Қазақстан халқының мемлекеттік тілі - қазақ тілі
Дүниетанудан ашық сабақ
Сабақтың мақсаты мен күтілетін нәтижелері
Бұл сабақ оқушылардың Отанға деген сүйіспеншілігін арттыруға, мемлекеттік рәміздерді қастерлеуге, тәуелсіз елдің бай тарихы мен көпұлтты бірлігін түсінуге бағытталған.
Білімділік
- Жас ұрпақты Отанды сүюге, рәміздерді қастерлеуге тәрбиелеу.
- Балалар құқығы туралы заңнаманы кеңінен түсіндіру.
- Ел басшылары еңбегін құрметтеудің мәнін ұғындыру.
- Қазақстанның халықаралық ұйымдар құрамындағы орнын таныту.
- Ана тіліміз — қазақ тілінің маңызын түсіндіру.
Дамытушылық
- Танымдық ойлау қабілеттерін дамыту.
- Топта жұмыс істеу, бірін-бірі тыңдай білу мәдениетін қалыптастыру.
- Ой-өрісті кеңейту, ауызша сөйлеу мәдениетін жетілдіру.
Тәрбиелік
- Елін, жерін, салт-дәстүрін құрметтейтін рухы мықты азамат тәрбиелеу.
- Тарихымызды қадірлеуге баулу.
Сабақтың барысы
I. Ұйымдастыру кезеңі
Тренинг
Аспанға қарап ай көрдім,
Төменге қарап жер көрдім.
Оңға, солға бұрылып,
Егеменді ел көрдім!
Сыныптың назарын сабаққа аударып, жағымды психологиялық ахуал қалыптастырылады.
II. Үй тапсырмасын тексеру
«Топтастыру» стратегиясы арқылы өткен тақырыптар бойынша қорытынды жасалады: Отан, Қазақстанның Туы, Елтаңбасы, Әнұраны, Конституция.
1-топ — «Достық»
Отанымыз Қазақстан туралы әңгімелейді, дайындаған өлең шумақтарын оқиды.
2-топ — «Ынтымақ»
Мемлекеттік Ту туралы ойларын ортаға салады.
3-топ — «Бірлік»
Елтаңба туралы дайындығын таныстырады.
4-топ — «Білім»
Салтанатты Әнұран туралы мәлімет береді.
5-топ — «Тәрбие»
Еліміздің басты құжаты — Конституция туралы пікірлерін ұсынады.
III. Жаңа сабақ
Қызығушылықты ояту
Мұғалім қолындағы «Отанымыз Қазақстан» жазуына сүйене отырып, әр топтан оқушылар Қазақстанға қатысты теңеу сөздер айтады. Осы арқылы сын есімнің «Қандай?» деген сұраққа жауап беретінін еске түсіреді.
Бүгінгі сабақтың тақырыбы: «Қазақстан — көп ұлтты тәуелсіз мемлекет». Оқушылар орнынан тұрып, Қазақстан Республикасының Әнұранын орындайды.
Қазақстан тәуелсіздік алғанға дейін Кеңестік Социалистік Республикалар Одағының құрамында болды. Ол кезде одақ құрамында 15 республика өмір сүрді. Халықтардың ең үлкен арманы — бостандық пен тәуелсіздік, өз дәстүрін сақтау, өз байрағын биікке көтеру.
Қазақстан Республикасы — тарихы терең, табиғаты бай, мәдениеті кемел мемлекет. Қазақ халқы ержүрек, бауырмал, қонақжай, достыққа адал. Елімізде көптеген ұлт өкілдері тату-тәтті өмір сүреді: орыстар, өзбектер, ұйғырлар, кәрістер, гректер және басқа да этностар. Сондықтан Қазақстан көпұлтты мемлекет деп аталады.
Қазақстан халқының мемлекеттік тілі — қазақ тілі. Ана тіліміз арқылы біз әлем мәдениетін, тарихын, әдебиетін танып, ұлттық құндылықтарды ұрпақтан ұрпаққа жеткіземіз.
16 желтоқсан — Қазақстан Республикасының Тәуелсіздік күні. 1991 жылы дәл осы күні мемлекеттік тәуелсіздік туралы заң қабылданып, Қазақстан егемен ел ретінде жаңа тарихи кезеңге қадам басты. Тәуелсіздікпен бірге мемлекеттік рәміздер бекітілді: Елтаңба, Ту, Әнұран, сондай-ақ Конституция.
Конституция және бала құқығы
Конституция — еліміздің Ата Заңы, яғни мемлекеттегі барлық азамат ұстанатын негізгі заңдар жүйесі. 1995 жылы жаңа Конституция қабылданды. Онда балалардың да құқықтары мен міндеттері нақты көрсетілген.
Балалар құқықтарын қорғау мақсатында әлем елдері бірігіп Бала құқықтары туралы Конвенцияны қабылдады. Бұл құжат балаға білім алуға, мәдени игіліктерді пайдалануға, демалыс пен бос уақытты тиімді өткізуге мүмкіндік береді.
Қазақстанның халықаралық беделі
Қазақстанды әлем мойындады: еліміз Біріккен Ұлттар Ұйымының мүшесі. Қазақстанның көгілдір туы БҰҰ ғимараты алдындағы салтанат алаңында басқа мемлекеттердің туларымен қатар желбірейді. Сонымен бірге Қазақстан көптеген халықаралық ұйымдарға мүше, бұл — елдің жетістігі мен беделінің айғағы.
Бүгінде әлемде әлеуметтік теңсіздік, ұлтаралық қақтығыстар, діни көзқарастардың қайшылығы сияқты мәселелер бар. Ал Қазақстанда бейбітшілік пен келісімнің сақталуы — бірлікке негізделген ортақ құндылықтардың нәтижесі.
Ортақ жұмыстар
1) Мақал-мәтелдерді толықтыру
- а) Отан — … да ыстық.
- ә) Отансыз адам — … орман.
- б) Өзге елде сұлтан болғанша, өз еліңде … бол.
- в) Туған жердей жер болмас, туған … ел болмас.
2) Ой қорыту
Слайд бойынша негізгі ұғымдар жинақталып, оқушылардың пікірлері тыңдалады.
Сабақты бекіту
Төмендегі тест тапсырмалары арқылы білім тексеріледі.
1. Қазақстанның мемлекеттік тілі:
- а) қазақ тілі
- ә) орыс тілі
- б) ағылшын тілі
2. Қазақстанның рәміздері:
- а) елтаңба, ту, әнұран
- ә) ту, елтаңба, төл теңге
- б) президент, ту, парламент
3. Қазақстанның ұлттық ақшасы:
- а) теңге
- ә) доллар
- б) сом
4. Қазақстанның бас қаласы:
- а) Астана
- ә) Алматы
- б) Ақтау
5. Әнұран қалай орындалады?
- а) қолды жүрек тұсына қойып, тұрып айтылады
- ә) отырып айтылады
- б) түзу тұрып айтылады
6. Астана қаласы қай өзеннің бойында орналасқан?
- а) Есіл
- ә) Нұра
- б) Ертіс
7. Мерекелерде және спорттық жарыстарда қай рәміз жоғары көтеріледі?
- ә) ту
- а) елтаңба
- б) әнұран
Бағалау және үй тапсырмасы
Бағалау
Оқушылардың топтық жұмысы, жауаптары және тест нәтижелері бойынша бағаланады.
Үй тапсырмасы
- Мәтінді оқып келу.
- Мақал-мәтелдерді жаттап келу.
- Ребусты шешіп келу.
Түйін
«Отанын сүймегеннің — болашағы баянсыз.»