Жақсылық Үшкемпіров 1951 жылы Жамбыл облысы, Тегістік ауылында дүниеге келген

Жақсылық Үшкемпіров 1951 жылы Жамбыл облысының Тегістік ауылында дүниеге келді. Мектепті аяқтаған соң зоотехник мамандығын таңдады да, Семейдегі мал дәрігерлік институтына оқуға түсті.

1974 жылы институтты тәмамдап, Алматыға келді. Оның басты мақсаты — елімізге еңбегі сіңген жаттықтырушы В.А. Писаревтің жетекшілігімен күрес спортын терең меңгеру еді.

Ол бала күнінен қазақша күреспен айналысты, ал классикалық және еркін күресті институт қабырғасында жүргенде бастады. 1970 жылы жаттықтырушы Рома Хасанович Ильматовтың кеңесімен өзіне беймәлім классикалық күрес бағытына біржола бет бұрды.

Жақсылық қарсыласын дәл бағалап, әлсіз тұсын сезе білетін. Ол ұпайы алда тұрса да, айқастың соңына дейін жеңісті бекіте түсудің ең тиімді жолын іздеуден танбайтын. Әсіресе арқадан асыра лақтыру әдісін шебер меңгеруі оның басты артықшылықтарының бірі болды.

1975 жылы Алматыда өткен алтыншы жазғы халықтар Спартакиадасы Жақсылық Үшкемпіровтің спорттық жолында ерекше орын алды. Ол еліміздің таңдаулы балуандарымен белдесіп, бәрін жеңіп шығып, Спартакиада чемпионы атанды. Бұл — оның өміріндегі алғашқы алтын медалі еді.

Кейін Ж. Үшкемпіров Қазақстан чемпионатының жеті дүркін жүлдегері болды. Түрлі халықаралық турнирлердегі тартысты белдесулер мен Одақтық біріншіліктегі чемпиондық табыстарынан кейін ғана ол алғаш рет Олимпиада ойындарына үміткер ретінде жолдама алды.

Жақсылық Үшкемпіров бар күш-жігерін Мәскеуде өтетін Олимпиадаға дайындыққа жұмсады. 48 кг салмақ дәрежесінде классикалық күрестен үміткер болған төрт спортшының арасынан ол аз ғана басымдықпен алға шығып, негізгі құрамға өтті.

Бұл қиын таңдауда оның жеңіске лайық екенін басшылыққа дәлелдеп, сенім артқан жаттықтырушысы — Вадим Александрович Писарев еді. Олимпиаданың алғашқы күніндегі жеребе нәтижесінде Жақсылық бірінші айқаста әлемнің екі дүркін чемпионы, румын шебері Александруға қарсы шықты. Сол сәтте де оны қолдап, жігерлендірген Валерий Резанцев пен Вадим Александрович Писарев болды.

Олимпиада күндері Ж. Үшкемпіров чемпиондыққа үміткер қарсыластары — румын Александруды, поляк Керпачты, болгар Христовты, венгр Шерештерді — өзінің шебер техникасымен, шапшаңдығымен және төзімділігімен жеңіп шықты.