Қазақша рефераттар

Тіл - халықтың жаны

Тәрбие сағаты

Өссе тілім, мен де бірге өсемін!

Бұл тәрбие сағаты ана тіліміздің қадір-қасиетін ұғындыруға, тіл тазалығын сақтауға және оқушылардың сөз мәдениетін дамытуға арналған.

Негізгі ой

Тіл — халықтың жаны, ұлттың ажырамас белгісі.

Бағдар

Сөз құдіретін сезіну, мәдениетті сөйлеу, ой-өрісті кеңейту.

Тәрбие өзегі

Туған тілін қастерлейтін саналы, парасатты азамат тәрбиелеу.

Мақсаты

  1. Оқушыларға тілдің қадір-қасиетін танытып, көркемдігін сезіндіру; сөз құдіретін ұғындырып, оның адам өміріндегі маңызын түсіндіру.
  2. Тіл тазалығын сақтауға баулу, мәдениетті сөйлеуге үйрету; шешендік пен нақыл сөздер арқылы ой-өрісті дамыту.
  3. Оқушыларды туған халқының тілін қастерлейтін, елжанды әрі парасатты азамат етіп тәрбиелеу.

Көрнекіліктер

  • Тәрбие сағатының тақырыбы жазылған көрнекі материал.
  • Нақыл сөздер жазылған плакаттар.
  • Өлең шумақтары жазылған шарлар, мерекелік безендіру.

Барысы

1-жүргізуші

Бүгінгі «Өссе тілім, мен де бірге өсемін!» атты тәрбие сағатына жиналған қонақтар, тіл жанашырлары! Сіздерді тәуелсіздігіне 22 жыл толған қазақ елінің Тілдер мерекесі күнімен шын жүректен құттықтаймыз.

2-жүргізуші

Тіл — халықтың жаны. Тілі жоғалған халық та жер бетінен жоғалады. Ана тіліміздің тағдыры үшін бабаларымыз ешқашан бейжай болмаған.

1-жүргізуші

ХХ ғасырдың 20-жылдары тіл тәуелсіздігін ту етіп көтерген Әлихан Бөкейхан, Ахмет Байтұрсынұлы, Міржақып Дулатов, Мағжан Жұмабаев, Мұхтар Әуезов сынды тұлғалардың мұрасы, сондай-ақ 80-жылдардың соңында бостандықтың лебі есіп, ел ішін оятқан бүкілхалықтық қозғалыстар — соның айқын дәлелі.

2-жүргізуші

Халқымыздың аса бай рухани қазынасы — туған ана тіліміз, қазақ тілі. Елімізде жүзден аса ұлт өкілдері тату-тәтті өмір сүруде. 1997 жылғы 11 шілдеде қабылданған «Тіл туралы» заңда:

«Тіл — халықтың ұлы жетістігі әрі оның ажырамайтын және бөлінбейтін белгісі».

Оқушылардың өлең жолдары

1-оқушы

Қайта туды қазағымның ай-күні, Күннен-күнге асар ма екен айбыны? Жетпіс жылда өтті талай кешуден, Қатар көріп шаттық, табыс, қайғыны.

2-оқушы

Тілім келді, дінім қайта оралды, Басқа төнген қара бұлттар жоғалды. Көк аспанда күндей болып жарқырап, Қазақ елі егемендік бола алды.

3-оқушы

Бүгін міне, жерде емес — көктемім, Өсе бергін, өсе бергін, көктегін! Әрқашанда биік болсын мәртебең, Тілім менің, көгере бер, көктемім.

4-оқушы

Тілім менің — тірегім, дінім менің, Тілсіз қандай болады күнім менің? Өз халқына жетеді өз мәнінде, Өз тілінде оқылса жырым менің.

5-оқушы

Тілім менің — қуатым, күнім менің, Күнім кетсе, не болар ісім менің? Тілсіз өмір бар десе, түсінбедім, Тілімменен тірлікті мүсіндедім.