6-оқушы
Жоқ ешқандай дауымыз,
Мереке ең жайдары.
Өйткені бұл наурыз —
Аналардың мейрамы.
Көрініс, ән және тілектер
Көрініс
Ерсін мен Мерхаттың орындауында «Анасы мен Бағлан» көрінісі.
Ән
«Құттықтаймын, мама!»
Жүрекжарды сөз
Әр оқушы өз анасына жылы лебізін, ақ тілегін білдіреді.
Ескерту
Бұл бөлім көрерменге ең жақын, ең әсерлі сәт ретінде жоспарланып, баяу музыкамен сүйемелденсе, әсері күшейе түседі.
II бөлім: «Наурыз аруы» байқауы
Байқау шарттары
- Таныс болайық
- Білімді мыңды жығар
- Қол өнер — мол өнер
- Өнерлі — өрге жүзер
- Дәм-думан
- Ерекше киім үлгісі
Сайысқа қатысатын қыздарды ұлдар қолтықтап, сыныпқа алып кіреді. Қыздар мен ұлдар таныстырылады.
Қатысушылар туралы қысқаша таныстыру
Нұртөлеуова Нұрайым Маратқызы
Жауапкершілігі жоғары, белсенді оқушы. Ән айтқанды, би билегенді ұнатады. Әдемі киінуді, сұлулықты сүйетін кербез қыз.
Нұрланова Шұғыла Нұрланқызы
Іске ширақ, пысық. Айналасындағыларды мінезімен баурап алатын тартымды қасиеті бар. Шығыс билерін билегенді ұнатады.
Назарбекова Айгерім Мақсатқызы
Ерекше мінезді, бірбеткей. Достарының қуанышын шын көңілмен бөліседі. Анасының қолқанаты, сіңлісінің қамқор әпкесі.
Рахымбаева Айгерім Елдарқызы
Қылықты, өзін еркін ұстай білетін қыз. Билегенді, әсіресе үнді биін жақсы көреді. Жазуы өте көркем.
Азинова Айтолқын Талғатқызы
Салмақты, ұяң мінезді, көп сөйлемейді. Үйде үлкендердің ісін қайталағанды ұнатады. Шаш өру, сәндеуге икемі бар.
Нұғыманова Алуа
Елгезек, іскер, қиялы ұшқыр, шығармашыл. Жүрегі жылылыққа толы, нәзік жанды қыз. Мультфильм көргенді ұнатады.
Бимұханова Айым
Байсалды, қарапайым, сабырлы мінезді. Мақтануды ұнатпайды, білсе де үндемей отыра алады. Кітап оқығанды жақсы көреді.
Ұлдар туралы қысқаша таныстыру
Ережепов Мерхат Бекзатұлы
Сабақты жақсы оқиды. Істі баяу орындағанымен, тиянақты. Үйінде бауырларына қамқор аға.
Сапиолаев Еркінбек Қайрбекұлы
Ойын еркін жеткізетін, жан-жақты білімді. Зерттегенді, бақылағанды ұнатады. Дүниетану пәнін ерекше жақсы көреді.
Қайрғазин Ернұр Қайрғазыұлы
Ақкөңіл, ширақ ойлы, байқампаз. Өлең айтқанды ұнатады. Еңбекқор, жастайынан еңбекке бейім.
Ахметов Айдос Айтқазыұлы
Пысық, шапшаң. Сурет салғанды, бояғанды, реп стиліндегі өлеңдерді, биді жақсы көреді. Есте сақтау қабілеті жоғары.
Хайса Еламан Хайсаұлы
Мейірімді, жанашыр, достыққа берік. Билегенді, сурет салғанды ұнатады. Есеп шығаруда алғыр.
Табылғазы Ернар Ермекұлы
Тиянақты, тазалықты сүйеді, кішіпейіл. «Қара жорға» биін тамаша билейді. Математиканы жақсы көреді.
Қажынұров Азат Санатұлы
Ашық мінезді, дос пейілді. Ән айтып, би билегенді ұнатады. Мәтінді жақсы мазмұндайды, елгезектігімен ерекшеленеді.
Сайыстың ашылуы
Ернар Ш. (жүргізуші мәтіні)
Қыз дегенің — қызғалдақ,
Құлпырады, жайнайды.
Тотыдайын таранып,
Бұлбұл құстай сайрайды.
Сегізінші наурыз — көктем келді,
Жарасады қыздардың киген бөркі.
Даярланған сұлуларды көптен бері
Мерекеде бағалайтын кезі келді.
Ендеше сыныбымыздың ару қыздары арасында өтетін «Наурыз аруы» сайысын бастайық.
Айдос (жүргізуші мәтіні)
Қарсы алайық, халайық!
Аруға көз салайық.
Қошеметтеп сайыскерді,
Қанеки, қол соғайық!
Ұйымдастыру
Сайыс басталмас бұрын қазылар алқасы сайланады. Қыздарға жеребе тартқызу арқылы шығу реті анықталады.
1) «Таныс болайық»
Қыздар сахнаға шығып, өздерін таныстырады.
Жетекші ой
«Қыз — өмірдің қызғалдағы». 8 наурыз мерекесінде хас сұлулармен танысатын сәт.
2) «Білімді мыңды жығар»
«Мақал — сөздің мәйегі». Қыздар өз өнерімен қатар білімін де көрсетеді.
Тапсырма
1 минут ішінде мүмкіндігінше көп мақал-мәтел айту.
3) «Қол өнер — мол өнер»
Ою-өрнек, қолөнер бұйымдары арқылы қыздардың шеберлігі бағаланады.
Көріністік тіркес
«Қыздардың саусақтары майысқанда, хас шебердің келді өзі».
4) «Өнерлі — өрге жүзер»
Ән, би, көркем сөз немесе сахналық қойылым арқылы өнер көрсету.
Қосымша нөмір
Би: «Қара жорға» (Ернар Ш.)
5) «Дәм-думан»
«Ас — адамның арқауы». Қыздар үйден (аналарының көмегімен) дайындап әкелген тағамдарын ұсынады.
Қосымша нөмір
Брейк биі (Ахметов Айдос)
6) «Ерекше киім үлгісі»
«Адам көркі — шүберек». Қыздардың өз қиялынан туған, ешкімге ұқсамайтын сән үлгісі көрсетіледі.
Бағалау өлшемдері
Талғам, үйлесім, ұқыптылық, идеяның ерекшелігі, сахна мәдениеті.
Қорытынды және марапаттау
Ару қыздарымыздың өнерін бағалап, қорытындыны жариялау, марапаттау және құттықтау сөзін айту қазылар алқасына тапсырылады.