Окоп Ойынның шарты
Маңғыстау облысы, Қарақия ауданы, Құрық ауылы
МКҚК «Айгөлек» балабақшасы • Тәрбиеші: Жадырасын Джумагазиева
Ер есімі – ел есінде
Бұл тәрбие сағаты балалардың Отанға деген сүйіспеншілігін арттыруға, ерлік пен батырлықты қадірлеуге, бейбіт өмірдің құнын ұғындыруға бағытталған.
Жүргізушінің кіріспе сөзі
Жауды жеңіп салтанатты құрғандар,
Отан үшін оттан жанып тұрғандар.
Бәрінен де бақытты ғой жандарым,
Жеңіс күні, жеңіс жылы туғандар.
Ән
«Әнұран»
Сұрақ-жауап
Жүргізуші: Балалар, біз қандай мемлекетте тұрамыз?
Балалар: Тәуелсіз Қазақстанда.
Ерлік — ұрпаққа өнеге
Батырларымыздың есімі ұмытылмайды. Отан қорғаған қаһармандардың қатарында Әлия Молдағұлова мен Мәншүк Маметова бар. Олардың ерлігі — жас ұрпаққа үлгі.
Көрініс
Әлия Молдағұлова мен Мәншүк Маметова туралы сахналық көрініс.
Жүргізуші: Бұл көрініс кімдер туралы?
Балалар: Әлия Молдағұлова мен Мәншүк Маметова.
Экранға назар
Бауыржан Момышұлы туралы бейнематериал.
Жүргізуші: Бұл көріністе кім туралы айтылған?
Балалар: Бауыржан Момышұлы.
Ескерту
Соғыстың жеңіспен аяқталғанына 70 жыл толуына орай, 9 мамыр — Жеңіс күніне арналған өлеңдер мен ойындар ұйымдастырылды.
9 мамыр — Жеңіс күніне арналған тақпақтар
Нұрай
Мәншүк апай — батыр қыз,
Ардақтаймыз атын біз.
Ұқсап Мәншүк апайға,
Өсіп келе жатырмыз.
Ернұр
Баламын мен бүгінде,
Кіп-кішкентай баламын.
Ертең мен де өскенде,
Ел қорғауға барамын.
Хадиша
Жеңіс келді далама,
Жеңіс келді қалама.
Жеңіс келді әке болып,
Елдегі бар балаға.
Мереке
Желбірейді бейбітшілік жалауы,
Орындалып жас ұрпақтың қалауы.
Әлия, Мәншүк — жүрегі боп жанып тұр,
Мәңгілік от — ескерткіштің алауы.
Дария Ш.
Отан-ана, Отан-жер,
Менің жерім — туған ел.
Ата заңым — ардағым,
Төгер маған шуағын.
Жайна
Отан — сенің ата-анаң,
Отан — досың, бауырың.
Отан — өлкең, астанаң,
Отан — аудан, ауылың.
Ойын: «Окоп»
Ойын шарты: қаппен секіру.
Ойын: «Мерген»
Ойын шарты: ұшақ құрастыру.
Көрініс: Әлия мен Мәншүктің соғысқа аттануы
18 жасында Кеңес Одағының Батыры атағын алған Әлия мен Мәншүктің ерлікке толы өмірі жүректі тебірентпей қоймайды.
Ақнұр (ана)
Иә, сұмдықтың болатынын сездім,
Әлсіреді ел күшті дауыл тезінен.
Ел қорғайтын ұл-қыздарым тұрғанда,
Бейбіт өмір боларын болжадым.
Аружан (Мәншүк)
Отан-ана жылағанда шерленіп,
Тапжылмастан шөгеді екен жерге бұлт.
Қара бұлтты қақ жарамыз дедік те,
Қолымызға қару алдық ерленіп.
Ақниет (Әлия)
Біз сендердей жаңа ашылған гүл едік,
Жерге — бейбіт, елге — бақыт тіледік.
Отан-ана отқа күйіп жатқанда,
Біздер ме едік үй бағатын тірі өлік?!
Жүргізуші: Бейбіт күн орнасын елімізде әрқашан. Тыныш өмір сүрейік, бейбітшілік күнінде.
Ән
«Әрқашан күн сөнбесін»
Мақал-мәтелдер: Отан, батыр, бірлік
Балалар Отан мен ерлік туралы мақал-мәтелдерді кезекпен айтып, мағынасын талқылады.
Дилназ
Отан — елдің анасы, ел — ердің анасы.
Кәусар
Батырға оқ дарымайды, батылға жау жоламайды.
Ақбота
Отан — оттан да ыстық, жалыны бар шоқтан да ыстық.
Толғанай
Батыр ортақ, ер ортақ, күн ортақ, ай ортақ.
Гүлайна
Отаны бірдің жүрегі бір, жүрегі бірдің тілегі бір.
Ақбаян
Батыр туса — ел ырысы, жаңбыр жауса — жер ырысы.
Аружан
Батыр болсаң — жауыңа найзаң тисін, бай болсаң — еліңе пайдаң тисін.
Ардақ
Отансыз адам — ормансыз бұлбұл.
Ойын: «Сөз құрау»
Ойын шарты: суретке қарап сөз құрастыру.
Батыр ағаларға арналған тақпақтар
Айтнұр
Көшеде тулар самғаған,
Көктемнің қызыл гүліндей.
Жеңіс тойын қарсы алам,
Өзімнің туған күнімдей.
Жеңіс
Қару алып ағалар,
Қырға шығып аналар.
Жеңу үшін дұшпанды,
Ту көтерді бабалар.
Қалипа
Ағалар саптан шықпасын,
Аналар қабақ шытпасын.
Бақытқа жетіп бар адам,
Сәбилер тыныш ұйықтасын.
Сидра
Аспанда күн күлімдеп,
Ата берсін нұр таңым.
Көк байрағың желбіреп,
Жаса, жайна, Отаным.
Абдулла
Елін, жерін сүйетін,
Ертеңі үшін күйетін.
Рухы биік ұланбыз,
Болашаққа сенетін.
Сымбат
Елімізде, жерімізде
Бүгін үлкен мереке.
Болашақтың тыныштығын
Қорғайды жас ұландар бүгінде.
Исмайыл
Жарық болсын күніміз,
Жарқын болсын үніміз.
Елін сүйіп ер жетер —
Біз болашақ гүліміз.
Ата-ана мен ойын бөлімі
Ойын: «Коучинг»
- Денсаулық туралы ата-аналардың пікірі.
- Баланың жазғы демалысын ұйымдастыру.
Қорытынды жолдар
Шекарада солдат тұр,
Ел бақыты — қорғаулы.
Көңілденсін ағалар,
Амандық хат жолдаулы.
Ән
«Атамекен»
Қорытынды
Осымен Ұлы Жеңістің 70 жылдығына арналған «Ер есімі – ел есінде» атты тәрбие сағатымыз аяқталды.